كنت.. مهدد بالقتل........تجربه شخصيه ومنظور أخر للوضع الحالى..

**Mo.Kareem** · 02-03-2011 10:07 PM

المشاركة الأصلية كتبت بواسطة heshamzaky

أزيك يا فندم . الله يكرمك كلام حلو و جميل جدا أكيد علشان الرزق يبقى لازم شغل و من غير شغل محدش أو أغلبيتنا مش أصحاب ملاين بالعكس كلة بيشتغل علشان معيشتة و الى جاى على قد الى رايح . محدش أبدا مش بيحب البلد بالعكس كلنا بنحبها و لكن أنا بقول تيجى لغاية حد معين من المطالب , أقف علشان ما حدش يعرف يلتف و يسرق كل حاجة و يبقى كأنك يا أبو زيد ما غزيت يعنى حققت مكسب ممتاز أقف و أحافظ على المكاسب الى كسبتها و بعد ما الامور تهدى أزود و أطهر و أحاسب كل فاسد . الجيش مش عاجز بس الناس هيا الى مش مساعداة يعنى أنا مع نزول الشرطة و لكن برضو عاوزها تنزل نيو لوك و شكل جديد و فكر جديد و معاملة جديدة و الى يغلط يتحاسب و تتقطع رقبتة لو ثبت أنة مدان بالقانون . بس هما مش عارفين ينزلو أو متقاعسين لسببين ممكن لو نزلو الناس البلطجية حا تقطعهم و الى كان فى الطبيعى ماشى جنب الحيط و الله لو لقى الشرطة بتتضرب حا يدخل و يجامل و يضرب و دة لآن رصيد الشرطة زى الزفت و مكروة من زمان بوجة عام بس فى نفس الوقت أنت عاوز تواجدهم و هما علشان ينزلو بيلعبو على وتر أديكو من غيرنا أتبهدلتو و لما ينزلو ينزلو بشروطهم و يتفردو تانى و دة طبعا غلط و غير مقبول ينزلو بس بأدب . و اكون اذكى منهم و ما أديلهومش الفرصة الى هما عاوزينها و هى أشاعة الفوضى علشان لما ينزلو يبقو نازلين بصورة الابطال لآ طبعا . ينزلو بأحترام بس الناس تبطل جو التوتر الى البلد فية و ساعتها حا يتكشفو و يبان عاوزين ينزلو و لا مش عاوزين و تقدر ترمى الكورة فى ملعبهم و تقول أهى الاوضاع استقرت اشتغلو و ورونا الهمة و طهرو البلد من البلطجية و الهاربين و حا يبان نيتهم ساعتها و الامور تتضح

خلاص يبقا متفقين يا استاذى ، يعنى لسه اساليب النظام القديم لسه قائمة

**Mo.Kareem** · 02-03-2011 10:10 PM

عموماً احمد شفيق على on tv نتفرج عليها ونشوف بيقول ايه

**ahmedhilmy** · 02-03-2011 10:13 PM

انا مش متفائل خالص ربنا يعدي الايام دي علي خير

**A.Saad** · 02-03-2011 10:15 PM

المشاركة الأصلية كتبت بواسطة cdkareem

كويس اوى حضرتك مواطن واحد حاول يقتل ظابط او قتله فعلاً وباقى الخبر بيقول ايه حضرتك ( تعاطف المواطنين والاهالى ) يعنى واحد ضرب - واحد بس واخد بالك - وباقى الناس تعاطفوا مع الظباط ومسكوا الواحد ده يبقى الحجة فين بقى ؟؟

تمام
بس مش كل الشعب بيتعاطف مع كل الناس
امبارح هتلاقى خبر تانى
علقة لامين من موظف علشان قله اقف فى الاشارة
وعلقة لظابط حاول ينظم مرور زفة

**م. حاتم السباعي** · 03-03-2011 04:36 AM

المشاركة الأصلية كتبت بواسطة أشرف فتحى

بعد إذنكم يا شباب..عاوز بس أقول حاجه..

لو حد فهم انى بلقى اللوم على حاله التردى الأمنى اللى احنا فيها على شباب الثوره فهو غلطان....ولو حد فاهم انى إتفاجئت برد فعل الشرطه ..برضو غلطان..وقسما بالله ما كنت عاوز اروح المديريه ولا الوزاره لولا ان الجيش هو اللى بعتنى ليهم....

تعالوا بس نقرا الكلام اللى بين السطور....

الموضوع مش بس حكايه بحكيها عشان نتسلى ونتخانق مع بعض....

بيتى هو خليه فى نسيج المجتمع المصرى....وعشان منديش الموضوع بعد سياسى او نقول كلام مكلكع تعالو نفكر بالراحه..

اول حاجه كان فى سلبيه وتواكل من بعض الجيران فى البيت والحجج كانت جاهزه

كان فى خيانه من بعض الجيران انهم راحوا يمسحوا جوخ ويطلعوا نفسهم من قائمه الثوار اللى عاوزين يقلبوا نظام الحكم فى البيت ودى مش خيانه قد ما هيه جبن وخوف من بطش النظام وبلطجيته..

عند أول مواجهه وجدت نفسى فردا وحيدا ...الكل إختفى من حولى ولو لم اتحاشى الصدام ولو تماديت فى العند لتحول الأمر الى خمسه قتلى بدل 4...طالما الغلبه الان للقوه الغاشمه..

لو استمعت لبعض المهللين..كدابين الزفه...الناس اللى بتظيت فى الظيته.....انت على حق ولو مت هتموت شهيد..توكل على الله وهو حسبك....ما اخذ بالقوه لا يسترد الا بالقوه.....فكلامهم هو قول حق اريد به باطل....مش عشان انا مؤمن وعارف ان ليا عمر وان كل شئ بقدر اروح اقف فى وش القطر واقول لو ليا عمر هعيش...ولا انط من البلكونه واقول لو ليا عمر هعيش.....

لا القى اللوم على الشرطه او الشعب زى الاخ الفاضل ما تسأل....أنا بطرح تسأول...هو ليه لما جتلنا الفرصه نتغير بقينا ناكل فى بعض؟ ليه كل واحد عايز يتجبر ويعوض كبت سنين...؟!!!

ليه كل واحد عاوز ياخد حقه بدراعه وكله عاوز يشترى طبنجات وكله خايف؟!

الساعه داخله على 4 صباحا عارفين انا صحيت من النوم ليه؟

الدبابتين مشيوا النهارده والقلق رجع تانى واول ما سمعت صوت عالى افتكرته ضرب نار ..خفت على نفسى وعيالى وعربيتى الى رجعت ركنتها النهارده تحت البيت بدل ما كنت بركنها عند بيت والدى واروح بالمواصلات وخايف ارجع مالقاهاش....

كلنا عارفين ان الدنيا مش تمام ولا امان دلوقتى......وإن الحكومه فيها سلبيات..وفيها حاجات مش عاجبانا..لكن تعالوا نفكر بقى وكفايه جعجعه فاضيه...

هل لو اتشال النهارده شفيق وجه غيره هيرضى كل الناس؟

هتبطل المظاهرات والاعتصامات؟

قسما بالله ما هيحصل.....وده يمين احاسب عليه امام الله....

إحنا عجبنا الموضوع...بالبلدى سوقنا فيها......الناس اللى كانت بتطالب بعمر سليمان هم نفسم اللى طالبوا برحيل عمر سليمان.....

مش هنجيب ملايكه نحطهم فى الحكومه...لأ ..أى حد هييجى يبقى فاهم إنه هيتحاسب ولو غلط نوجهه مش نقطع رقبته..خلاص مش هنسكت تانى ومش هنسيب حقنا تانى...

لكن إزاى؟

بالاصول..

انتخب عضو مجلس شعب يمثلنى ويستجوب اى حد يقعد على كرسى ونهتم منبقاش سلبيين...

ولو العضو ده مش هيمثلنى كويس أحاسبه.....إزاى؟

انا وانت وفلان وفلا نعمل 30 واحد فى عمارتنا..ونتفق مصلحه الواحد فينا هى مصلحه ال 30 ..يعنى مجلس شعب صغير يمثل عمارتنا بس...عضو مجلس الشعب عاوزين منه يعمل حاجه ومنفزهاش ننزل كلنا..ال 30 ...نروحله مكتبه...وكل يوم لغايه ما يعرف ان فى ناس بتحاسبه.....ومحدش بالطريقه دى هيجرى على منصب...

يعنى دلوقتى عماره واحده تقدر تستجوب وزير فى مجلس الشعب.....حد كان يصدق ده يحصل؟!

أشوف فساد ما أكبرش دماغى وأكون سلبى.....

ما امشيش عكسى...ما ازوغش من شغلى..ما انافقش مديرى..ما ارميش الزباله فى الشارع ولا الكانز من شباك العربيه....أبدأ بنفسى وببيتى وبعد فتره هيفضل برضو ميدان التحرير...مش هيتلغى..ابقى روح اعمل مظاهره...بس نخللى بالنا...

الثوره ما كملتش شهر....والفساد فى مصر بقاله اكتر من 40 سنه لما بقى سمه اساسيه...

بدل ما تعتصم فى التحرير وتوقف حالى انا واللى زيى...فكر وقدم مشروع ننفزه انا وانت وانا وانت نشتغل....

بدل ما اعمل خيمه وانام فى الشارع..تعالى نقعد انا وانت قدام بيتى نحمى الاطفال و النساء..

الشرطه هربت...نسق مع زمايلك وتبقوا بدل الشرطه...مكنوش بيقدموا لنا كتير اصلا...

البلطجيه والخارجين على القانون اساسا فى منتهى الخسه والجبن....معندهمش كرامه .....لو حد فيكم شاف واحد من دول لما كان بيتمسك فى اللجان الشعبيه وهو بيعيط ويولول ويبوس ايدين الناس بعد ما كان بيقول انا عنتر وانا الحكومه هيعرف انهم بللالين...بدليل ان مفيش حد ظهر لمده 48 ساعه منهم لمجرد وجود دبابتين جيش فى المنطقه..

الدبابتين عليهم ما لا يزيد عن 10 عساكر والبلطجيه اللى جم اول يوم لا يقلوا عن 80 واحد على الاقل ومسلحين...يعنى لو قامت المعركه الله اعلم مين هينتصر ولكن التفوق العددى للبلطجيه ومع ذلك إختفوا تماما....

كفايه اعتصامات ومظارهرات عشان بقت موضه....خلونا الأول نحط رجلينا على سلم التنميه واثناء الصعود نحط الفاسدين تحت رجلينا...

إحنا أول حاجه خسرناها كانت النيل..هنحاسب مين دلوقتى لما اسرائيل تعمل اللى هيا عايزاه عند منابع النيل...هنروح نتعتصم فى الميدا؟؟؟!!

شويه عقل يا ساده.....

انا عربيتى أخرها 200 كيلو...وبسوق بقالى سنين....هل أقدر أمشى على 120 فى وسط البلد...مع ان عربيتى تجيبهم بسهوله وانا سواق قديم...بس مينفعش....بالمنطق مينفعش...!!

ارجع اعيد وازيد....اللى عامل عمليه ومستأصل ورم خبيث فى المخ بقاله 30 سنه مش هيخرج من المستشفى فى نفس اليوم ويروح يمتحن فيزياء ويجيب درجه نهائيه كمان......نحبى الاول وبعدين نمشى وبعدين نجرى......مش هنركب الصاروخ ومش هيعجبنا اى حد هيقعد على الكرسى........

هنعمل زى حدوته جحا والحمار.....

اخي الكريم استاذ اشرف
كل الاحترام و التقدير لاراء حضرتك
و ما حدث معك و في منطقتك حدث مع الكثيرين و في احياء كثيرة
بل في انحاء الجمهورية كلها
اخي الكريم انا حاسس ان هناك الان من يأخذ الموضوع بتاع استمرار التظاهرات و كأن الموضوع بقي شئ شخصي او ان الدعوة الان للتهدئة (( خيانة مثلا للثورة و للشهداء )) و لا يعلمون ان الجسم كله الان مدمم كما اشرت حضرتك و البلد كلها الان في حالة ضعف عام و يجب ان تشفي جراحها
كي نستطيع ان نقف اولا علي قدمينا ثم نطور الهجوم و ننظم الدفاع و هكذا استطيع ان اقول لحضرتك الان ان اليأس يدب في نفسي مما اراه و اتابعه من تعليقات
ده الراجل هنا دخل قال انا هرشح شفيق لمنصب هام في الدولة
يا نهار ابيض علي اللي سمعه
و و الله الكثير من ابناء هذه الثورة كانو هم و اباءهم يحلمون باليوم الذي يجئ فيه عمر سليمان كنائب للرئيس السابق
و الكثير فعلا خلال السنوات القليلة الماضية كان يحلم بأن شفيق سيمسك الوزارة
بس هوه التخوين و النغمة الجديدة التي دبت بين ابناء الوطن الواحد للاسف هي ما سوف تكون لغة الحوار للاسف مستقبلا
لان الكبر هو الاساس الان
تقبل تحياتي و اللي الغد بأذن الله

م.حاتم السباعي

**ahmed_su** · 03-03-2011 05:00 AM

الله ينور عليك يا اشرف

ربنا يعدى الايام دى على خير

يالا قوم صلى الفجر - وربنا يوفقنا لما يحبه ويرضاه

**kh_talaat** · 03-03-2011 09:57 AM

المشاركة الأصلية كتبت بواسطة أشرف فتحى

هل لو اتشال النهارده شفيق وجه غيره هيرضى كل الناس؟

هتبطل المظاهرات والاعتصامات؟

قسما بالله ما هيحصل.....وده يمين احاسب عليه امام الله....

إحنا عجبنا الموضوع...بالبلدى سوقنا فيها......الناس اللى كانت بتطالب بعمر سليمان هم نفسم اللى طالبوا برحيل عمر سليمان.....

صديقي العزيز اشرف فتحي

اقسم بالله ان مطالب الثورة لم تزيد منذ اليوم الأول فالمطلب بتشكيل حكومة وطنية انتقالية او حكومة تكنوقرات خلال ال6 اشهر الباقيين لأنتخابات الرئاسه هو المطلب رقم 4 من قائمة مطالب الثورة بعد تنحي الرئيس - و حل مجلسي الشعب والشورى - وإلغاء قانون الطوارئ

بل ان هذا المطلب بالذات كان يطرح من المثقفين ومن الدكتور محمد البرادعي قبل قيام الثورة وليس كما بدأ يشاع بين الناس حاليا ان شباب الثورة كل يوم بطلب والمطالب مش هتنتهي وكل شوية يهددون بالأعتصام في ميدان التحرير وما الى ذلك من كلام يراد به اجهاض الثورة

لكن بالنسبة للإعتصامات الفئوية للموظفين والعمال فكلنا طبعا ضدها (وان كان بعضها على حق) بل هي نوع من الأنتهازية ومش وقتها دلوقتي خالص فعلى الأقل محدش هيقدر ينفذلهم اي مطالب بشكل حقيقي قبل استقرار البلد

المشاركة الأصلية كتبت بواسطة أشرف فتحى

انتخب عضو مجلس شعب يمثلنى ويستجوب اى حد يقعد على كرسى ونهتم منبقاش سلبيين...
ولو العضو ده مش هيمثلنى كويس أحاسبه.....إزاى؟

انا وانت وفلان وفلا نعمل 30 واحد فى عمارتنا..ونتفق مصلحه الواحد فينا هى مصلحه ال 30 ..يعنى مجلس شعب صغير يمثل عمارتنا بس...عضو مجلس الشعب عاوزين منه يعمل حاجه ومنفزهاش ننزل كلنا..ال 30 ...نروحله مكتبه...وكل يوم لغايه ما يعرف ان فى ناس بتحاسبه.....ومحدش بالطريقه دى هيجرى على منصب...

كلام سليم 100 %

لكن دي هي الخطوة التانية اللي مش هنقدر نوصل ليها الا بحكومة وطنية او حكومة تكنو قراط اي يعمل اعضائها بشكل عملي على تيسيير امور البلد حتى موعد الأنتخابات وليس حكومة سياسية رئيس حكومتها معين من النظام السابق وتم اختيار أهم وزرائها (الداخلية - العدل - الخارجيه) من النظام السابق فكيف نأمن لتلك الوجوه في الحفاظ على مكتسبات الثورة ليوم واحد وليس لـ 6 شهور