ياجمــــــــاعه
اللي انا متوقعه إن مصدر أمني من مكان أمني في هيئه أمنيه في مصر اللي طبعا عايش فيها عيشه هنيه هايعمل حاجه بسيطه جدا وهي
مانشيت عريض بفونت 50 وواخد صفحة الأهرام الأولى كلها بالألوان ( الأبيض والأزرق) بيقول:
إغلاق موقع الفيس بوك
ومقاله ظريفه بتقول :
تم إصدار أوامر شديدة الصرامه من مصدر أمني إلى كل شركات الإنترنت والتي تزود طبقة كبيره من الشعب المصري بخدمة الإنترنت فائقة السرعه ADSL بإغلاق هذا المدعي "الفيس بوك" إغلاقا تاما لإعتباره وسيلة مثلى لإثارة الشائعات والبلابل في مجتمعنا العزيز الهادي ومن هنا نعتبر نحن حكومة مصر العظمى أن هذا المدعي محظور أمنيا في مصر وإذا أثبت أن أحدا من الشركات او الأفراد قد خالف هذا الحظر فسوف يطبق عليه قانون رقم 010 لسنة 2008 والذي ينص بإحالة هذا المتهم لفضيلة المفتي دون الرجوع للقضاء او دون سؤاله ( إنت عملت كده ليه يا إبني)
وبكده المصدر الأمني هايطمن الهيئه الأمنيه إن كل شئ تمام والشعب المصري مسالم جدا وبيسمع الكلام ومش هايعمل كده تاني
وتوتا توتا خلصت الحدوته
والسلام عليكم ورحمة الله وبركاته
مع تحيات
مصدر أمني مسالم
-----------------------
وبخ تلاقي تاني يوم تيجي تفتح الأكونت بتاعك على المدعي "الفيس بوك" تلاقي جمله ظريفه لذيذه موجزه للغايه
مش هاتسمع الكلام يا إبني ولا آيه
مغلق لحظر تداوله في مصر
-----------------------
وده كانت نهاية موقع عظيم إستطاع ان يجمع يوما ما شعب مصر الحبيب تحت راية الإضراب البيضاء في يوم حافل سوف يذكره التاريخ وتذكره الأجيال القادمه وسوف يخلد في ذاكرة كل مصري إستطاع أن يقوم بخطوه عظيمه في تاريخه وهيه
"Join This Group "
وطبعا إحنا عارفين آيه هو الجروب
وداعا فيس بوك
وداعا بصوت واحد
صوت شعب مصر