مشكله الخناقه بين الأعضاء وحلها
السلام عليكم جميعا
بقالنا أسبوعين أو أكتر فى خناقات ... ومحدش يقول ما بتحصلش لأن اللى ماسك بعض الأعضاء عن أكتر من كده هو أحترامهم للمنتدى
وأتهامات بالخيانه وتبعية الحزب الوطنى والأليكترونيه ( اللى مش فاهمها )
وبصراحه ده مش وقته خالص لسبب بسيط
المجموعه اللى طالبه أو بتؤيد مطالب من واحد لغاية مليون ...... طلباتكم مشروعه ولا لأ
أه مشروعه
المجموعه اللى معترضه على كتر الطلبات ........ شايفين الطلبات دى مشروعه
أه مشروعه
طب الخلاف ليه
المجموعه الرافضه بتقول أن المظاهرات وبعض الأعتصامات مش فى صالح البلد
لكن عايزين كل المطالب تتحقق
أه عايزينها وأكتر منها كمان بس ندى فرصه للمسئول أنه يتصرف ونتابعهم
طب المجموعه المؤيده ليه مش عايزين تدوا فرصه ومستعجلين
لأن فيه خوف من ضياع المطالب وخوف من الألتفاف على الثوره وما شابه ذلك لأن مش كل يوم هنعمل ثوره
يعنى الخلاصه أن المجموعتين متفقين فى المطالب بس مختلفين فى أسلوب تحقيقها
حد مش معايا فى كده
اللى مش معايا فى أن المجموعتين متفقين على كل المطالب ( بغض النظر عن توقيتات تنفيذها ) يبقى هو ده ( من وجهة نظرى ) المجموعه التالته اللى تستحق الخناق معاها من المجموعتين
يا جماعه بلاش نختلف كل شويه وأحنا أصلا متفقين على الأساس
عايزين مبدأ أنا وأخويا وكمان أبن عمى على الغريب
الغريب اللى من مصلحته نكون دايما مختلفين وبنتخانق سواء كان خارجى أو داخلى
النظام السابق حاول يفرقنا بضرب المسلمين فى المسيحيين وشوفو المواضيع اللى أتكتبت بعد حادثة كنيسه القديسين واللى حصل فيها
دلوقت بعد ما فهمنا الحقيقه رأينا أيه فى الكلام اللى كتبناه فى المواضيع دى
طب أحنا الحمد لله أولا وقبل كل شئ فهمنا الفتنه من غير ما يحصل مصيبه فى البلد
مش عايزين المصيبه بتاعة الفتنه الحاليه تحصل قبل ما نفهمها لأننا مش هنعرف نلمها ساعتها
كلكم تعرفوا بعض وأتقابلتوا مع بعض واللى جديد هيعرف الباقى ويتقابل معاه
لازم نثق فى بعض وأن مهما حصل من أختلاف فى الرأى فكلنا بنحترم بعض وعارفين أن كل واحد فينا خايف على البلد دى زى التانى برضه بس بتفاوت لكن المحصله واحده
موضوع المطالب خلصنا منه أن بعد المده الطويله دى كل واحد مقتنع برأيه
طب خلاص
نتكلم فى مواضيع تانيه أهم برضه
نجمع أفكار للمرحله الجايه ونناقشها ونجمع اللى أتفقنا عليه
وممكن المنتدى يبعتها بأسمه لصفحة المجلس الأعلى أو صفحة مجلس الوزراء أو صفحة رئيس الوزراء ( سمعت أنه عامل صفحه ) فى صورة طلب أو بيان أو رجاء أو أى مسمى
يبقى عملنا حاجه مفيده
لو خدوا بيها يبقى كسبنا
لو ما خدوش بيها يبقى عملنا حاجه مفيده ونقول عندهم أفكار أحسن
بس على الأقل نحس أننا أيجابيين فى البلد
بدل ما كلامنا يكون موجه لبعضنا وبس
لو كلامى مش صح مش مشكله أرموه بعيد
ومش شرط كل اللى أقوله أو أعمله يكون صح ومش عيب يطلع رأئى مش صح
بس على الأقل أحساسى أنى عملت شئ أيجابى
وزى ما قولت قبل كده أنا مصرى ورافض للهمجيه وخايف على البلد
بقول
أنا مصرى وأيجابى وبحب البلد
مع خالص تحياتى
م/عمرو شرف