يا جماعة انا محتار بشتغل فى شركة مخيرانى بين اكمل ب عربيتى الكورسا و تدينى تمنها او اخد لانوس جديدة يا ريت تساعدونى
عرض للطباعة
يا جماعة انا محتار بشتغل فى شركة مخيرانى بين اكمل ب عربيتى الكورسا و تدينى تمنها او اخد لانوس جديدة يا ريت تساعدونى
لو عربيتك مريحاك يبقي خد الفلوس احسن حطها في شقه او اتجوز بيها :).
لكن لو تعباك او حاسس انها خلص في اخرها يبقي بيعها و ستفيد بفلوسها و خد اللانوس علي الاقل خمس سنين حتشيل دماغك منها خالص
لانوس طبعا الاوبل 94 صاحبها خد خيرها وانت هتشيل شرها اوعى المستعمل مهما يكن
مش عارف ايه وجه المقارنة !!
أولا انت العربية الكورسا دي بتاعتك انت..
المقارنة غريبة شوية..
بس شوف انت اولوياتك..
يعني لو محتاج فلوس في ايدك.. الشركة هتديك كام..؟؟ 35 الف مثلا.. انت ممكن تشد العربية ب5 منهم وتخليها تمام وزي الفل.. عفشة ومساعدين و كاوتش و اسطوانة و دسك لو مش مغيرهم و ظبط التكييف.. و العربية هتبقي زي الفل.. ده هاقول تاني لو انت محتاج فلوس في ايدك..
لكن لو مش محتاج فلوس و عايز تركب زيرو.. توكل علي الله و هات اللانوس.. علي الاقل عربية هتركبها كام سنة مش هتعمل فيها حاجة غير الصيانة في التوكيل..
والضمان بيشيل لو فيها حاجة.. وميزة اللانوس انها تكنولوجي جي ام يعني تقريبا فيها شبه كبير من الكورسا اللي معاك كموتور و حاجات كتير..
اوزن الموضوع في دماغك وشوف و رتب اولوياتك..
وربنا يوفقك في الاختيار ان شاء الله..
عشان كده كنت يتسأل علي التكييف ولا ايه..؟؟ ;)
احمدعلوى باشا انت فاهمنى اوى هههههه
احب اقولك الشركة هدينى 60 الف على خمس سنين يعنى كل شهر الف
و انا شاريها ب42
بس انا همشى بيها يوميا حوالى 300 كيلو خايف تتعب من المشى بعد كام شهر
و الف شكر لكل اللى رد على
هي العربية الكورسا اللي معاك عاملة كام الف كيلو..؟؟
وانت سواقتك عموما شكلها ايه..؟؟ و لو فاكر كفاءة الموتور كانت ايه لما اشتريتها..
و ممكن اقولك ممكن تحتاج تعمل فيها ايه..
عشان لو العربية ماشية قليل.. ظبطها كده و شد اللي فيها.. اصرف عليها شوية ف الاول..
و هتمشي معاك زي الفل..
انا بس عايز اقولك حاجتين عرفتهم.. من المهندس اللي باصلح عنده عربيتي..
اولا.. الكورسا و اللانوس موتورهم تقريبا واحد.. و الفرق في الخامات.. م السبايك المعندينة بتاعت الموتور.. و اللانوس انجكشن و الكورسا هاف انجكشن SPI as Single Point Ingection
اللي هي انجكشن واحد علي الكربيراتير..
اللانوس بصراحة في ناس مشيوا بيها 250 الف كيلو من غير ما الموتور بتاعها يتفتح..
لكن اكيد في حالات تعب موتورها قبل المسافة دي..
الكورسا اللي سمعته من قريبي كان شغال في التوكيل.. قالي اقل كورسا دخلت تفتح موتور كانت عاملة 300 الف كيلو و كانت بتاعت شركة و كانت العربية بتتبهدل جدا.. و دي اسوأ حاجة.. و احسن حاجة كانت كورسا ماشية 800 الف كيلو..
صدق عينيك.. مش غلطة كتابية.. ايوة 800 عربية شركة برضه بس سواق واحد بيسوقها من 10 سنين و سواقته هادية.. و كل المسافة دي مكانتش هيتفتح موتورها برضه.. كانت ماشية تمام..
شوفت بعيني موتور لانوس البلوك بتاعه مكسور.. مخروم و البيلات طلعوا منه.. ودي حاجة مستحيل تحصل في الاوبل خالص..
الخلاصة.. انت لو هتجيب لانوس.. هتدفع فلوس.. عشان تجيب الكاملة اللي هي ب 67 هتدفع بتاع 20 الف ولا حاجة.. عشان تكمل اقساط,, ولا الشركة اللي هتدفع..؟؟
لكن لو الكورسا.. انت فلوسك هتاخدها في جيبك.. و تصرف براحتك..
وفي حاجة تانية بقي وهي انك لو من النوع اللي مش فاضي لشغل في العربية ولا وقفة مع صنايعية و الكلام ده.. يبقي ريح دماغك و بالك و هات زيرو و اشتري دماغك..
احمد باشا انت مغرقنى بمعلوماتك دى
وانا هقولك قصت الاوبل انا لما اشترتها كانت مفتحتش الموتور كان صاحبها الاول مراعيها على الاخر و كانت عاملة 200 الف كيلو و دلوقتى عاملة معايا 250 و انا بمشى هادى يعنى اخرى 120 او 130 الا لو كنت بجرب عربية بجيب الدواسة البنزين للاخر و العربية كل مشاكلة فى الكهربة بس و عاوز شوية شغل فى العفشة و الدنمو بتاعة عاوز يتغير الموتور 100/100 و المشكلة الاساسية فى التكييف الهوا ضعيف و التسعيع ضعيف جدا بس و انا محتار جدا اغير الكباس و لا لا غير انها عاوزه طقم كاوتش لانى بمشى بيها مسافات سفر
و الف شكرا على الردود
تمام يا باشا..
تعالي نشوف فيها كده ايه واحدة واحدة..
مشاكل العفشة.. العفشة كلها تتغير جديدة هتكلفك حوالي 500 جنيه مقصات و بيض و بارات..
و 1000 جنيه مساعدين لو هتجيب بلشتاين الماني اللي كل الناس بترشحها.. عشان طرية و مريحة..
و 1500 لو هتجيب مونرو هي ثباتها رهيب في السفر لكن في المطبات ناشفة و مش مريحة..
انا عن نفسي لسة هاجرب عربية فيها مونرو و احكم عن تجربة.. لكن سماعي كده مش مقتنع..
المهم..
الكاوتش هتجيب كاوتش نضيف جدا..يعني بردجستون ياباني و مش اقل من كده.. عشان انت بتسافر كتير. لو مقاس الكاوتش الاصلي بتاع العربية هيبقي 13 تجيب عريض شوية يعني تجيب 13-175/70 سعر الاربع فرد هيكون اقل من 1200 جنيه.. ان شاء الله..
اما بالنسبة لموضوع الدينامو.. انا بصراحة مش عارف تمنه كام.. بس هتجيبه استيراد مش جديد..
وبيتهيألي سعره عمرة ما هيزيد عن 300 جنيه.. وممكن يكون اقل بكتير من كده.. بس مش عارف بكام بالظبط بصراحة..
كومبريسور التكييف برضه مش عارف.. انا هاكلم الشركة كمان شوية واسأل واقولك..بس ده هيبقي سعر الجديد..
يعني الحاجات الاساسية دلوقتي.. العفشة هنقول في حدود 1.5, الكاوتش في حدود 1.2
الكهربا و تظبيطها في حدود 500 علي اقصي تقدير وانا متأكد انها هتكون اقل من كده بكتير..
و الكومبريسور مش عارف لسة..
يبقي علي اقصي تقدير هتصرف في حدود 5 الاف.. العربية ترجع زيرو..
وخلي بالك اني انا باتكلم علي اسوأ الفروض.. يعني لو هتغير ال4 مساعدين مش الاماماي بس يعني..
وانك هتغير العفشة كلها كلها.. مش حاجات بسيطة فيها لو هتغير حاجات و تسيب حاجات..
يعني ان شاء الله في الحالات الطبيعية مش هتوصل 4 الاف ان شاء الله.
ولما اعرف معلومات اكتر عن الاسعار هابلغك علي طول..
وبعدين انا ولا مغرقك ولا حاجة.. انا اللي اعرفه بانقله ليك.. وفي حاجات كتير جدا لسة ماعرفهاش.. انا لسة اوبلاوي جديد بقالي 3 شهور بس..و في معلومات كتير من اللي باقولهالك مش دقيقة قوي.. واسعار مش مظبطة ..
معلش.. ادينا بنتعلم... و يا رب اكون قدرت افيدك..
الف شكر يا احمد باشا
كل الاسعار دى فى المعقول بس سعر الكاوتش كان 1600 للاربعة بس كان مشلان و مقاش الجنط14 و مقاس الكاوتش 185/70/14
عصفور فى اليد خير من 10 على الشجره
هات الانوس زيرو
و بيع الاوبل هتاخد منها ال 35 الف مستريح حطهم فى اى حاجه
لان 1000 كل شهر مش هتعمل حاجة و فى النهايه يبقى انت كسبت فلوس فى الاول
و راحه بال 3 سنين على الاقل
و فلوس فى الاخر بعد متطلع بعربيه لانوس و تحب تبعها فى اى وقت
و ربنا يوفقق فى الاختيار
اها..
معلش انا كنت باحسب علي مقاس الجنوط و الكاوتش اللي عندي..
اصل انا عندي جنوط 13 بس اسبور و هي الاصلية بتاعت العربية..
عموما الميشلان اكيد نضيفة جدا و الفرق مش كبير قوي برضه.. يعني 300 جنيه فرق مش كبير..
وعلي فكرة..
انا اتصلت دلوقتي بمقار للتكييف..
وسألتلك عن كومبريسور التكييف الساندن الياباني..
تمنه لوحده 1500 جنيه.. عشان لو حبيت تغيره..
الف شكر للجميع
ولكن الاخ احمد علوى حسم المشكلة بسعر الكباس
و القرار و انى هاخد اللانوس و مش هبيع الاوبل عشان هديها لاختى و هى مش بتجرى بيها كتير يعنى مش هتحتاج للاضافات القويه و لو لازم يبقى براحتها مش دلوقتى
و انا شاكر للجميع الردود و الاضافات و شكر خاص جدا للزميل احمد علوى
يا باشا لا شكر علي واجب..
انا تحت امرك في اي وقت..
وعموما عملت خير..
ربنا يكرمك و يوفقك ففي موضوعا لعربية ده ان شاء الله..
عموما ابقي طمني عملت ايه ولو في اي حاجة انا تحت امر سعاتك..
وفرصة سعيدة جدا يا محمد بك..
الف شكراااااااااااااااااااااا اا
للججميع و ليك خاصا احمد بيك علوى و على فكرة يا ريت نكون اصدقاء بجد
انا اسمى بالكامل عمرو محمود نور الدين و الشهرة عمرو نور من سوهاج مهندس مدنى
لا شكر عل واجب يا باشا..
احنا اخوات..
ان شاء اللله نكون اصدقاء باذن الله..
انا اسمي احمد عبد المنعم علاوي.. من القاهرة..
مهندس كوميوتر..
سلام يا هندسة. ;)