الموضوع: كنت.. مهدد بالقتل........تجربه شخصيه ومنظور أخر للوضع الحالى..

السلام عليكم ورحمه الله وبركاته...

أصدقائى وأحبائى وإخوانى فى نايل موتورز..

اللى قال مصر قبل 25 يناير غير مصر بعد 25 يناير كان بيتكلم صح.....

فعلا مصر اتغيرت....أتغيرت قوى.....

إستحملونى واعرفوا اللى حصل معايا وإحكموا بنفسكوا مصر اتغيرت ولالأ وللأحسن ولا للأسوأ ....

الموضوع بدأ يوم خميس وعاده بروح فيه من الشغل متأخر لكن سبحان الله اليوم ده رجعت بدرى..وطول الطريق مستغرب من كميه المبانى المخالفه والمون والطوب والرمل اللى فى كل حته لدرجه ان بعص ساكنى المساكن الشعبيه قاموا باستقطاع جزء كبير من الشارع ورموا اساس خرسانى لإضافه حجرتين او أكثر للمبنى الأصلى للبلوك..

وطبعا جه خاطر فى بالى ..طب لو صاحب البيت عمل كده عندنا هنعمل ايه؟

وجه الرد الفورى..لألألألألأ صاحب البيت عندنا راجل محترم وبيخاف ربنا مش هيستغل الظروف اللى احنا فيها ....

وصلت تحت البيت وركنت وفوجئت بالبيتين الملاصقين لبتيى يمين وشمال فيهم نشاط بيدل على انهم هيعلوا ادوار مخالفه جديده.....

يا خبر ابيض..!! ليه يعملوا كده؟!.. يا خبر!!!والله حرام...أطلع اتغدى بقى.. عملا بمبدأ جحا..طالما بعيد عن ....بيتى مليش دعوه...

يادوب غيرت ولبست هدوم البيت واسمع خناق على سلم البيت وحد بينده عليا...يا أشرف...يا أشرف...

دا صوت جارى.....

- خير يا فلان فى ايه؟

- تعالى ثانيه لو سمحت......

نزلت...

- خير؟!

- دلوقتى فلان (إبن صاحب البيت) جايب ونش وعاوز يطلع مون ويبنى على البيت دور او اتنين مخالفين والبيت قديم وميستحملش..وانا رايح اعملله محضر فى القسم..أيه رايك فى الكلام ده؟

- صلوا على النبى يا جماعه وخللونا نتكلم بالعقل...دلوقتى انت يا فلان عاوز تبنى..دا حقك..خد تصريح وانا اطلعلك الطوب على راسى من تحت..
- هو فى تصاريح دلوقتى..؟!
- أمال أنت ليه مصمم تبنى دلوقتى..عشان مخالف....صح؟

- البيت زى الحديد ويستحمل 10 ادوار كمان..

دخلنا فى جدل والصوت بقى عمال يعللى وابتدى الكلام اياه يطلع....

انا لو هصرف مليون جنيه على الدور ده هبنيه غصب عنكوا..وهيا كده عافيه...

جرب وطلع عامل بطوبه وانا انزلهولك من بير السلم...


الكلام بتاع الاونطه اللى كلنا عارفينه زى ما تيجى تتخانق مع واحد ويشاورلك بصباعه ويلوحلك رقبته ويتخن صوته ويقولك هخليك تندم ندم عمرك...هخليك تندم ندم عمرك..متزامنا مع هز صباعه لأعلى وأسفل ورقبته لجانب واحد ...

طب يا جماعه بعد إذنكم....

الفيصل هنا بتوع الحى نجيب مهندس من الحى ويحكم اذا كان البيت ينفع يبقى اتفضل ابنى زى ما انت عاوز ماشى؟

برضو هتتبنى هتتبنى...

كل ده كان عادى وحوار عادى ومشكله عاديه على شويه رغى كتير شويه.........أيه اللى حصل بعد كده..هقولهولكم المشاركه اللى بعد دى



بصراحه قولت احنا بقينا فى عهد جديد ولازم أكون إيجابى وأتحرك وبلاش السلبيه بتاعه زمان دى....

بدأنا نكلم الجيران واحد واحد عشان نروح الحى نعمل شكوى ونوقف الموضوع قبل ما يبقى امر واقع..

كل واحد كانت حجته جاهزه ..اللى عنده ميعاد وناس مستنياه واللى مسافر واللى رايح أسوان وحاجز القطر خلاص وهكذا..

طلعنا أول حاجه على الحى...

فوجئت إن الحى محروق تماما ومكسر والشبابيك الزجاج متكسر خلف الشبك الحديد ومفيش جوه ولا مكاتب ولا كمبيوترات ولا اى حاجه تتشاف....حتى العربيات النقل بتاعه عواميد النور اللى بيبقى فيها رافع هيدرولك محروقين قدام الحى...

أيه ده؟

طب والحى ماله ومال الثوره؟

وكلب مين اللى يروح يحرق الحى غير ناس عليها مخالفات وغرامات وحاجات عايزه تمحيها؟

طب الشرطه كانت فين والحى على بعد 300 متر من القسم؟!!

أه صحيح..دا القسم كمان إتحرق.....

يا فرج الله...عربيه نجده هناك اهيه وفيها 3 أمناء....وراها جرى.....

لغايه ما بقيت وراه بالظبط...

أكلكسله..أقلبله النور...اللى جنبى يشاورلهم بإيده ....ننده عليهم وده شافنى كانه شاف عفريت...

يجرى وانا أجرى وراه ويكسر يمين فى شمال وزى ما نكون احنا البوليس وبنطارد عربيه سارقه بنك...سيبته يجرى واستغربت ...الشرطه بقت تجرى من الشعب طب والله ..دى حاجه حلوه...

طب اروح فين ومفيش حد يوقف اللى بيحصل ده.....

الناس دى كانت من الذكاء انهم يبتدو الشغل الخميس عصرا لان الاحياء بيبقوا موظفين ومش هيرجعوا قبل السبت او الأحد كمان فى الظروف دى ولا فى شرطه ولا فى اى رقابه



احنا نطلع على وزاره الداخليه وهناك كما يتصرفوا......

طبعا عديت على ميدان التحرير.....

هو ايه اللى بيحصل ده؟


لاقيت ناس جميله نازله تتصور مع العساكر والدبابات وفرحانين ومعاهم اطفال وشباب بينظف وبيركب الحجاره اللى اتخلعت وبيدهنوا الرصيف وحاجه تفرح وناس تانيه بياعين ترمس وفشار وبطاطا وأعلام..علم مصر بخمسه جنيخ..بخمسه جنيه...بكره هتتحايلوا علينا ونقولكوا مفيش....البياع كان بينده ويقول كده....والشباب التانيه اللى احنا عارفينهم قامت ثوره ودنيا اختلفت ودول هما هما فى ميدان التحرير..

وصلت وزاره الداخليه يا اخوانى ومعايا خمسه من جيرانى...

تصوروا ان وزاره الداخليه بحالها مفيهاش ظابط واحد!!!!!!!

مفيهاش مسئول واحد؟!!!

مفيش الا قوه من الجيش بالمدرعات والدبابات لحراسه المبنى والظابط المرافق للقوه ملازم اول.....ومش هقول اسمه لكن هقول ربنا يباركله...

إستمع للشكوى ووجهنا لمعسكر الشرطه العسكريه الاقرب لسكنى واخدنا رقم موبايله....وتوجهنا لنقطه الشرطه العسكريه س1.....

رفضوا دخولنا المعسكر أصلا ووجهونا على القياده س55

توجهنا للقياده س55 وبالسؤال عن الظابط المسئول
أجابنا عسكرى الامن بعدم وجوده بالوحده وبالإلحاح حصلنا على رقم الهاتف المحمول للظابط المذكور..

وبعد أكثر من 10 مكالمات من هواتف مختلفه قام أخيرا بالرد على جارى...وبعد الشرح الستفيض للمشكله وخطوره الوضع بالمنطقه والتعديات على املاك الدوله والبناء العشوائى والمخالفات وكل الحاجات اللى تخليه يجيب دبابتين وييجى معانا...كان الجواب...طب انا جايلكم دلوقتى....


وبعد مرور حوالى ساعه انتظار فى الشارع
بدون اى علامات على الاهتمام بوجودنا ..

وجدت سياره ملاكى بها شخص تبدو من ملامحه انه شخصيه قياديه فى جهه ما ووجدت السياره تقترب من باب الوحده العسكريه وقام راكب السياره بتعريف نفسه لفرد الامن على انه اللواء فلان الفلانى....وفى انتظار السماح له بالدخول بسيارته الى الوحده العسكريه اقتربت من السياره وعرفت الراكب بنفسى الذى وجدت فى عينيه نظره ارتياب وخوف عندما اقتربت منه وبعد عرض اننا فى انتظار احد الظباط ليستمع لشكوانا بتوجيه من الظابط القائم على حراسه وزاره الداخليه أجاب بأنه سيبلغه وسيوصل رسالتنا لمن بالداخل...

لا أدرى لماذا وجدت فى طريقته انه لواء شرطه وليس لواء جيش ومما زادنى تأكيدا نظره القلق والتوتر عندما فاتحته الحديث وكون خمسه يقفوا خلفى...

وبتأخره بالداخل وارتباك عساكر الامن فى الرد ساورنا الشك فى وجود ظباط بالوحده يرفضوا او يتجاهلوا مقابلتنا....

وهنا وبعد شعورنا باليأس قررنا ان نتعامل من منطق الثوره ...الاعتصام امام باب الوحده ومنع اى فرد من الدخول او الخروج ومن ضمنهم لواء الملاكى....

فقمنا بسد باب الوحده بالسيارتين وجلسنا فى انتظار خروج اى مسئول...

ليخرج لنا عساكر امن الوحده فى مناشدات مستعطفه...يا جماعه كده احنا اللى هنتإذى..كده الظابط مش هيكلمكوا لكن هيبهدلنا احنا...

وكان ردى...

احنا عايزين الظابط ده او محدش خارج ولا داخل..معاكم سلاح..إضربونا بالنار..مش ماشييين......

بعد شويه باب الوحده اتفتح ...لنجد لواء الملاكى بسيارته ومن خلفه جيب عسكريه بها ظابط وثلاث او اربع عساكر بالسلاح....

ونجد هذا الشخص يتحدث الينا بالتالى..

أنا بلغتهم موضوعكم وهيبعتولكم قوه تخرج معاكم حالا ...يا ولاد انا راجل كبير ومش هكدب عليكم...أنتوا ولاد مصر وربنا يحميكم ويخليكم وياريت اشوف ولادى زيكم كده ....المهم اتسبتنا.....ووسعناله يخرج بالقوه اللى معاه....

وانتظرنا..محدش خرج..وكالعاده اتصاحبنا مع الامن اللى على الباب وتعاطفوا معانا جدا...

وبالسؤال عن اللواء ده فهمنا انه جاى ياخد حراسه لتامينه على اعتبار انه شخصيه عامه مثلا...حراسه لفيلته او منشأه عامه الله اعلم....

العساكر قالولنا من الاخر عليكما وعلى القياده اللى فى الخليفه المأمون......هما اللى يقدروا يدوا الامر لقوه بالتحرك الفعلى بدل المماطله وتضييع الوقت مع ناس فى انتظار رد الرؤساء

على فكره الجيش مش زى الشرطه

ظابط الشرطه يسخن يقوم واخدله اتنين عساكر وطالع معاك لكن ظابط الجيش...محترم جدا جدا فى التعامل ومبيتحركش الا بأمر رؤسائه

طلعت بجيرانى على القياده اللى فى الخليفه المأمون وقابلونا بإحترام جدا .....وطلبوا واحد مننا فقط اللى يدخل ويكلم الرائد المسئول..وبالفعل دخل أكبرنا سنا...

وهنا أذكر خروج لواء جيش تقدمه سيارتين جيب وخلفه سيارتين جيب..توقف بموكبه وفتح شباكه ومد يده ليصافحنا فردا فردا ويطلب مننا ان نتفضل بالجلوس فى الاستراحه وعدم الوقوف بالشارع بعد أن إطمئن ان احدنا بالداخل يعرض شكواه ووبخ العساكر على تركنا فى الشارع فى الجو البارد ..نسيت أقولكم إن الساعه كانت بقت 11 مساء وداخلين على حظر التجول....



دخلنا الاستراحه وبدأ يتوافد أناس أخرون بشكاوى مختلفه..ولن أبالغ بأن أقول إن ما سمعته من شكاوى لا تدل على اننا نعيش فراغا أمنيا بل على اننا نعيش حاله إنعدام أمنى بمعنى كل من تسول له نفسه فعل أى شئ ييستطيع فعلها الأن بدون أن يتوقع حساب او عقاب.....


هقولكم شكوى واحده مقدرتش امنع نفسى من الضحك عند سماعها فالشاكى خفيف الظل جدا وسرد شكواه بشكل اوقعنا من الضحك..

الشخص يملك بيت من 3 ادوار وبالدور الاخير غرفه على السطح يؤجرها لمستأجر...ويعمل سائق تاكسى....يعود لينام فيستيقظ فيذهب الى العمل وهكذا...يحكى فبقول...وفى يوم بينما أنا أجهز السياره وجدت شيئا غريبا...

البيت بقى اربع ادوار!!!

هو فى ايه؟؟؟؟؟؟

ليجد ان الساكن بتاع السطوح استكمل الدور وبناه فى يوم واحد وحوله لشقه بدور كامل بدلا من حجره.......


نرجع لموضوعنا.....

الرائد بالقياده أخبرنا انه مكتوف الايدى بدون إذن من النيابه العسكريه....فشعرنا بالإحباط...

فغدا الجمعه...وبحلول الفجر صاحب البيت هيكون بنا الدور بالفعل...خلاص يلا بينا على النيابه العسكريه....فى الحى العاشر....

هختصر الشويه دول فى سطرين...

النيابه رفضت شكاوى المدنيين الا فى ما بين 10 صباحا و 2 ظهرا ولم يقبلوا شكوانا الا عند التصريح بان المشكو فى حقه هارب من التجنيد ويحمل سلاح....وبعد عمل المحاضر أخبرونا ان نتوجه فى الصباح للقياده لنأخذ القوه اللازمه.....

روحنا وعرضنا العربيات بحيث ميقدرش صاحب البيت يدخل عربيات الرمل والاسمنت....


على الفجر...وجدت انذار عربيتى شغال....ويخلص ويشتغل تانى وابطله ويشتغل تانى وبفتح الشباك لاقيت واحد طويل عريض عمال يخبطللى على العربيه عشان تزمر والانذار يشتغل...

قولت ...باااااااس..هنزل اتخانق لانه كده جر شكل........انا ساكن فى خامس دور لبست الجاكت..وفتحت باب البيت المقفول بقفل وجنزير وكل ده والانزار بيضرب يعنى مصر كلها صحيت...لكن مفيش واحد فتح شباكه حتى ولا عمل اى اشاره انه صحى...كله واقف ورا الشبابيك مستنى يتفرج وده اللى اتأكدت منه تانى يوم...


الحوار بقى كالتالى..

ايه يعم انت ده حد يعمل كده؟

انت ايه اللى خلاك تحط عربيتك هنا...

يعنى ايه؟

مين جللك تحط عربيتك هنا؟

يعم انت عايز ايه دلوقتى؟

شيل عربيك يلا من هنا....

أشيل عربيتى..! هو ده اللى هيريحك....؟

بجوللك شيلها بدل ما أكسرهالك...أها...

لا حول ولا قوه الا بالله..طب بس اهدى بس..ملوش لازمه تعمل كده...

هنا بقى خلص الكلام لانه سبنى ومشى...شغل جنان مش كده؟

طبعا من الفجر على القياده

الظابط نايم

يصحى بالسلامه

الظابط بيصللى الجمعه

تقبل الله

الظابط بيتغدى

بالهنا والشفا

الساعه بقت كام 4العصر.....على ما جه دورنا ودخلناله

شرحناله عملنا ايه وقلنا حضراتكم تيجوا بكره بدرى نطله معاكم قوه

الف شكر يا فندم ربنا يخليكوا لينا

كان ناقص نهتف..الشعب والجيش ..إيد واحده

تانى يوم السبت..إعتذرت انا بقى وسبت الباقيين يروحوا يجيبوا القوه....

وبتصل لاقيت مفاجأه..

النيابه العسكريه مبعتتش التأشيره فمش هيقدروا يبعتوا حاجه..طبعا الناس جريت على النيابه...وخدوا المفاجأه الموضوع اتحول للنيابه العامه لعدم الاختصاص....

يتبع على طول ان شاء الله