الموضوع: من ارض معركه الدقي أحكي.. شهادة شاهد عيان

اولا لازم اقول ان النهارده اول يوم اكون فيه ف الشارع بعد حلول الظلام من يوم 28 يناير..كنت انا ومروه ومنى ورضوى وماماتي العزيزه..بما اني قلوقه طلبت كلنا نمشي سوا نروح مروه الاول المنيل ونرجع سوا ع المهندسين واهو البركه ف اللمه..كنا ف جامع اسد بن الفرات ف شارع التحرير وجينا ندخل على شارع الدقي لقيناه زحمه فقررنا نزوغ من ميدان المساحه ومنه على شارع الجيزه ثم كوبري الجامعه (كانوا فاضيين لا فيهم متظاهرين ولا حاجه)راجعين من المنيل ومنى ف مقعد القياده وماما جنبها وانا ورضوى ع الكنبه ورا ورضوى بتلومني على قلقي وبتقول لي شايفه الدنيا هاديه ازاي ولسه داخلين شارع الدقي والمح دبابه عند ناصيه شارع المدرسه الالمانيه وجنبيها جنود امن مركزي!وصرخت ف سخط هما ولاد الكلب ناويين يحتلوا المنطقه؟(اقصد طبعا امن الدوله وفرعهم بتاع جابر بن حيان)منى ترد وتقول لي دول قالوا ع الفيس هيعملوا مظاهره فعلا هنا..ببص لقيت ناس قصاد الجنود اللي قافلين مداخل الشوارع .الناس واقفه عادي سلميه ولسه بقول انا هصورهم ولقينا بلطجيه بيرموا نفسهم ع العربيه!!معاهم طوب وازايز وسكاكين..بيكسروا العربيات وبيرموا المتظاهرين المسالمين الواقفين ع الجهه الاخرى بطوب..وبيجروا ويوقفوا العربيات النازله من كوبري الدقي ف اتجاه شارع الدقي وبيتنظموا عشان يوقفوا اتجاه الصاعد كمان..منى داست بنزين فجريوا من قصادنا وللاسف كسروا العربيه اللي ورانا..منى رمت شنطتها لينا وقالت بسرعه طلعوا المطواه والسبراي وساقت وكانها شوماخر او ضابط مخابرات محترف..لمحت بعيني شباب الدفاع واقفين على مداخل الشوارع المؤديه للمساحه بيحموها من البلطجيه عشان ميدخلوش..اتصلت بصديقات اطلب منهم يتصلوا بالجيش ومديريه الأمن عشان لو احنا ربنا انقذنا فيه غيرنا كتير محجوزين وخايفين..عربيات كتيره فيها نساء واطفال!!المهم اتقال دول متظاهرين(الرد لا دول بلطجيه المتظاهرين كانوا امام الجنود وكان بيتم ضربهم من المجرمين دول).اتقال لي اللي معاهم سكاكين دول دفاع شعبي(لا يا جماعه اللجان كانت واقفه بتحمي نواصي الشوارع والوشوش عارفاها من ايام ما كنت بنزل الصبح بدري المستشفى)..روحت ولقيت أخبار عن اللي حصل ف مباني امن الدوله ف اسكندريه وف مدينه نصر..الان فهمتهم:))) كل ده مخطط واحد زي كده يوم الجمعه 28 يناير..لما لقوا وجدي ماشي قال لك نخربها ونحرقها..كانوا مطمنين والنهارده قلقوا..أهم حاجه ان اللي بيكسروا وبيؤذوا مش من شباب التحرير..شهاده اتحاسب عنها يوم القيامه..واصرار على الخلاص من جهاز امن الدوله الفاسد..لو فاكرين هتخوفونا او هنفقد ثقتنا ف شبابنا مش هيحصل..صحيح كانت صدمه واحساس كأننا مش ف بلدنا اللي كنا بنروح 3 صباحا امنين وحصل لنا ده الساعه عشره مساء اللي كنا احيانا بنبدا نفكر نخرج ف الوقت ده..حزن على حال البلد انما مش خوف منكو ومش هنقول سامحونا ورجعولنا الامن..خلاص عرفنا مين بيحرك المجرمين وبيربي البلطجيه..خلاص يوم خلاصنا منكو قرب..بس حسابكو معانا طويل مش هنسامح فيه..القصه لسه مخلصتش بس فضحنا الحبكه ومبقاش حد يقدر يغمي عينينا عن الحقيقه