الإنتخابات (لازم تسجلوا إسمكم)

**enas75** · 02-03-2011 03:18 PM

انا رحت القسم النهارده وسجلت اسمي ولما سالت ايه لازمتها قالو عمليه تنظيميه
ايوه حننتخب ببطاقه الرقم القومي ولكن لازم اسمك يتسجل في الكشوف علشان يرتبو اللجان الانتخابيه
يعني كل واحد يعرف مكان لجنته ......
ومعندهمش اي معلومات غير كده
واخر ميعاد 8 مارس.....ومواليد1987 وبعدها متسجلين في الكشوفات
ودي اصلا علشان مجلس الشعب لازم كل واحد جويه دايرته مينفعش تبقي من مكان وتنتخب واحد في مكان تاني

**korkor** · 02-03-2011 03:23 PM

انا روحت القسم النهارده وسجلت مش عارف بقى الصح فين بس بيتهيالى الناس كلها تروح تسجل الموضوع مش بياخد اكتر من 5 دقايق

**mesaharaty** · 02-03-2011 03:34 PM

طيب هل تسجيل الإسم ده ليه علاقة بالبطاقة الإنتخابية ؟ يعنى بيطلع لك بطاقة بعد ما تسجل إسمك ؟

اللى فهمته من الموضوع إن تسجيل الإسم هو عملية تنظيم للأسماء اللى فى كل منطقة أو دائرة . وبناء عليه - كما فهمت - فإن الإنتخاب سيكون بالرقم القومى بعد مطابقته بالسجلات اللى حيتسجل فيها اسمك ضمن المنطقة أو الدائرة .
طيب ليه العذاب ده ؟ أمال فين التكنولوجيا والبيانات المتسجلة والقرع ده كله
حد فاهم حاجة

**yoko** · 02-03-2011 03:36 PM

المشاركة الأصلية كتبت بواسطة mesaharaty

طيب هل تسجيل الإسم ده ليه علاقة بالبطاقة الإنتخابية ؟ يعنى بيطلع لك بطاقة بعد ما تسجل إسمك ؟

اللى فهمته من الموضوع إن تسجيل الإسم هو عملية تنظيم للأسماء اللى فى كل منطقة أو دائرة . وبناء عليه - كما فهمت - فإن الإنتخاب سيكون بالرقم القومى بعد مطابقته بالسجلات اللى حيتسجل فيها اسمك ضمن المنطقة أو الدائرة .
طيب ليه العذاب ده ؟ أمال فين التكنولوجيا والبيانات المتسجلة والقرع ده كله
حد فاهم حاجة

هي نفس الإجرائات بس مش هتستلم بطاقة

وتنظيميه ليس إلا

**gebreel** · 02-03-2011 03:42 PM

طيب انا 89 و مواليد برة مصر ايه النظام

**mesaharaty** · 02-03-2011 03:43 PM

طيب نروح بكرة بقى نسجل على طول قبل ما يجى علينا 8 مارس إن عشنا بإذن الله

hh · 02-03-2011 03:47 PM

فيه تضارب في الأخبار بالنسبة للموضوع ده. رأيي اننا لازم احتياطي نسجل أسامينا لأن المرة دي الأنتخابات مهمة جدا و لازم كلنا نشارك.

أنا روحت القسم سجلت أسمي النهاردة مخدتش 10 دقايق. يا ريت الناس تروح و متكسلش مش حنخسر حاجة.

و على فكرة مطلبوش مني غير صورة البطاقة, مع اني كنت واخدة صورة شهادة الميلاد اللي بالرقم القومي بس مرضيوش ياخدوها و قالولي عايزين صورة البطاقة بس.