الموضوع: اسف يا ريس مصر الاخير

المشاركة الأصلية كتبت بواسطة aly_hosny

تحفة بجد
حضرتك ال كاتبه ؟؟؟؟

شكرا لمرور حضرتك
وانا فعلا اللى كاتب القصيدة بعد ما قريت هنا فى المنتدى اراء بعض الناس المؤيدة للريس السابق والمرض العضال المزمن حسنى مبارك ودفاعهم عنه رغم كل بلاويه وكأننا شعب طيب يعشق حتى جلاديه ؟؟؟؟

جميلة جدا
(متعصب ضد الناس اللي صعب عليهم اللي هوه فيه)

المشاركة الأصلية كتبت بواسطة zyadahmed

اسف يا ريس مصر الاخير
ازاى قلبى خانى وطاوعت الضمير
اسف لانى نزلت و ما خوفتش
ونمت معاهم فى ميدان التحرير

ازاى ما صبرتش ست اشهر كمان
وايش دول يكونوا فى كل اللى كان
ما كنت يا ريس سيبتك فى وطنك
معزز مكرم وشعبك مهان

اسف حقيقى لانى عشقت المحال
فكرت فى بكرة اللى جاى للعيال
كان فيها ايه لو عاشوا عبيدك
وعبيد حبيبك وابنك جمال

سامحنى يا ريس يا جدى مبارك
لانى شاركت فى كل اللى جالك
زايدة ومرارة وحسرة وخسارة
سلامتك ياريس وسلامة طحالك

توقيع زياد احمد

علل
هل تقصد بهذة الكلمة
جدى يعنى ابو الوالد
ولا جدى يعنى جوز العنزة
لان فالحقيقة الاتنين يليقوا عليه خصوصا ان العنزة تليق على زوجة الجدى :)
مع الاعتذار لمعشر الحيوانات

اللى انا فهمته ان القصيده سخريه من اللى عمله مبارك طول فتره الحكم :)

بس ممتازه

المشاركة الأصلية كتبت بواسطة tarek gen 2

علل
هل تقصد بهذة الكلمة
جدى يعنى ابو الوالد
ولا جدى يعنى جوز العنزة
لان فالحقيقة الاتنين يليقوا عليه خصوصا ان العنزة تليق على زوجة الجدى :)
مع الاعتذار لمعشر الحيوانات

لا الحقيقة ما قصدتش المعنى التانى خالص هههههههههه
لكن المقصود انه راجل كبير قد جدى ولازم يرتاح لانه لا يستطيع ادارة البلاد فى مثل سنه ولا حالته الصحية جدى لما كان اصغر منه بعشر سنين كنا بنسنده ونراعيه مش هو يراعينا ويسهر علينا ههههههههه

وهو استنكار لتمسكه بتوريث السلطة لابنه جيمى
واوعى بقى تفهم انى أأقصد بكلمة ( جيمى ) كلب ساعاتها بقى يبقى انت نيتك مش حلوة هههههههههههههه
وشكرا لمرورك

فيها نوع من التأثر بقصيدة أحمد فؤاد نجم (سلامة مرارتك)

سلامة مرارتك
يا فاقع مرارة مراة الفقير
فلا جوزها جايب
ولا الفقر تايب
ولا حتي سايب
مَيَّة في قُلة
ولا كوز في زير
سلامة مرارتك
سلامة مرارتك

مرارة العُـزاز
وإيه يعني إحنا
ما نِوْلع بجاز
إنتَ الحقيقة وإحنا المجاز
تفضلْ وييجي بدالنا البديل
شوية خباثة
وعوامل وراثة
نصبح بهايم ... ونصبح بديل
فتقدر ساعتها تنام مَلو عينك
ويعلى الشخير
سلامة مرارتك
سلامة مرارتك
سلامة المرارة
يا واقع علينا بسعر الخسارة
فلا فيه صناعة
ولا فيه تجارة
ولا فيه مدير
ولا فيه إدارة
ولا فيه وزارة تسيب الوزير
سلامة مرارتك
....*
سلامة مرارتك
فداها المواطن
أبو قلب راطن كلام الهموم
فلا نفس راضية
ولا جتة فاضية
بلاوي وسموم
ولا علاج مداوي
مفيش غير حكاوي
بتاخد بإيدنا لآخر المصير
سلامة مرارتك
....*
سلامة مرارتك
وألفين سلامة
يا سايب في كل المنازل علامة
شمالك بتاخد ...
وواخدة اليمين
شكلك بتحلف علينا اليمين
ما تجعل في جيبنا قليل أو كتير
سلامة مرارتك
سلامة مرارتك


دي واخدة الحصانة
بنشقى وتاكل علينا شقانا
لا خلِّيت أمامنا ولا فيه ورانا
ضرايب ... عوايد ... فاتورة ... رسوم
ننام بالفاتورة
وبيها نقوم
على البصَّة ندفع فاتورة لعِنينا
ولو نعمى ندفع فاتورة ضرير
سلامة مرارتك

سلامة مرارتك يا صاحب الهمم
بخطبة بنطلع لأعلى قمم
وننزل على جدورنا بين الرمم
على الوهم ياما وياما بنينا
أوامر تجيبنا
أوامر تجينا
على خطوة واحدة في محلك نسير
سلامة مرارتك
سلامة مرارتك
إحنا فداها
تفرقع مرارتك
نفرقع وراها
حالنا بدونك عمره ما ماشي
إحنا بدونك شوية مواشي
من غير راعيها ... ومن غير كبير
سلامة مرارتك