المشاركة الأصلية كتبت بواسطة jisso82
لا حول ولا قوة إلا بالله أنا فاهم نوعين للناس المؤيدة دى بس مشكلتى فى النوع التالت و الرابع يا ريت آرائكم:
1- طبعا الفاسدين المستفيدين من الوضع و ووجود نظام مبارك فى الدولة
2- أصحاب الواسطة و الكوسة اللى وصلوا لدرجة لا يمكن إماكنياتهم الطبيعية كانت هتوصلهم لها لولا المحسوبية فمعترفين بالجميل للنظام اللى وصلهم للى هما فيه
3- الغلابة اللى كانوا بالكاد بيلاقوا لقمة العيش و دلوقتى مش لاقيينها خالص فبيقارنوا بين الوضعين بأفق ضيق و وصلوا لمرحلة رضا أصلا مش عارفين منها إن ممكن يكون فى وضع أحسن ليهم (ودول معذورين)
4- الشرفاء المرفهين اللى ما قابلوش مشكلة واحدة من النظام و الحمد لله ربنا يباركلهم فى دخلهم اللى مخليهم مش حاسين بباقى الناس و شايفين إن الوضع كده عادل جدا و إن كل واحد بياخد مقابل إمكانياته و إن اللى احنا فيه ده أحسن من بلاد تانية كتير و إن حقنا الطبيعى لما نوصله نحمد ربنا (و دول للأسف أعرف منهم كتير منهم خالى نفسه و إبنه الصغير و أحد أفضل أصدقائى فى الكلية و لولا إنى متأكد من إنهم ماعندهمش ولاء لحزب أو هدف سياسى ما كنتش عرفت أصنفهم بس للأسف لما راجعت حياتهم و مواقفهم القديمة تجاه المصايب و الكوارث اللى بتحصل كنت بحس إن أنا اللى مغيب إنى مستغربهم يعنى لما
- واحد منهم يقارن حادثة العبارة بإعصار تسونامى و يقول إن الحوادث تقع و الناس بتموت و إن دى إرادة ربنا فى الحالتين هترد تقول إيه؟
- و لما الواحد يقولهم لما البنزين غلى أول مرة من 1 جنيه ل 1.3 إزاى الحكومة تزوده فجأة 30% و يردوا يقولوا إن البنزين بقاله 10 سنين ما غليش و لو حسبتها بالعقل يبقى 30 قرش على 10 سنين يعنى بيغلى فى السنة 3 قروش اللى هما 3 فى المئة يعنى أقل من أقل نسبة تضخم أو غلاء فى العالم
3-و لما يقولك البواب بتاعنا دماغه جزمة مصمم يخللى ابنه يكمل تعليمه و يكع فى دروس ثانوية عامة على إيه المفروض إن ابن البواب يطلع بواب برده ما هو أكيد عمره ما هيفلح و لو كان هيفلح كان أبوه فلح من الأول و بيستخسروا فيه حتى إنه يحلم إن ابنه يبقى أحسن منه حد يقوللى ممكن نرد على الناس دى نقولها إيه
و اللى يقوللى انت معاك عربية و عندك شقة و هتتجوز بفضل السيد الرئيس ترد تقوله إيه؟ و أنا ماعنديش شقة و هاخد شقة والدى و هو هيقعد مع والدتى فى شقة جدتى المؤجرة إيجار قديم و ممكن يطردوا منها فى أى وقت و هيخاطروا عشانى و العربية اللى لما جبتها خدت كل الكاش اللى معانا و هتجوز بعد سنتين كاملين إذا أراد ربنا بسببها