المشاركة الأصلية كتبت بواسطة itsonlyme
في اختلاف في وجهات النظر حول استمرار المظاهرات والاعتصامات والضغط لتحقيق المطالب.
أنا هنا بتكلم عن المظاهرات والاعتصام بتاع ميدان التحرير ... مش المظاهرات الفئوية.
البعض يرى التهدئة وترك فرصة للمجلس العسكري لتحقيق وعوده.
والبعض انه لا مجال للتهدئة ويجب الاستمرار في الضغط.
أنا مع الفريق الثاني بصراحة.
المشكلة ان الفريق الأول شايف الفريق الثاني مخربيين وهيودوا البلد في داهية.
والفريق التاني شايف الفريق الأولاني متخاذل أو همه على بطنة أو حتى مستفيد من الفساد.
طيب العنوان، ايه علاقة القذافي باللي احنا فيه؟
كتير من الثورات بتقلب فاشية. يعني تسلط قادة الثورة وانفرادهم بالسلطة واقصاء الآخرين وبتقلب بدكتاتورية.
القذافي كان فاكر نفسه قائد ثورة من 40 سنة ,,, وكاسترو في كوبا قاد ثورة وفضل ماسك في الحكم سنين طويلة
الحمد لله ثورة 25 يناير ملهاش قائد ... ومفيش حد يقدر يدعي انه قائد الثورة.
وعشان كده مش عايزين احزاب باسم الثورة.
المهم، مكدبش عليكم ... سعات بحس بأني هقلب فاشي لما اسمع معارضين استمرار الثورة.
بحس ان في ناس قصيرة النظر للغاية. ناس بتتكلم عن تدهور الاقتصاد وغياب الأمن دلوقتي ومش مقتنعين ان ده وضع مؤقت ولو صبرنا هيبقى افضل لينا على المستوى البعيد.
نتكلم عن الاقتصاد الأول. احنا لو نجحنا تماما في القضاء على الفساد واستطعنا التحول للديمقراطية بجد الاقتصاد هينمو بمعدلات خيالية والاستثمارات الأجنبية هتزيد بشكل كبير جداً في مصر.
الديمقراطية والشفافية وتكافئ فرص المستثمرين دايما بتجذب الاستثمارات ... صحيح الديكتاتوريات ساعات بتنجح في جذب بعض الاسثمارات عن طريق اعطاء امتيازات لمستثمر دون الآخر ... بس طبعا كله في مقابل رشاوي أو المشاركة في الأرباح. وفي أي لحظة الدكتاتور يقلب على المستثمر ويستولى على استثماراته.
طيب ما الناس بتاعة "اهدوا بقى" هتقول لك ما احنا أهو ماشيين في الطريق الصحيح، اهمدوا وبطلوا مظاهرات عشان الاستثمارات تيجي زي ما أنت بتقول.
الرد: هو احنا قضينا على الفساد خلاص؟ مش في كتير من رجال الأعمال والمسؤولين الفاسدين نفسهم الدنيا تهدى بسرعة عشان مايتحاسبوش؟ وازاي نسيب معظم المسؤولين في أماكنهم وتقول لي نهدى؟
المحافظين ورؤساء الأحياء دول مش كانوا بياخدوا رشاوي من الشركات عشان مشروعات تسري عليهم. مش كلنا بنشوف شوارع بتتكسر وتتعمل المجاري وبعدين تتسفلت وبعدين تتعمل الكهرباء؟
رؤساء البنوك الأهلية اللي كانوا بيدوا قروض بالمليارات لأصحاب جمال مش لسة في أماكنهم؟
كل مؤسسات الدولة مليانة فاسدين ولسة في أماكنهم. سيبك من الكام وزير اللي بيتحاكموا ... في مئات بل الآلاف غيرهم في كل حتة في مصر.
فين بقى القضاء على الفساد؟ ... وليه الاستثمارات الأجنبية تزيد اذا احنا لسه عندنا فساد؟
نتكلم عن الأمن:
هي المظاهرات في التحرير هي اللي مخلية الشرطة يا عيني خايفة ومش عارفة تنزل تظبط الأمن في الشارع؟
جهاز الشرطة الفاسد بيعمل حاجتين ... أولاً بيعاقبنا عشان اللي حصل يوم 28 يناير ... ثانياً عايز يوصل الناس انها تبوس ايده عشان يرجع الأمن من غير ما يتحاسب على جرائمة قبل الثورة وأثناءها ومن غير ما يفقد سلطته.
أقسم بالله العظيم الشرطة لو عايزة ترجع بكل قوتها من بكرة هترجع.
اللي بيحصل ان بواقي النظام (هي مش بواقي ولا حاجة ... رأس النظام وشوية رموز هي اللي اتشالت وجذور النظام المتشعبة لسه موجودة في كل مكان) عايز يوقعنا في بعض. عايز الناس تكره المعتصمين والمتظاهرين في ميدان التحرير وتلومهم على كل مصائب البلد.
لو قعدنا في بيوتنا أقول لكم ايه اللي هيحصل. كل الفاسدين ما عدا اللي ريحتهم فاحت قوي هيفضلوا في أماكنهم.
السرقة ونهب فلوس البلد هتبقى بالمداري وبحجم أقل. يعني هيهدوا اللعب شوية.
مع الوقت الظروف الاقتصادية هتتحسن بس انسى اننا نشوف طفرة في الاقتصاد وجميع مناحي الحياة.
الشوراع الرئيسية هتنضف بس الشوارع الجانبية هتفضل زي ما هي.
البلد هتتحسن بس انسى اننا نبقى زي ماليزيا أو سنغافورة.
ويفضل النظام السابق موجود بالصف الثاني بتاعه وشوية وجوه جديدة.
من الآخر مش هنحس بالمليارات اللي اتنهبت ... مش هيبقى فيه مشاريع ضخمة جديدة زي ممر التنمية ... مش هنعيش في مدن جديدة نظيفة مربوطة بقطار كهربائي سريع. هنفضل قاعدين في الوادي زي ما احنا.
اصبروا ... اضغطوا عشان محدش يتضحك علينا ويرملنا كام عضمة.
ماتخلوش الحزب الواطي يرجع تاني باسم جديد وشوية كلام معسول.
ماتخلوش شفيق تلميذ مبارك وصديقه المقرب يفضل في رئاسة الوزارء ويلمع نفسه في الكام شهر اللي جايين بعدين يستقيل وتيرشح للرئاسة. ساعتها كأنك يابو سيد ما غزيت.
ماتخلوش الثوار يقلبوا فاشيين. خليكوا كلكم ايد واحدة. والله العظيم بيضحكوا علينا ويوقعونا في بعض لأنهم خايفيين على أماكنهم.
الى الأمام ... الى الأمام ... ثورة ... ثورة ... ثورة
بس ثورة بجد مش زي السفيه القذافي.
