الموضوع: قطمة أم الدركسيون!!!

السلام عليكم ورحمة الله..

الموضوع ده عملته في قسم الورشة و لم اجد من عنده خبرة في الباسات فقلت أكرره هنا في عقر دار الباسات أكيد حد مر عليه الموضوع ده قبل كده...

عندي مشكلة و أرجو المساعدة و النصح بأمانة لأن السيارة ملك اخي وهو سافر و تركها معي لأبيعها له..
السيارة: فولكس باسات 2006 مانيوال
المشكلة: السيارة مفتاحها "كارت" أو "سمارت كي" من النوع اللي بتدخله في الفتحة وتضغط عليه وتدوس دبرياج فتقوم السيارة تدور..
المشكلة ان السيارة لا تستجيب إلا بعد عشر محاولات على الأقل و أصبح العادي بتاعها اني أدخل المفتاح وأضغط فالأنوار اللي في التابلوه كلها تنطفي ولا تستجيب فأخرج المفتاح و أعيد المحاولة مرات كثيرة الى أن تظهر رسالة (اضغط دبرياج) و اخيراً تدور السيارة!!

نفس المشكلة حصلت من فترة مع أخي قبل أن يسافر و التوكيل منه لله طلب 12 ألف جنيه..
هو راح لواحد في الحرفيين و غير حاجة اسمها "قطمة الدريكسيون" ب3 آلاف جنيه (وهي عبارة عن عمود حديد فيه مفصلات و معاه كنترول علبة بلاستيك سودا) و القديم عندي في البيت!!
بعد العملية دي العربية بقت فلة لمدة اسبوعين وبعدين بدأت تستهبل بس مش لدرجة عشر مرات.. كانت بتدور من تاني أو تالت مرة وساعات من أول مرة... كلمنا الراجل اللي صلحها قال ده كتاوت وغير اتنين كتاوت ب300 جنيه !!!
والعربية بقت زي الفل و أخويا سافر وسابها لي أبيعها ...
ثم اندلعت الثورة :) !!!!!
والعربية فضلت راكنة طول الفترة دي بس بدورها كل يومين علشان البطارية متنامش...

مؤخراً الحالة رجعت بعنف تاني وبقت زي ما شرحت لحضراتكم كده
والراجل اللي عملها (منه لله) مبيردش على التليفون وما اعرفش طريقه!!!

المأساة بقى انها أصلا سعرها واقع رغم ان حالتها ممتازة و مش مستحملة خسارة ولو صلحتها ب12 ألف في التوكيل يبقى حتتباع أرخص من الكوري و ده والله حرام دي ألماني و8 ايرباج و abs ومثبت سرعة و جنوط وكراسي كهرباء ودلع على الآخر....

المطلوب:
انصحوني أعمل إيه.. أصلحها فين بالمعقول ومن غير ما ترجع تاني بعد شهر علشان لا أكون غشيت اللي حيشتريها لأنها لو باظت منه بعد شهر مش معقول حيرجعلي بيها أصلحهاله... وبعدين هي كده صرفت كتيييييير وخسرت من تمنها في اربع سنين 100,000 جنيه !!!!! حرااااام والله...
صدقت أمي اللي دايماً تقول: (أنا بكره التكنولوجيا) !!! كان ماله أم المفتاح العادي؟؟؟

المشاركة الأصلية كتبت بواسطة ashoub

شوف يباشا روح لرشاد فى الحرفيين ده بصراحه اكتر كهربائى شوفتو فاهم فى العربيات ده شوف هيقولك ايه مش هتخصر حاجه وخد معاك الجزء القديم احتياطى وربنا يوفقك ممكن تكون سلك معلق او حاجه مهزوزه او فيشه الكونترول شوف هيقولك ايه وياريت تقولنا المشكله اتحلت ازاى

معلش .. فين رشاد ده؟؟ أروحله ازاي؟