المركب! (بكسر الكاف)

**zalpany2000** · 06-03-2011 12:51 AM

الاخوة الافاضل

طبعا في الايام اللي احنا فيها دي ... الحال صعب جدا جدا .. ودي نقطة نتفق عليها
والحمد لله الايام اللي فاتت اثبتت ان البلد دي مليانة وطنيين و ناس بتخاف علي مصلحتها .. وكل واحد بيحبها بطريقته
كلنا اتكوينا من نظام فاسد و بايظ

بالنسبة للشرفاء وابناء الوطن اللي مثلوا الحشد في الثورة ... النهارده بدأوا يتعبوا و يركنوا ... ونفقد ميزة الحشد و العدد الكبير في البلد ... كل دول النهارده بينادوا بتوقف التظاهر واننا نصبر ... ولو التظاهرات و الثورة وقفت هنا ... طبيعي جدا ان العجله هاتدور بمنتهي البطئ ... وساعتها هما اول اللي هايقولو الله يخرب بيت اللي تظاهر وودي البلد في داهية

اللي عايز اقولو انهم فعلا معذورين ... انت بتتكلم عن شعب عدد اللي بيفك الخط فيه لا يتجاوز 50%
فما بالك بنسبة البسطاء اللي هايبقوا فاهمين ان الثورة يعني لحمة طول الاسبوع وعيش بالزوفة ووظيفة و عربية 4X4 بعد الطين و المرمطة

لكن اللي الناس مش واخدة بالها منه ... ان المركب كانت بتغرق ... ووصلت المياه للصدور ... والمشكلة اننا كنا عارفين ...لكن مش واخدين بالنا (مطنشييين) ... او مش حاسيين لان الحكومة بتدينا في ترامادول وابو صليبة و كل انواع المسكنات .. ولما المركب قربت تغرق تماما ..ز زودوا الجرعات .. باحباط الشعب .... كل واحد من طاقم المركب كان مربط علي زورق نجاه يحدفه علي دولة يعيش فيها ملك طووول العمر ... وتخرب

ايه اللي حصل ؟

اللي حصل ان جت ثورة .... رمت القبطان الفاشل في المياه .. ولسه الطاقم بتاعه لابس اليونيفورم وخايف من الناس اللي شافت ان المركب خلاص بتغرق ... وقال احنا شرفا .. ده القرصان اللي كان مقيدنا ... شوفوا .. ده احنا بنعرف نسوووق... مش هاتقدروا تدوروا المركب من غيرنا ... اوعوا تخسرونا ... عارفين ... احنا الامل .. ده احنا معاكم ..... ممكن يكونوا صح ... لكن ...لان التاريخ الحجج في الحكم علي المستقبل ... كان لازم يحصلوا ريسهم .... لان فاقد الشئ لا يعطيه

مثلا الشرطة اللي الناس بتقول مش عارفة ترجع زي الاول ... يجي السؤال المهم ؟؟؟ ... هي الشرطة الاول كانت بتعمل ايه ؟؟؟
انا نفسي عملت حادثة .. وكتفي كان مخلوع ..ز واتصلت بالنجده علي مدار 3 ساعات متواصلة "والله علي ما اقول شهيد" علشان حد يجيلي .. وانا في شارع حيوي جدا ... رايق جدا ... والمصيبة بيني وبين القسم كيلو واحد ليس إلا

الشرطة في بلدنا عارفة الحرامي ... وبيتمسك بس علشان يرجع شنطة المدام صاحبة الباشا ظابط المباحث او قريبته

الشرطة عارفة اماكن البيوت المنافية للآداب... ومن زباينهم

الشرطة ... بتبيع المخدرات اللي خارجه من الاحراز

الشرطة لما يبقي فيه خناقة ... يجي بعد ما تتفض لحسن الباشا يتعور ولا حاجه لاسمح الله ... يزعق شوية ... وبعدين يلم اللي اتبقوا من الخناقة ... يقفشلوا حتتين سلاح علشان يقفل محضر ويعمل الاسكور المطلوب (في حالة ظباط المباحث)

طيب .. النهارده انت بتطالب الشرطة بدورها ... انهو دوور بقي ؟؟؟ السابق ؟؟ القعده في القسم .. والحلويات اللي بتيجي من لابوار ولا من اي مطعم اكل والتليفزيون ... وبعدين يقوم يضربله كام مسجون ؟؟؟

الشرطة كانت وهم كبييييير ... وللاسف انكشف انو جهاز فاشل .. محتاج اعادة هيكلة من البداية ...يعني مش يرجع زي ما كان قبل الثورة ... لانه ببساطة مش موجود من زمان ... بس عامل زي حدوتة امنا الغولة ولا البعبع ... اللي صيته ... غير حقيقته

الشرطة ... مثال واحد من امثلة كتيييير علي ان فاقد الشئ لا يعطيه ... فلا يمكن ان نثق في من يتبع سياسة التدليس و المنظرة ... لان ده من الاول عيبنا .... هانبني في الحالة دي تاني دولة علي غش او باطل ... ونصنع ابطال من ورق ... برضو هايغرقونا

طيب ايه البديل .. اننا ننسي كل الرموز القديمة... ويستبعدوا ...وبرضو ده مش معناه ان المركب خلاص نجت ... احنا وقفنا تغرييق المركب ... لكن محتاجين مجهودات مضاعفة ... لانها برضو بتغرق بفعل الجاذبية .... وده اللي كتير مش متخيلينه ... عايزين يرتاحوا ... متخيلين ان اللي حصل ... انهم شغلوا ال auto pilot mode ... وكل حاجه هاتبقي تماااااااااام لواحدها ... لا يا اخونا ... احنا في كارثة ... وللاسف بقاء الجرح ... بنتظيف سطحي فقط .. معناه غرغرينا في الجسم كله ... ايوه تنظيف الجرح بيوجع ... واحيانا بنحتاج نبتر عضو ... ومش كل الناس بتستحمل الالم ... وللاسف البنج كله خلص ... خلصته الحكومة علينا علي مدار 30 سنة ... لازم ناس هاتصرخ ... ويمكن انا كمان هاصرخ ... لكن .... بلدي و عيالي اولي ... حتي لو فشلنا ... هانقابل وجه كريم ونعرف ندافع عن نفسنا

حسام الزلباني

**madyyuri** · 06-03-2011 02:52 AM

متفق معاك

تحياتي

**zalpany2000** · 06-03-2011 03:04 AM

المشاركة الأصلية كتبت بواسطة madyyuri

متفق معاك

تحياتي

اشكرك للمرور
خالص الود

**kono** · 06-03-2011 03:24 AM

متفق معاك جداجدا جدا
بس الوقت ايه العمل؟؟
البلد لسه فيها رموز فساد كتير فيهم ناس معروفين وناس مستخبين
د/عصام شرف احنا متافئلين بيه
بس هو لوحده مش هيصلح حال البلد
لازم احنا نساعده
بس ازاى بقى ؟؟

**zalpany2000** · 06-03-2011 03:59 AM

Kono
اولا قبل اي شئ ... لازم نفوووق كويس جدا ... وماننجرفش ورا اي تيار .... وماننساش اهدفنا اللي بجد علشان دي اكتر حاجه خطر
شايف اننا لازم ننشر الرسالة بين صحابنا اللي مش فاهمين .. كل واحد لو اقنع 3 من صحابه الوضع هايختلف جامد
ثانيا ... الاعتصمات الفئوييييييييييية ... لازم تتوقف فورا ... لازم نفهم ان الحل مش آني للمشاكل
المساهمة في المشروعات اللي بجد .. زي تمويل البورصة ... زي صناديق الاستثمار ... وغيرها
الانتخاباااااااااااااااات .. لازم نحسبها كويس جدا اننا ننتخب اللي احنا شايفينه فعلا صح ... مش بس كده .... لو من وجهة نظرك يستاهل ... برضو سوقله في وسطك و معارفك
الاتقان في الشغل ... اننا نفسنا نتغير ... نرجع نفعل حالة ان القيم الحميدة هي الصح ... نقف ضد الشائعات ... نبطل سلبية

حاجات كتيييييييير قوي ... بننساها ... وندور علي حاجات اسهل نعملها ... لازم نتحرك من نفسنا ... ونعمل اللي علينا ، وربنا يوفقنا باذن الله

**kono** · 06-03-2011 04:42 AM

المشاركة الأصلية كتبت بواسطة zalpany2000

kono
اولا قبل اي شئ ... لازم نفوووق كويس جدا ... وماننجرفش ورا اي تيار .... وماننساش اهدفنا اللي بجد علشان دي اكتر حاجه خطر
شايف اننا لازم ننشر الرسالة بين صحابنا اللي مش فاهمين .. كل واحد لو اقنع 3 من صحابه الوضع هايختلف جامد
ثانيا ... الاعتصمات الفئوييييييييييية ... لازم تتوقف فورا ... لازم نفهم ان الحل مش آني للمشاكل
المساهمة في المشروعات اللي بجد .. زي تمويل البورصة ... زي صناديق الاستثمار ... وغيرها
الانتخاباااااااااااااااات .. لازم نحسبها كويس جدا اننا ننتخب اللي احنا شايفينه فعلا صح ... مش بس كده .... لو من وجهة نظرك يستاهل ... برضو سوقله في وسطك و معارفك
الاتقان في الشغل ... اننا نفسنا نتغير ... نرجع نفعل حالة ان القيم الحميدة هي الصح ... نقف ضد الشائعات ... نبطل سلبية

حاجات كتيييييييير قوي ... بننساها ... وندور علي حاجات اسهل نعملها ... لازم نتحرك من نفسنا ... ونعمل اللي علينا ، وربنا يوفقنا باذن الله

+11111
تيارات ايه اللى ممكن ننجرف وراها ؟؟

**zalpany2000** · 06-03-2011 05:03 AM

والله اي تيار ممكن يشتتنا
ابتداء من التيار بتاع كفاية لحد كده و البلد بتخرب يا جدعان و انتوا بوظتوا البلد
للتيارات اللي بتقول ان وائل غنيم ماسوني و محمود سعد حرامي والثورة دي خطة الشرق الاوسط الكبير
للتيارات اللي بتقول اسفين يا ريس ... وحقك علينا يا جمال ... وعلاء الاسواني متلون و عميل وحرباية
والناس اللي بتقول الاخوان وحشين وهايخربوا البلد و يبوظونا
والناس اللي بتقول ان الاخوان هما الحل و الدولة لازم تبقي اسلامية
والناس اللي عايزة تعدل الماده 2 ... والناس اللي مش عايزة تعدل المادة 2 .. وهي اساسا مادة ما اطرحتش للتعديل في الدستور

كل دي حاجات محبطة ... وتثبط من عزيمة اي حد

اللي لازم نفهمه كويس ان الثورة علشان تتم كان فيه مجموعة مطالب
اتحقق 3 و فاضل لسه شوية

عايزين امن الدولة يتحل وتتفتح قضية فساده ... وده قرب من الحدوث
عايزين الحزب الحاكم يتحل ... ويجمد نشاطه ونشاط اعضاء علي الاقل مكتب الامانة العامة او الاعضاء المؤسسين
عايزين حرية في تكوين الاحزاب
عايزين تأجيل الانتخابات البرلمانية عليالاقل لو مش هايتعمل مجلس رئاسي لحد ما يبقي فيه حياة سياسية في البلد و الناس تفهم

انا من انصار مقولة الناس أعداء ما جهلوا ... اللي بيستخدم بعبع الاخوان ... بيستغل عدم دراية الناس بيهم و يكون جبهة مضادة من فئة من الناس سماهم شيكسبير the mob ... اللي بيوجهوا بقوي الدفع ... وأسوأ أنواعهم انصاف المتعلمين ... اللي مش فاهمين .. ومتخيلين انهم فاهمين ومش عايزين يفهموا... عايزين شعب واعي كده و فاهم ... مش اي حد يقول كلمة يتلم وراه ...
وكمان ما ننجرفش ورا التيار الديني المسيس اللي بقاله سنييييين مسيطر عليه فكر ضيق ولسه بيتكلم في قضايا خلافية ضعييييفة جدا بالمقارنة بالقضايا اللي هاتوجهه سياسيا .. وللاسف لا عنده المرونة ولا الفكر اللي هايخليه يتجاوزها بشكل سليم

كمان مش عايزين ننقاد وننحاز لفكرة واحدة علي انها الصح ... التعدد و الاختلاف اساس الخليقة كلها ... يعني مسلم و مسيحي ويهودي وكافر كمان .. دينيا
يميني ويساري ووسطي ... سياسيا
عامل وموظف ورجل اعمال ... اقتصاديا

لازم نفهم التعدد ده .. ننفتح بجد .. وناخد الافكار الصح فقط من العالم اللي صدرلنا سمومه علي مر السنين ... وللاسف احنا اللي استوردناها و سيبنا العلم والفكر

لازم نركز جدا جدا ... مش وقت خلافات ... ليه النهارده بدأت احداث ومشادات بين مسلمين ومسيحيين ؟
ليه النهارده الاحزاب السياسية بدأت تنفض من السامر وتدور علي مصالحها
ليه بدأنا نتشتت تاني ... يمكن بفعل فاعل ... بس برضو بفعلنا احنا كمان مش بنعرف نتفق كتير
لازم نقف علي ارض محايدة كلنا و نلاقي خطوط تماس فيما بيننا ... وننسي شوية الاختلاف ... احنا بنقول المركب بتغرق لسه ... ما اجريش الم حاجاتي واسيبها
ده قصدي
واسف للاطالة

**HOSSAM99** · 06-03-2011 07:32 AM

أوجزت و أنجزت

جميل السؤال بتاع التيارات ده ....

لكن حضرتك تعبت جدا في تحديد مفهوم التيارات ولو تسمحلي التيارات هي .... التسويحات .....
يعني أنا عن نفسي علشان محدش يزعل أسمع الكلمتين من هنا وأتسوح من هنا ويصبح حبيب الأمس ... وبلاش حبيب دي علشان برضه محدش يزعل.... صديق الأمس عدو اليوم

يا رب أخلص من الي أنا فيه ده وأعرف أشغل عقلي دا بقالو 22 سنه معايا وفبريكه بره وجوه معملش 1000 كيلو متر مكنش بيشتغل بس الا شهرين كل سنه شهر في الترم الأول وشهر في الترم الثاني

**Qmax** · 06-03-2011 08:03 AM

الله يفتح عليك يا مستر حسام

**zalpany2000** · 06-03-2011 12:09 PM

المشاركة الأصلية كتبت بواسطة hossam99

أوجزت و أنجزت

جميل السؤال بتاع التيارات ده ....

لكن حضرتك تعبت جدا في تحديد مفهوم التيارات ولو تسمحلي التيارات هي .... التسويحات .....
يعني أنا عن نفسي علشان محدش يزعل أسمع الكلمتين من هنا وأتسوح من هنا ويصبح حبيب الأمس ... وبلاش حبيب دي علشان برضه محدش يزعل.... صديق الأمس عدو اليوم

يا رب أخلص من الي أنا فيه ده وأعرف أشغل عقلي دا بقالو 22 سنه معايا وفبريكه بره وجوه معملش 1000 كيلو متر مكنش بيشتغل بس الا شهرين كل سنه شهر في الترم الأول وشهر في الترم الثاني

استعمال طبيب ؟ :d

انا حبيت ادعم الرد بمجموعة امثلة فقط و ليس للحصر يا حسام

تحياتي

الموضوع: المركب! (بكسر الكاف)

LinkBack

أدوات الموضوع

عرض

المركب! (بكسر الكاف) - انشر الموضوع فى :

-

-

-

-

-

-

-

-

المواضيع المتشابهه

صفير لما بكسر الدركسيون

استفسار بخصوص رعشة فى العربية جامد لما بكسر الدريكسيون كله للاخر

إلحق يا قبطان المركب بتغرق؟؟؟؟؟؟!!!!!!

خلصت العربيات الى جاية فى المركب و انتظر المركب القادمة

الكلمات الدلالية لهذا الموضوع

المفضلات

المفضلات

ضوابط المشاركة