الموضوع: بهدوء و نقطة نقطة

4- ما يحدث في ميدان التحرير هو دكتاتورية صرفة و هم يخونون كل من هو ليس منهم
اولا : دكتاتورية صرفة
------------------------
ليه ؟ طب ما على كده يبقى الاطاحة بمبارك كانت دكتاتورية هي كمان , ما ازلامه ايامها قالوا كده !!!
دي ناس بتطلب طلب معين , و كل ما كتروا كل ما كان الطلب ده له ثقل و بقى له وزن و بقى فيه احتمال انه يتنفذ , و ده منطقي
هل الدكتاتورية ان ناس تتجمع عشان تطلب حاجة معينة فيها خير البلد , ولا الدكتاتورية ان المجموعة دي يطلع عليهم البلطجية بالسلاح زي ما شفنا في يوم موقعة الجمل ؟

ثانيا : يخونون كل من هو ليس معهم
-----------------------------------
ماحدش يقدر ينكر ان فيه مأجورين و منتفعين كتير , اظن ان الكل معترف بالموضوع ده ماعدا المأجورين أنفسهم , فمنطقيا اللي بيقول خونة و مأجورين بيتكلم على دول مش على واحد صدقهم , بس المأجورين دول يحبوا جدا يقولوا ان الثوار بيخونوا الأخرين عشان كل اللي صدقهم مرة يبعد عن الثوار نفسيا لأنه هاييجي في باله انهم بيخونوه, عشان كده هاتلاقي المجموعات دي ما بتصدق ان يتقال عليهم عملا عشان يعمموها على كل اللي متخوف من الثورة و يفضلوا يعيدوا و يزيدوا في النقطة دي , لأنهم يهمهم انهم يوقعوا الثوار في الغلط , طول عمر نظام مبارك شغال على تشويه معارضيه و ياما سمعنا حاجات و صدقناها و طلعت اكاذيب

5- الجماعة اللي في التحرير دي فئة من الشعب بتحاول تفرض ارادتها على باقي الشعب
نسأل سؤال الأول و بعدين نكمل , هل الجماعة دي طلبت حاجة مافيهاش الخير للشعب ؟ اظن احنا اثبتنا ان كل الطلبات دي فيها الخير لشرفاء الشعب و مافيهاش حاجة هاتضر اي انسان شريف في البلد , حتى الناس اللي لهم ايديولوجيات ماحدش فيهم حاول طرحها في الميدان , و كل ذو شرف عارف كويس اوي ان الوقت مش وقت ايديولوجيات
يبقى كده نوايا الفئة دي خير و الفئة دي مش بتطالب بحاجة لصالحها الشخصي و انما هي بتطالب بحاجات فيها الخير للشعب كله
السؤال اللي بعده , هل الفئة دي فئة منظمة ؟ حزب بعينه او ما شابه ؟ كل حركات المعارضة و الاحزاب اعدادها اقل من كده بكتير , فئة قليلة ؟ طب زادوا ازاي ؟ زادوا بكل واحد مقتنع بالمطالب دي , يعني العدد اللي موجود ده مفروض انه قوة المطلب و ده اللي لازم نفكر فيه , مش اي حاجة من الجدليات دي , كمان الفئة دي لما تبقى قليلة ماحدش هايسأل فيها و هايتم ابادتها فعليا و الواقع بقى ان كل التخويف و الحاجات اللي بتحصل دي هدفها تقليل الفئة دي

و اديك شايف ياللي بتقرا دلوقت ان الفئة التانية المقابلة (في مصطفى محمود ) هي نفس الفئة اللي كانت بتطالب ببقاء مبارك حتى من قبل ما يعلن انه مش هايرشح نفسه تاني و كلهم بيحلفوا بحياته لحد دلوقت و بيطالبوا بعدم المساس بيه
دول الفئتين الموجودين , فئة لها مطالب فيها خير للشعب زي ما اتفقنا , و فئة تانية هي بتاعة مبارك من اول يوم , و كل اللي بيطالبوا بيه اشخاص و مقضيينها بالروح بالدم , مش مكاسب للشعب خالص