رسالة الى أعداء مصر ...ألاعيبكم مكشوفة .... موتو بغيظكم
سحبوا الشرطة م الشوارع علشان أخاف وأقول بلاها ثورة .... قولت برضه انا مع الثورة لما تحقق اهدافها
فتحوا السجون وخرجوا المجرمين وادوهم سلاح علشان اتنازل عن حقي في حياة افضل ومستقبل افضل .... نزلت احرس الشوارع عشان احمي نفسي واهلي وجيراني
حرقوا مباني ونهبوا محلات علشان يخوفوني ..... لكن برضه مش ح اخاف .... انا وسط حبايبي وناسي
بعتوا بلطجية يرهبوني ويرهبو ولادي ...... مع بعض مسكناهم وبقو زي الفراخ وضربناهم
طلعو اشاعات ان البلد مش ح تلاقي تاكل كمان ايام ...... وهو الاكل كل حاجة طب مالحيوانات والبهايم بتاكل وتشرب ....ايه فايدة اللقمة اللي مغمسة بالذل والهوان المهم اعيش بكرامة
دسو اعوانهم بين الناس عشان يولعوها نار ويعملو فتنة ..... طيب مانتو بقالكم سنين بتحاولو تشعلوها لكن ربنا بيطفيها ....."و قد مكروا مكرهم وعند الله مكرهم وإن كان مكرهم لتزول منه الجبال " ...
حتى لو عشت فيكي يامصر في خيمة .... وكلت عيش ناشف وجبنة قديمة ... برضه مش ح اندم اني اتحررت من الظلم والذل والنهب .... علشان ربنا معايا ... علشان انا الحق وانتم الباطل
..
حتى لو هديتوها .... ح اعيش عشان ابنيها تاني
حتى لو ولعتوها ...... ح أطفي ناركم وازرعها من تاني
مش ح تقدرو تشيلوني منها ..... لأن جذوري ضاربه في سابع ارض من أراضيها
..
انتو فاكرين انكم ح تموتوني .... هههههه
تبقو بتحلمو ......
لو قدروا الهكسوس تبقوا انتو تقدروا
لو قدروا التتار تبقوا انتو تقدروا
لو قدروا المماليك تبقوا انتو تقدروا
لو قدروا الفرنسيين تبقوا انتو تقدروا
لو قدروا الانجليز تبقوا انتو تقدروا
لو قدروا اليهود تبقوا انتو تقدروا
...
انا مش بأموت الا بأمر الله ...... انا عمري آلاف السنين
ربنا حافظني من كيد الكائدين
ومن حقد الحاقدين
ومن حسد الحاسدين
..
انا شعب مصر أيها الجاهلون
انا أبقى منكم ايها الزائلون
...
انا قادم وأنتم ذاهبون