الموضوع: بسام فايبر لتعديل شكل السيارات خارجيا

السلام عليكم ورحمة الله وبركاته

كلمة صغيرة فى خصوص بسام فايبر

بصراحة محدش يقدر يتكلم عن الشغل بتاعه لكن فى الحقيقة المكان ده لو اتحيلوا عليا عشان اجيب منه حاجة بعد كده والله ما هروح أبداً لأنها مش هتقف على بسام ولا غيره

ببساطة قمة قلة الذوق والإستخفاف بالزباين وسوء المعاملة هى المتصدرة لمشهد بسام فايبر الحرفيين !!!

محدش يستغرب لأن مش دى اول مرة اتعامل فى المكان ده وانا عارف كانوا بيتعاملوا مع الزباين ازاى بس زمان بقى قبل ما ربنا يفتحها عليهم والزباين تكتر !!!

بكل بساطة انا هحكلم الموقف اللى حصل معايا وانتوا تحددوا :

بأختصار انا روحت لبسام فايبر الحرفيين وانا جاى من سوهاج ودى مش اول مرة اروحله ، نزلت عادى اجيب شغل لعربيتى وحجات لناس طلباها منى ، دخلت المحل ملقتش حد خالص فيه قلت سلامو عليكم مرتين تلاتة محدش رد عليا ، وقف بتاع ربع ساعة عقبال ماجالى صنايعى المكان وانا اتعاملت معاه قبل كده وافتكرنى وسلمت عليه والعملية مشية تمام .

سألته على كذا حاجة قالى موجود بس المشكلة انه مايعرفش اسعار وده عادى انا متوقعه لأنى مش اول مرة اتعامل هناك لأنى عارف الدنيا لأن كل زبون ليه سعره !!

المهم قالى استنى طيب مش عارف مين فلان جاى ، او اقلك خد كلمه .. مسكت التليفون واتصلت بيه رد عليا واحد قالى انا ادينى داخل عالحرفيين ربع ساعة وكون عندك !!

ساعة ونص انتظار فى المحل لولا شرف الباشا .. قلت عادى أنا كده كده زبون هنا ومايهمش نشيل بعض عشان الجماعة بيظبطونى وكده

قلتله انا عاوز كذا وكذا وكذا ، ابص الاقى على وشه علامات الأفافة والنطاعة والغلاسة وبيبصلى ويقولى بقرف شديد كأنى جاى اشحت منه " انت عاوزهم ليه " قلتله ايه هو اللى ليه عاوزهم اركبهم لعربيتى ، قالى طيب فين العربية ، قلتله لأ انا من سوهاج ومش معايا العربية ، يقوم بكل برود يقولى انت عاوز ايه طيب ، قلتله كذا كذا كذا قالى عربية ايه قلتله فيرنا وكذا وكذا ، قالى بكل تناحة " آسف " !!!! ، قلتله اسف على ايه بالظبط قالى أنا مش ببيع !!

اقسم بالله العظيم تلاتة ده الحوار اللى دار بينا ... قلتله امال انا لما كلمتك من ساعة ماقلتش ليه الكلام ده ولا انت تلطعنى وتقولى فى الآخر مافيش هو وقت الناس ده طظ فيه ووقتك انت بس المهم بالنسبالك ؟؟

رد قالى ده اللى عندى الحجات بتاعتى بتركب على طول مابابعش قلتله هو انا اول مرة آجى هنا ؟؟
قالى بكل غتاتة " آسف " !!

قلتله لا آسف ولا بتاع هى مش هتقف عليك

وبالفعل والله روحت للحاج إبراهيم جلهوم وجبت كل اللى نفسى فيه وحطيتهم على عربية ربع نقل وطلعت على سوهاج

وشهادة حق فى ابراهيم جلهوم الراجل ده انا اتعاملت معاه مرتين ودى التالتة بصراحة شغل نضيف ومعاملة طيبة وانا مش هشترى غير من عنده بعد كده حتى ولو بضاعته معفنه وفيه العبر ، بس هتعامل معاه عشان معاملته الطيبة والبيبسى والشاى اللى شربهملى لأن كان شايلنى شيل

فى النهاية انا مش جاى اسئ لأحد ولا اسوء سمعة حد بس انا كنت بشيد بباسم زمان وقلت للناس واقنعتهم بيه ، لكن جه الوقت اللى غيرت فيه رأيي وقررت اقوله عشان محدش يتخدع برأيي الأولانى ويروح يتعامل معاه وبعدين يلوم عليا .

أعزائى أنا لا أقصد الإساءة لكن اقسم بالله ده اللى حصل معايا وحبيت أنقله بالحرف عشان تعرفوا الناس على حقيقتها وتعرفوا ان الفلوس بعد ما تجرى فى أيد الواحد ممكن يتبتر على النعمة وربنا يحرمه منها .

تحياتى للجميع وأعتذر لو أسأت لأحد سواء بقصد او بدون

بسم الله ما شاء الله شغل تحفة بس لو عندي تصميم ل عربيتي ال فيرنا ينفع ابعت لحضرتك صور و تقولي هتكلف كام عشان انزل ل حضرتك و انا معايا ال فلوس جاهزة؟
عشان أنا مش من القاهرة

و كمان عشان أعرف الشغل هياخد وقت قد ايه

الشغل جميل جدا الله ينور

طب يا ريت لو يكون فيه ايميل علشان الناس الى بره القاهرة تراسله ونبعتله تصميمات و نعرف تتكلف كام

الصراحه حاجات جامده اوووووووووووووي