ألاقي فين f3 علشان نزلت الفلكي مش لاقيها خالص ياريت تدلوني عايز اروح اتفرج عليها بسرعه لاني ناوي اشتري ساجا لكن قلت اشوف ال f3 الاول
وشكرا لكم
عرض للطباعة
ألاقي فين f3 علشان نزلت الفلكي مش لاقيها خالص ياريت تدلوني عايز اروح اتفرج عليها بسرعه لاني ناوي اشتري ساجا لكن قلت اشوف ال f3 الاول
وشكرا لكم
حتلاقيها في معرض شركة الأمل الموجود بجوار الحرية مول في مصر الجديدة .. وفيه معرض تاني أمام الرقابة الإدارية في مدينة نصر .. دول اللي فاكرهم دلوقتي .
متشكر ياباشا نازل اشوفها دلوقت رأيك هيا ولا الساجا بأمانه ؟؟؟؟
أولاً .. أحب أوضح لحضرتك في البداية أني مش من ملاك السيارتين .. ولكن أنا ركبت العربيتين وسقتهم .. وإلى حد ما أقدر اقول أني عندي فكرة عن العربيات بصفة عامة .. بحكم أني ركبت عربيات ماركات متنوعة كتير .
الساجا اللي ركبتها كانت أتوماتيك .. حسيت أني راكب عربية متسوبيشي 1300 أتوماتيك من حيث الأداء .. بس يعيب الساجا ارتفاع استهلاك البنزين إلى حد ما .. ودي مشكلتها الرئيسية كون أنها سيارة 1300 سي سي .. صالونها ضيق إلى حد ما .. بس العربية التحكم فيها سهل لصغر حجمها النسبي وثابتة على الطريق إلى حد كبير .. قطع الغيار في التوكيل غالية ومبالغ فيها .. ولكن يمكن توفيق قطع غيار من ماركات أخرى على حد قول أصحابها .. الأتوماتيك تقريباً سعرها دلوقتي 72000 جنية .
البي واي دي .. أنا بصراحة متحيز ليها لأني بعشقها .. لأنها حققت المعادلة الصعبة في تحقيق أقصى قيمة مقابل السعر .. يعيبها كلام الناس أنها عربية صيني .. ولو مدتش ودنك للموضوع ده حتبقى مستمتع بيها لأقصى حد .. التوكيل يؤخذ عليه ضعفه فنياً وتنظيمياً .. وإن كان بيحاول جاهداً لتلافي هذه العيوب .. قطع غيارها رخصية جداً في التوكيل وأعتقد حتكون أرخص خارج التوكيل .. سهولة صيانتها خارج التوكيل وتوافر قطع غيار يابانية أصلية يمكن تركيبها فيها سواء للموتور أو العفشة .
عربية تتميز بالوسع الداخلي .. موتورها متسوبيشي مصنع في الصين (كود 4g18) وهو نفس تكنولوجيا الموتور اللي راكب في اللانسر بومة 1600 سي سي .. يعطي نفس الأداء بالظبط .
العفشه بالكامل هي عفشة التويوتا كرولا الشيب اللي قبل الحالي المتميز بالنعومة .. ثباتها على الطريق ممتاز .. تتركز شكوى أصحابها في التوكيل وفي بعض عيوب الفنش (تقفيل مصري) .. وظهرت بعض الشكاوي من ارتفاع صوت الموتور في السرعات العالية .. ولكن من وجهة نظري هو ده صوت اللانسر في السرعات العالية .. سعرها المانيوال 67 ألف .. والأتوماتيك (مزودة بفتيس أتوماتيك ياباني الصنع بالكامل jatco) سعرها في رنج من 82 : 84 ألف "سعرها غالي شوية" .
ثانياً .. قبل ما تاخد القرار خد جولة في القسمين (بروتون .. وبي واي دي) وشوف كلام الناس ازاي عن العربيتين .. ومتنساش طبعاً تعمل استخارة .
شكرا على ردك المفصل وتعبك معايا
نزلت معرض البيع في شارع نزيه خليفه بجوار الحريه مول وصلت هناك الساعه 9 تقريبا لقيتهم قفلوا لكن لقيت رجل امن قالي الموجود منها دلوقت ب 67 الف gli وفي gl ب 63 الف لكن غير متوفره حاليا
قعدت اتكلم معاه فتره عن الثوره والاحداث والتوقعات المستقبليه وبعدها لقيت مدير المبيعات طالع سلمت عليه وقالي ممكن تستلم بعد الحجز باسبوعين وكل الالوان متوفره والسعر 67 الف نهائي
بالنسبه للعربيه مقدرتشش اشوفها غير من الخارج شكلها كده قيمه عاليه مقابل السعر هاروح بكره ان شاء الله واتفرج عليها من جوه علشان اقدر اقارن بينها وبين الساجا لان الساجا بصراحه عجبتني خاصة حسيت ان التقفيل بتاعها نظيف جدا
ربنا يخليك يا أيمن باشا .. بس الواحد بقى مشغول بالأحداث الجارية ومهموم بيها .. وأشوفك قريب إن شاء الله .. بس ردوا على الناس اللي بتسأل دي الأول .
عقبال ما يرجع لينا أبو ياسمين والمناهري بك والباشا أسامه وباقي الناس الحلوة .
طيب ترشح الbyd ولا الرينو لوجان فى فئة السعر
ايهما افضل يا ريت مقارنه بين byd vs logan