عدو الثورة الأول

**م.احمد زكريا** · 28-02-2011 09:45 PM

المشاركة الأصلية كتبت بواسطة wesam_salom

اسمح لى يا دون اوتيفا

للاسف كاتب المقاله مش صاحبى ولا اعرفه

بس قريتها وعجبتنى جدا وحسيت انها بتعبر عن كلام كتير كنت عاوز اقوله

الناس فى مصر (وفى المنتدى) انقسمت ل 3 اقسام

القسم الاول اللى شايف ان اللى حصل ده غلط وعاوز ينزل يقول احنا اسفين يا ريس (وطبعا رأيهم يحترم طالما ده رأى شخصى بدون مصالح مع النظام او خوف من محاسبه على فساد سابق)

القسم الثانى شايف ان الثوره شىء كويس وان التغيير قادم قادم وان احنا على الطريق الصحيح واننا دفعنا ثمن كبير للى حصل ومش معقول ندفع اكتر من كده وانه لازم الصبر واكتر من كده هنبقى زى اللى بيزود الملح فى الاكل والاكله هيبقى طعمها وحش وممكن نرميها او تتسبب فى مشاكل اكتر (وده رأى يحترم طبعا)

القسم الثالث شايف اننا دفعنا ثمن كبير ولسه ما اخدناش حقنا بالكامل واننا لازم نزود النار علشان الطبخه تستوى
وكمان لابد من التغيير الفورى والحالى الغير مؤجل (زى اللى بيدفع مبلغ زياده وهو بيشترى عربيه علشان يستلمها من المعرض وميستناش حجز التوكيل وممكن ساعتها التوكيل يجبره على لون عربيه مش عاجبه) وطبعا ده رأى يحترم برده اشمعنا هوه يعنى

وانا شايف انى مع القسم الاخير اللى عاوز اخد حقى وقتى طالما ان التمن تم دفعه
واؤمن بنظريه الطرق على الحديد وهو ساخن
وان التغيير واحده واحده ممكن يتسبب فى المماطله وساعتها ندور على حقنا ويقعدوا يفاصلونا فيه
وبمناسبه الحديد لى صديق يعمل كحداد كان دايما يقولى على حكمه (ضربه بالمرزبه احسن من 10 بالشاكوش)
وانا نفسى النظام القديم كله ياخد ضربه المرزبه دى

تحياتى ليك دون اوتيفا وانا عارف انك مع القسم الثانى

واحترامى للدكتور محمد وكل من لهم رأيه رغم اختلافى معهم فى الرأى

ولى كلمه اخيره

كلنا بنحب بلدنا ونفسنا نشوفها احسن وان اختلفت رؤيتنا لطريقه التنفيذ ومن الممكن ان تكون كل الطرق تؤدى الى نهايه واحد سواء جيده او سيئه ونتمنى من الله ان تقودنا اى الطرق الى الافضل

فعلا يا استاذ وسام تقسيم حضرتك ده هو الواقع المصري دلوقتي وان كانت الجموعة الاولى دي شبه انقرضت
والغالبية العظمى منقسمة بين القسم التاني والثالث
بس الاختلاف بينهم في طريقة التنفيذ زي ما حضرتك وضحت

تحياتي

**wesam_salom** · 28-02-2011 09:59 PM

النظام كله مينفعش ووضحتها قبل كدة تسقط النظام لا انما تصلح النظام اه
تسقط النظام ده معناها تلغي كل حاجة في الدولة وتعيد بنائها من اول وجديد وده مستحيل ومفيش اي ثورة في العالم عملت كدة
تصلح النظام يعني فيه عندك اخطاء في السيستم واشخاص غير مناسبين تظبط الاخطاء وتمشي الاشخاص الغير مناسبين وفي حالتنا تحاكم وتسجن اي واحد يثت عليه فساد فمثلا تطرد كل الفاسدين من الداخلية واي واحد منهم ارتكب جريمة يحاكم عليها محاكمة عادلة وتبقي على غير الملوثين وتعيد النظر في الية عمل الداخلية لا ان تلغيها وتعدم ظباط الشرطة في الشوارع او تقعدهم كلهم في بيوتهم زي ما ناس هنا بتقول

يا دكتور محدش يقصد بسقوط النظام اعدامه لكن التخلص السريع من الفساد الموجود فيه
زى المريض اللى عنده ورم انا شايف الافضل استئصاله بدلا من العلاج المتعب طويل المدى
بمعنى انه فى اى مكان او مؤسسه ناس كتير معروف عنها الفساد ولسه فى اماكنها
وناس عليها الشبهه دى من حقها محدش يظلمها لو كانت بريئه بس الافضل الاحتياط منها وتجنيبها لاننا فى وقت صعب
نفس فكره الفريق احمد شفيق فيه مجموعه رأيها انه وحش ولابد من استئصاله
رغم انى رأيى انه ممكن يكون كويس بس الافضل انه يتم تجنيبه بعيدا عن اداره البلد لاننا فى وقت لا يحتمل الاخطاء
وانه كان عايش فى الفساد او حتى متعايش معه مرغما بس من الصعب انه يغير اتجاهاته 180 درجه فى يوم واحد
وكل المؤسسات كده الشرطه والصحه والاعلام والماليه والاسكان
لازم فيها ناس من الكفاءه والبعد عن الشبهات نقدر نعتمد عليها فى الوقت الصعب ده لانه من الصعب انك تحاكم فاسدين على يد من يشتبه تورطهم فى الفساد ومن الممكن ان يكونوا منهم ابرياء

ومحدش طلب اعدام ظباط الشرطه ولا انهم يقعدوا فى بيوتهم
مفيش حد مننا ملوش قريب ظابط او فى سلك الشرطه
بس محدش يقدر ينكر انه بقى جهاز يضرب بيه المثل فى الفساد
لدرجه انى شفتك فى موضوع تانى بتتكلم عن ظابط شرطه عمل الواجب المفروض عليه وعمل مخالفه لابن عمه وكنت خايف الناس تطلب بالكشف على قواه العقليه او انهم يحجزوه فى قفص ذهبى لحد ما يتم استنساخه لانه من الناس المهدده بالانقراض

بس المطلوب برده منهم انهم طالما ادوا اليمين على حمايه البلد فى كل الظروف
وبياخدوا مقابل على كده وعاوزين الناس ترجع تحبهم تانى انهم ينزلوا الشارع وينفذوا مهمتهم اللى بيقبضوا عليها فلوس
ويعرفوا ان اى مضايقات اتعرضوا ليها بسبب اخطاء قديمه منهم ككل وكجهاز وده جزء من العقاب اللى يستحقه الجهاز ككل على قبولهم بالفساد وعدم محاولتهم تصحيحه او الخروج منه

واللى رافض منهم انه يمارس مهمته وعمله كحامى للشعب وللناس وتطبيق مبداء الشرطه فى خدمه الشعب هو اللى ممكن يقدم استقالته ويقعد فى بيتهم لان اللى بيحصل دلوقتى مسأله عند بين الشعب وبعض الفاسدين من الشرطه مش كلهم

مش راضيين ينزلوا لحد ما الناس تعرف قيمتهم وترجع تبوس ايديهم مش عارفيين ان كده الفجوه بتزيد اكتر والكراهيه بتزيد
والناس بتنتقم من الفاسد منهم اللى بيتهرب من مسئوليته بمضايقه الصالح اللى بينزل يشوف شغله وممكن يتحمل الاهانات لمجرد انه بيحاول يراعى ربنا فى شغله

الثقه دى هترجع بطريقتين
الاولى هى اعتذار الصالحين والفاسدين معا عما تسبب فيه القله الفاسده وده لازم يساعدهم فيه الاعلام بالصدق مش بالطرق القديمه
والثانيه هى ان الناس فعلا تشوفهم بيأدوا شغلهم رغم الظروف وده هيخلى الناس تحترمهم وتنسى اللى فات
بمجرد ما اى واحد هيتصل بالنجده وتيجى بسرعه وتحل له مشكلته وتعامله بالطريقه المناسبه ويحس انه فعلا موجود فى شغله ووضعه اتغير المواطن هو كمان هيتغيروهيرجع يحترمه ووقتها كله هيتأكد اننا فى مركب واحده

واتمنى اننا كلنا نعرف اننا فى مركب واحده ونتناقش بهدوء بدون التعصب فى الرأى لاننا بتعصبنا هنفترق وهنخسر
لكن باتفاقنا على المناقشه الهادئه بدون تعصب ممكن نقتنع بأراء البعض او نوصل لحل وسط يكون افضل لنا كلنا

**wael17** · 28-02-2011 10:59 PM

المشاركة الأصلية كتبت بواسطة dr-mohamed

+++++++++++++1

اما ان تكتبه او تحذفها لان جملتك يرمي بها كل من اختلف معك في راي

+111111

فعلا التوقيع يرمي به كل من اختلف في الرأي مع صاحب التوقيع لدرجة اني شكيت في نفسي اني اكون عملت مشاركات قديمة بامدح فيها الحكومة السابقة بتاعة نظيف او اعارض الثورة لتغير النظام الفاسد بس الحمد لله مشاركاتي القديمة تثبت اني مع الثورة من اول يوم

يوم 25 يناير