هام جدا بخصوص تعليه وتوطية كهربة السيارة

**beshomilan** · 07-03-2011 08:54 AM

هو بصراحة انا مشفاهم نظرية تعلية وتوطية السيارة دى

او بمعنى ادق مثلا يقوللك عللى العربية من 650 ل 800 دى اعرفها ازاى اذا كان ال rpm بيبتدى من الف ومفيش ارقام قبله خالص فاقيسها ازاى بالظبط كده؟؟

وياترى امتى بنعلى كهربة العربية وامتى نوطيها؟؟؟

وازاى اعرف كهربة عربيتى الحالية اذا كانت واطية ولا عالية؟؟؟؟

افيدونا يا اخواتى لان الموضوع ده فى ناس يجهلوه مثلى

**saadelden** · 07-03-2011 01:24 PM

لو الكهربا مش مظبوطه هتلاقي الماتور متبرجل و بيسقف
لكن لو مظبوط هتلاقي صوته مستريح و مابيتهزش جامد

**romieh** · 07-03-2011 02:23 PM

اولا اللى انت بتتكلم عنه ده هو السلانسية

وده بيتظبط على حسب كل عربية

وبتعرفة مش من الارقام

لو تلاحظ هتلاقى فيه شرط قبل الالف

فى الغالب بتبقى كل شرطة ب 100 rpm

يعنى علشان تظبطه على 800 يبقى تخلى السلانسيه يقف على الشرطة الثامنة

ودى بتتعمل من عند بكرة الاكسراتير

أما بقى كهربية العربية فدى لما بتكون مش مظبوطه بتلاقى العربية فيها رجه او نتشة

ودى بتتظبط من الاسبراتير

**beshomilan** · 07-03-2011 06:16 PM

كده انا فهمت بنسبة كبيرة جداااااااااااا

**smsm_nabawy** · 11-03-2011 08:40 PM

مع احترامي بس .. بالنسبة لأي عربية في الغالب بتكون مظبوطه أن السلانسيه بتاعها على 800 .. لو بتدوس بنزين على السلانسيه و تسيب تلاقي الأر بي أم نزل عن ال800 و رجه تاني و حسيت ببرجله في العربية .. يبقى ده حساسات !! :)

**beshomilan** · 11-03-2011 11:43 PM

سؤال تانى معلش

ايه هو الاكسراتير وايه هو الاسبراتير؟؟

**amrelsaqqa** · 12-03-2011 12:16 AM

الاكسراتير هو دواسة البنزين وبكرة الاكسراتير هتلاقيها في الكربراتير راكب عليها السلك اللى جاى من الدواسة ( اللى الميكانيكى بيحركها ويعلى صوت الموتور كأنه بيدوس بنزين )

الاسبراتير هو اللى بيوزع الشرارة على البوجيهات
يعنى شوف سلوك البوجيهات طالعة منين ، يبقى هو ده الاسبراتير

بالنسبة للتعلية والتوطية

الاسبراتير ده من جوة فيه عضو دوار بياخد حركته من عمود الكامات يعنى مرتبط بحركة الكرنك والبساتم

لما العضو الدوار ده يلف بيلمس مع سلك من سلوك البوجيهات ثم اللى بعده ثم الى بعده ثم اللى بعده لحد ما يلف دايرة كاملة ويرجع للبوجيه الاولانى وهكذا ، وبكدة الشرارة بتروح تحرق الخليط طول ما الموتور شغال

الفكرة انك بتتحكم في الوقت اللى عنده البوجيه بياخد الشرارة حسب مكان البستم وهو طالع
ببساطة وش الاسبراتير اللى فيه السلوك ممكن يتحرك ويتغير مكانه بحيث العضو الدوار ( بيسموه شاكوش الاسبراتير ) يلمس في توقيت مختلف

طبعا فيه نقطة معينة للبستم وهو طالع في شوط الضغط هى افضل نقطة للاشعال وتدى افضل عزم
لما تلف في اتجاه دوران الشاكوش يبقى ده تأخير كهربة او توطية كهربة وطبعا صوت الموتور بيوطى شوية ويهدى شوية

ولما تلف وش الاسبراتير في عكس اتجاه الدوران يبقى كدة تقديم او تعلية
فالشرارة تنطلق بدرى شوية

المفروض الكهربة تكون مظبوطة لا عالية ولا واطية
لما الكهربة تعلى اوى بتعمل خشونة في صوت الموتور وكركرة وبرجلة جامدة
لما توطى اوى الموتور عزمه يقل ويسخن وطبعا لو وطيت زيادة عن اللزوم الموتور مش هيدور من الاساس

فبيبقى في عندك رينج كدة حوالى 10 درجات يمين و10 درجات شمال تتحرك فيهم تظبط فيهم الكهربة

طريقة ظبط الكهربة انك تعليها وبعدين توطيها سنة بسنة وتطلع تجرب العربية في كل مرة لحد ما يختفى صوت الكركرة اثناء كبس دواسة البنزين وخصوصا في اول الغيارات التانى والتالت وتربط الاسبراتير على كدة

**smsm_nabawy** · 12-03-2011 12:34 AM

المشاركة الأصلية كتبت بواسطة beshomilan

بس انا عندى لما بسيب البنزين بينزل لاخر المؤشر لتحت مش على 800 استاذ سمسم

ولو دوست بنزين ممكن ارفعه على 800

بس يمكن قصد حضرتك والعربية سخنة ولا ايه؟؟؟؟

بص يا بيشو ..أولاً .. أنا مش أستاذ :))و شكراً لذوقك :)

ثانياً....العربية لما بتسخن .. المؤشر بتاع الأر بي أم .. بيكون على ال 1000 لفة \ دقيقة

علشان الموتور بيسخن "ده الطبيعي عامةً في العربيات الأنجيكشان الجديدة.."

و حتى في الكاربراتير.. لما بترفع الهوا .. و تسيب العربية تسخن .. هي كده كده العربية يكون عدد لفات الموتور عالي

لما بتسخن .. المفروض أن عدد لفات الموتور بيهدى

تعالى بقا للسلانسيه

العربية و حضرتك يا اخ بيشو واقف ممور ... و لسه بتسخن الصبح .. بيكون الآر بي أم عالي... و صوت الموتور عالي سنه .. علشان بيسخن
في الطبيعي المفروض يكون على 1000 .. لازم عامةً طالما الماتور داير.. يكون الأر بي أم واخد قيمة !! مش عند الصفر !!

فأنا مش فاهم ازاي المؤشر طالما حضرتك مش دايس على البنزين .. يبقى هوا مش متحرك و ثابت عند أول عداد الآر بي أم !!

كده يبقى العداد فيه حاجة !!

المهم : * أتفقنا ان الطبيعي ان طول مالعربية دايره.. العداد واخد قيمة أكبر من الصفر بيدل بيها على عدد لفات الموتور

بعد العربية متسخن و حضررتك ماشي كده .. و واقف في أشارة و ممور... كده انت على السلانسيه .. شوف عداد الآر بي أم .. المفترض انه على 800 ...

كده المحرك هادي ... و سخن

لما حضرتك تدوس بنزين ... و تسيب.. المفروض أن أثناء الدوس ،، الآر بي أم بيعلى .. و لما تسيب ... بيوطى تاني .. لحد ميوصل لل800

لو هو قل عن ال 800 و أوي.. و الموتور رعش شويه كده ... و بعد كده رجع تاني لل800 و على عها شوية و بعد كده رجع 800 تاني

بمعنى أصح .. أنه أخد وقت على ماستقر على ال 800 لفه \ دقيقة !! يبقى العربية فيها حساس أسمه حساس الأيدل... و هو مسؤل عن تنظيم لفات الموتور على السلانسيه !!

أنا قلت لحضرتك أنه المفروض في العادة 800 لفة .. لن العربيات الي الحساس بتاعها مظبوط صح بيكون مظبوط أن العربية على السلانسيه تكون على 800 لفة \ دقيقة !!

يا رب أكون وضحت ليك يا أخ بيشو الفكرة عامةً

بس أنا الي فهمته من كلامك .. أن العداد طول منتا مش دايس بنزين ... هو على الصفر ؟؟؟ هل ده صح ؟؟ لأن لو كده يبقى فيه مشكله !!

المشاركة الأصلية كتبت بواسطة beshomilan

سؤال تانى معلش

ايه هو الاكسراتير وايه هو الاسبراتير؟؟

ا
لأكسراتير .. المقصود بيها دواسة البنزين accelerator
و هيا بيكون ليها بكره .. أسمها بكرة الاكسراتير
بتكون متوصلة بالدواسة بواير ... لما بتدوس على الدواسة بتاعت الأكسراتير .. بيشد الوايرو بالتالي البكرة بتاعته

و بيفتح البوابة "الثروتل" بالتالي كمية بنزين و هوا بيدخلو أكتر...و بالتالي حرق أكتر .. و سرعة تزيد

الأسبراتير.. هو "على حد علمي" موزع الشرارة ...

هو المسؤل عن توزيع الشرارة على البوجيهات ... بمعنى أن ال4 بوجيهات " في أي موتور مش ديزل و 4 سليندر.." السلك بتاعهم بيكون طالع من حاجة أسمها اسبراتير.. ده فيه حاجة أسمها شاكوش كده ... بيوزع التيار .. بحيث
"مثلاً.. في ماتور معين .. البستم 1 & 3 بيتحركو مع بعض .. و البستم 2&4 بيتحركو مع بعض..."

بكده الماتور كحتاج أن البوجيه 1 & 3 تحصل فيهم شرارة مع بعض.. و كذلك مع 2&4

الاسبراتير هو المسؤل عن كده ... بيوصل كهربا في السلك بتاع البوجيه 1&3 مع بعض.. تقوم تحصل فيهم شرارة .. و لما يفصل الكهربا عنهم هما التنين .. يكون وصلها في السكلين بتوع 2&4
و هكذا

يا رب أكون عرفت أساعدك و اوضحلك بعض النقط .. و يا ريت لو حد شايف حاجة غلط في كلامي يصلحها بسرعة لتعم الفائدة ...

آسف للاطالة ,,,,,,,