الموضوع: ميدان التحرير من الساعة 2 ل 5 النهاردة(فيديو)

قلنا السياحة راجعة تانى والحمد لله وكان بقالى فترة منزلتش يوم واحد شغل.النهاردة نزلت وكان عندى المتحف فى البرنامج.خلصت الساعة شرح المتحف 2 وطلعت اشرب سيجارة لقيت ضباط الصاعقة بيجروا وعسكرى جاى من البوابة وفجاءة 10 عساكر صاعقة و3 ضباط من الجيش وقفوا على البوابة و الشعب يريد اخلاء الميدان.طيب والمتحف ماله والاجانب مش ناقصين قلق وخلوها تمشى وناكل عيش بقى.لا الشعب يريد اخلاء الميدان.طيب ماشى.الكلام ده كله وهما عند المتحف ومراحوش عند المعتصمين لحد 2.45 وتمام سلمية وزى الفل.

هوب الساعة 3 الضباط براحة يلا اقفل المتحف ومشى اللى جوة.ليه كدة بس واقول الناس ايه ديه مصر بقت حلوة وتعالوا وحنا بقينا مصر جديدة والمظاهرات سلمية واللى حصل وشفتوه على التيلفزيون مش هى دى المظاهرات.

المهم الناس اتامنت وركبوا العربية وعلى الفندق طيران.قعدت انا فى التحرير وطلعت برة اتمشى واشوف فيه ايه ؟

الاقى ناس ولا هما هنا.ايه يا جماعة فيه ايه اللى بيحصل؟ ولاد------ رموا علينا طوب ومشيوا وراحوا يجيبوا ناس تانية وجايين.طب رموا طوب ليه.عشان مش عاوزينا نقعد واحنا مش هنمشى الا لما ابو الغيط يمشى

اتمشيت وصلت للجنينة.لقيت ناس اكيد ملهموش دعوة ب25 يناير ولا فبراير ولا مارس حتى.بيسحبوا عصيان وبيكسروا الرصيف اللى شباب الثورة وشباب المحروسة كنسوه ودهنوه(وكانوا على فكرة الشباب دول فى المتحف ووقفونى كذا مرة وقالولى قول للاجانب اللى معاك اللى قاعدين دول مش احنا-احنا اللى عملنا الثورة وكنسنا الميدان ونضفنا الميدان مكان ما كنا قاعدين وزعلانين جدا وحقهم طبعا)

فيه ايه يا جماعة : لازم نحمى نفسنا ونامن مكاننا دول هيضربونا ولازم نرد.طيب هما ضربوا ولا قربوا ولا لسة.لا ما هما حدفوا طوب ومشيوا ورايحين يجيبوا ناس.(خناقة بقى)

طيب ما انا واقف ولا طوبة ولا غيروا والعربيات وست حامل وناس كبيرة ماشية وبتوع الشاى قاعدين واللى بيقرا جرنان والدنيا عادى.

قلت خلاص انا هروح والاشاعات هنا اسرع من النار فى الهشيم.اجرررررررررررررررر� �رررررى والاقى ورايا 20 مثلا بيجروا.فيه ايه يا جماعة.البلطجية جم بالسلاح وبيضربوا اللى بيقف.طيب ما انتوا واقفين معاهم.لا هما لسة هيبصوا.قلت اقف اشوف البلطجية وده كان الساعة 5 ملقتش حد خالص ةالناس بتضحك.

الناس تكلم العساكر اللى على الدبابات.يلا بقى يا دفعة اعمل حاجة البلطجية جايين هنا.العسكرى بالراحة انا قاعد اعلى منكوا يا جماعة ولما تحصل حاجة احنا بنتحرك.

مشيت وقلت ابص على العربية عشان راكنها عند الرواس.اول ما وصلت سمعت صوت الرصاص وضرب نار فى الهوا والدبابة بتتحرك والناس جاية عليا بتجرى.طبعا سندت على العربية ووقفت لحد ما الناس بدات تهدى ودورت واتوكلت على الله.

ليه الموضوع ده كله : لاننى جاللى تيلفون من معظم اهلى انت فين وخلى بالك وانت مروح.ليه بس فى ايه؟اصل فى التيلفزيون وعلى موقع اليوم السابع بيقولوا اصابات وبلطجية من غير عدد.

وادى الفيديو:

ده والناس واقفة عند المتحف وكان عددهم ميزيدش عن 20
YouTube - VIDEO0020

وده والاسلحة بتتسحب من الجنينة وبيستعدوا
YouTube - VIDEO0022

وطبعا كان لازم اقفل الصوت عشان الالفاظ .

كل الروايات ادت لنتيجة واحدة.اللى كانوا فى الميدان مش هما شباب الثورة وانا معرفش شباب الثورة واحد واحد.بس الناس اللى قابلتهم فى المتحف واللى كانوا خايفين على اللى عملوه فى الثورة وتعبوا عشانوا ميضيعش وزعلوا وبيحاولو يفهموا الاجانب اللى شكروا فيهم وحيوهم وتمنوا اولادهم يكونوا زيهم ويدرسوا الثورة المصرية.اكيد مش هما اللى شفتهم النهاردة فى الشارع بيكسروا الرصيف اللى كان هيترصف واكيد مش هما اللى قاعدين ولا دريانين باللى بيحصل وحصل فى البلد او ميهمهمش.ومعرفتش من شباب الثورة انهم كانوا بيناموا فى الميدان ومعاهم سلاح فى الخيم.