الموضوع: د.احمد خالد توفيق يكتب:عن شفيق والاسواني اتكلم

المشاركة الأصلية كتبت بواسطة AngelicCore

أنا مبحبش علاء الأسواني - ولا قريتله عمارة يعقوبيان ولا شيكاجو اللي مشهور بيهم
بس لقاؤه مع شفيق مقدرش الومو على حاجة عملها
في ناس ماتت عشان توقع النظام ده واحنا - ومنهم أهلي - بنقول طريقة كلامه مع شفيق مش عارف مالها
لو مش عايز حد ينقدك يبقى السياسة دي مش مهنتك

المشاركة الأصلية كتبت بواسطة otefa

بالظبط كده في رأي الأسواني كان أعلاهم صوتا وأضعفهم حجة وركز على الدستور وتغييره مع أنه لاشفيق قانوني ولا الأسوانني قانوني كان من الممكن ادارة الحوار في نقاط تهم المواطن على المستوى المعيشي وبنقاط أكثر عمقا ووضوحا (على سبيل المثال خطة تطوير التعليم والرواتب وتوقعات زيادة الحد الأدنى وأخذ وعود بذلك حتى لو التطبيق بعد 6 شهور على سبيل حل مشكلة أنية زي المطالب الفئوية ....ومالخطوات الفعلية الجارية حاليا في سبيل تطهير وتطوير جهاز الداخلية..... الموقف بوضوح عن الحالة الأقتصادية وميزانية الدولة بالتقريب وخطورتها على المستوى القريب(ميزانية الدولة)......أنما أمور دستورية وما الى ذلك فالحديث كان من المفترض توجيهه للجنة الدستورية(للأختصاص) وبوجود شفيق أو القوات المسلحة وفي وجود محاور قانوني مثل الدكتور حمزة..........البرنامج كان معد ومدار بأرتجالية فجة ماطلعناش منه غير بهجوم حاد أقرب للشخصنة على شفيق منه لأستجلاء الحقيقة
البرنامج ككل من أعداد ومحاورين وضيوف لم يكن على مستوى الحدث.

أحب أضيف أي نعم الدكتور حمزة تناقش مع دشفيق ولكن يحسب لحمزة ذكاءه وكياسته صحيح كان يتناقش مع شفيق ولكن بخطاب موجه للمشاهد (يعلم تماما بأن النقاش لن يجدي لأنه كان من المفترض أن يتم مع اللجنة المعدة لتعديل الدستور للأختصاص القانوني وليس شفيق)

المشاركة الأصلية كتبت بواسطة frhateg

شفيق كلامه اكتر من افعاله . بعد تعيينه رئيس وزراء كل ما تفتح التليفزيون تلاقيه قدامك . اصبح مقرر علينا . من دريم للمحور لمصر النهارده ل اون تي في ..........الخ . صباحا و مساءا . بيقضي في التليفزيون اكتر ما بيقضي في مكتبه . طيب حيلاقي وقت تاني فين يحل مشاكل الشعب . و آخر مره كانت الساعه داخله علي 2 فجرا و هو يناضل مع علاء الأسواني . طيب حيروح امتي و ينام امتي و يروح مكتبه تاني يوم امتي . علما با ن كان فيه حظر تجول .يعني المفروض تطبق علي الكل و لا يعني هو علشان رئيس وزراء مصر يكون فوق القانون . هو جايز يكون راجل عظيم في مجال معين و متفوق فيه . بس لو راح مجال تاني لا يصلح . و ده بصراحه اللي شايفه .

لو حضرتك شفته وهو خارج من الوزارة تاني يوم يعد قبول الاستقالة كنت هتعرف إنه مروحش بيته وإنه خرج من البرنامج على مكتبه لأنه مغيرش البدلة اللي كان لابسها ، ده في الوقت اللي كل اللي كانو معاه في البرنامج أكيد روحو بيوتهم نامو

أنا شايف ضابط جيش ناجح في الطيران الحربي ، مسك الطيران المدني برضه نجح ورفع من شأنه واللي أنا شايفه إن مفيش علاقة بين الطيران الحربي والطيران المدني ، إلا إذا اعتبرنا إن ده فيه طائرات وده فيه طائرات

الأخوة الأفاضل اللي بيقولو إن الفريق أحمد شفيق مكنش عارف يرد على حاجة في الحوار واستشهدوا بانه مش عارف حاجة عن موقعة الجمل أو إنه عارف مين اللي عمل كده
يا ريت تشوفو الحوار كويس لأن السؤال ده إتسأل له في الجزء الأول من الحوار مع د/ كمال أبو المجد ، ود/ عمرو حمزاوي ورد وقال إنه طلب القاضي المسئول عن التحقيق وسأله ليه هو متأخر في النتائج
رد عليه: أنه هناك تضارب في الأقوال وإن الشخص اللي بيجيله إسمه في ميدان التحرير بيلاقيه جايله في ميدان تاني وتالت.
سأله الفريق أحمد: طيب أنت عايز إيه علشان تخلص.
طلب منه وكلاء نيابه أكثر
واقترح عليه الفريق أحمد إنه يمسك كل ميدان على حدة علشان يقدر يخلص بسرعة
هنا سألته المذيعة ريم هو فيه لجنة مشرفة على التحقيق ده
رد عليها إن فيه لجنتين
فسألته ليه لجنتين
رد عليها علشان التحقيق يخلص بسرعة

بصراحة فعلاً كل ده الرجل مكانش عارف يرد

اللي غاظني بقى إن الأستاذ المحترم قوي علاء الأسواني بدأ حواره مع الفريق أحمد بإنه سمع حواره الأول ومع ذلك فوجئت بيه بيسأله هو ليه التحقيق في اللي حصل في ميدان التحرير لسه مخلص لحد دلوقتي ، وكأنه مسمعش الرد اللي قاله الفريق في الحوار الأول ............ ده إسمه إيه بقى؟

الحاجة التانية إن كان في الحوار الأستاذ المحترم بجد أ/ حمدي قنديل وسأل الفريق أحمد أكثر من سؤال وكان بأخذ الرد منه وينتقل للسؤال الآخر ، فلو مكنش الردود بتقنع الأستاذ حمدي قنديل مكنش هينتقل للسؤال اللي بعده

الحاجة الأخيرة بقى ودي ملهاش علاقة بالحوار اللي دار
المهم بالنسبة ليا في الشخص اللي قدامي هو قدم إيه لمصر ، فيا ترى ممكن حد يقللي علاء الأسواني قدم إيه لمصر من يوم متخرج لحد النهادرة غير القصص اللي كتبها واللي لو افترضت إنها عبقرية أدبية وإنه هياخد عليها جايزة نوبل مثلاً فأعتقد إن ده ميقدمش حاجة لمصر
أما الفريق أحمد شفيق كان طيار حارب في 73 يعني واحد كان شايل حياته على ايه وكان مستعد يقدمها تضحيه للبلد دي علشان ترجع أرضها وده بس كفيل إني أحترمه ، لأني وده عن نفسي برضه بحترم أي جندي اشترك في الحرب دي مهما كان مكانه بقى في الجيش.
الحاجة التانية اللي عملها واللي أعرفها أنا تطوير الطيران المدني يعني برضه حاجة اتعملت للبلد دي مصر.

سؤال أخير لو مصر أعلنت الحرب مرة تانية على اسرائيل تفتكروا مين اللي هيروح يحارب علاء الأسواني والا أحمد شفيق؟