تشبيه بسيط علشان الناس اللى مش عايزه تفهم ربنا يكرمهم ويفهموا يارب

**هيثم المنياوى** · 09-03-2011 11:22 PM

السلام عليكم ورحمة الله وبركاته
طبعاً كلنا بلاشك قابلنا الناس بتوع أنتوا خربتوا البلد ودمرتوها وكنا عايشين فى أمان..ووو...وووو....وووو..ووو... ...الخ
من يومين كنت واقف مع اتنين(مره واحده)من الناس اللى زى العسل ده فى الأول كنت بتكلم مع واحد من عينة عنده معلومه عن كل واحد أو حتى حافظ أسمه ويروح مدخلك من موضوع لموضوع وطبعاً حضرتك مش من حقك إنك تتنفس مش تتكلم(بصراحه كان حوار رائع)..
المهم الرجل قعد يتكلم لوحده بتاع نص ساعه وأنا واقف بتفرج عليه.....شويه وراح جاى واحد تانى وأصبح 2/1 قولت يارب عنا على ما أبتليتنا....
ربنا كرمنى والأولانى مشى قولت الحمد لله ولقيت التانى موافق إنى أخد نفسى فبصراحه طمعت وقولت أتكلم أنا وربنا يكرم
قولتيله ياأستاذى الفاضل ممكن تدينى دقيقتين من غير ماتتكلم خالص ومستعد أسمعك للصبح
الراجل طلع مؤدب وقالى اتفضل
قولتيله بص ياسيدى النظام اللى فات كان عامل زى مرض السرطان والعياذ بالله لما بيكون فى حد عنده سرطان مابيحسش بألم صح؟؟؟؟؟
قالى أه...
قولتيله طيب لو تم إكتشاف المرض وراح يتعالج مش شعره بيسقط وتحس إنه بقى تعبان أكتر من الأول
قالى أه..
قولتيله طيب كان ينفع نصيب الراجل منعالجهوش علشان شوية الشعر اللى هيسقطوا ؟؟؟
قالى لأ
قولتيله طيب لوسيبنا الراجل من غير علاج كان ايه اللى هيحصل
قالى كان هيموت
قولتيله الله ينور عليك أهو النظام زى كدا بالظبط إحنا بنعالج اللى عمله بنعالج الفساد والقهر والظلم وبنبنى البلد بس لازم نسقط شوية شعر اللى هما الشغل واقف شويه ماشى مفيش أكل ماشى مفيش أمان ماشى فى مؤامرات دنيئه ماشى....بس لازم نستحمل
راح الراجل(الله يصلح حاله يارب)قالى والله فعلاً انت كلامك صح وأنا أقتنعت بيه
فتوجهت إلى الله شاكراً له وقولنا نكتب لحضاراتكم......بس جت متأخره شويه معلش
تحباتى لحضارتكم............والسلام عليكم ورحمة الله وبركاته

**SeiffoZ** · 09-03-2011 11:39 PM

خد بالك بس ...

الناس إللى بتنفخ نفسها و بتقول " كل ثورة ليها خسائر" متأثروش قوى و فى إللى متأثروش أصلا ..

فى ناس فقدت أعمالها و ولادها هيجوعوا ..

و فى ناس فقدوا اولادهم ... و ناس فقدوا ممتلكاتهم ...

و الناس دى كانت عايشة فى أمان و سعيدة نسبيا بعيشتها ... و ملهاش علاقة لا بامن الدولة ولا بأى حاجة .

و فى ناس ربنا فاتحها عليها من الحلال و أغنياء و عايشين سعداء بدون مشاكل تذكر ... و فى منهم دلوقتى إللى تجارته راحت خالص ....

و نتكلم .. فعلا البلد خربت بصورة مش صغيرة .... و لازم نكون عارفين كدا ... خصوصا مع الفوضى إللى حصلت بعدها لمدة شهر أهى زادت الطين بله و كله إعتصامات و كله مضرب و أخر فوضى فعلا .... و الناس واخدها دراع فى حاجات كتير ...

فلازم تراعى ... و لازم تكون عارف إن الأمنين ليهم دور هام جدا و ممكن مايكنش ليهم دور فعال فى الثورة أى يكونوا من مؤيدنها ...

هما فرحانين بالثورة .. لكن زعلانين على الخراب ... و إنتوا إللى خربتوها نوع من التنفيس ....

و الكلام مش ليك طبعا أستاذى الفاضل إنت شرحت وجهة نظرك و هى صحيحة ....

بس الكلام للى مش همة حد غير نفسه ... يا رب تطولك الخسائر ...

**هيثم المنياوى** · 09-03-2011 11:48 PM

وجهة نظر حضرتك محترمه
وعلى الجانب الأخر فى ناس خسرت كل شىء وكانت سعيده جداً
والله ياأخى الفاضل ربنا وحده اللى يعلم بحجم الخسائر اللى مينفعش أذكرها هنا واللى عرفت بيها من ساعة مابدأت الثوره
لكنى كنت فرحان جداً ورميت كل حاجه ورحت التحرير والحمد لله وأقسملك بالله كأنه لم يكن شىء ولا فى حاجه فى نفسى إلا الفرح فقط لاغير والحمد لله رب العالمين

**Mohamed_Rashad** · 09-03-2011 11:50 PM

كلام سليم و مظبوط.
ده برضه اللي بحاول أفهمه لناس اتكلمت معاهم الايام اللي فاتت.
ده نظام مجرم ظالم مغتصب البلد 30 سنة دمر كل شيء.
عاوز تخلعه من جذوره في 18 يوم بس و بدون خساير بشرية (شهداء ان شاء الله و جرحى) و خساير اقتصادية و انفلات و لا انعدام أمني و غيره. مستحيل طبعاً.

ان شاء الله بالصبر و الاخلاص و تعاون الناس المخلصة هنعدي المرحلة دي بسلام.

**هيثم المنياوى** · 10-03-2011 12:06 AM

المشاركة الأصلية كتبت بواسطة mohamed_rashad

كلام سليم و مظبوط.
ده برضه اللي بحاول أفهمه لناس اتكلمت معاهم الايام اللي فاتت.
ده نظام مجرم ظالم مغتصب البلد 30 سنة دمر كل شيء.
عاوز تخلعه من جذوره في 18 يوم بس و بدون خساير بشرية (شهداء ان شاء الله و جرحى) و خساير اقتصادية و انفلات و لا انعدام أمني و غيره. مستحيل طبعاً.

ان شاء الله بالصبر و الاخلاص و تعاون الناس المخلصة هنعدي المرحلة دي بسلام.

إن شاء الله يا أستاذ محمد.......اسعدنى مرورك

**A.Saad** · 10-03-2011 12:27 AM

اولا : العنوان مفيهوش ريحة الديمقراطية اللى حضرتك بتنادى بيها
هل تقبل ان حد يقول اللى فى التحرير اللى مش عايزين يفهموا

ثانياً : محدش قال ان التغيير مرفوض
لكن ما ينفعش برده تقول انا هاغير بيتى من الاساس للدهان للديكور من غير ما تكون عارف الاتى :
خطة تعمل بيها شغلك : يعنى ما ينفعش تدهن الشقة وبعدين تقول اظبط المحارة
نفس الوضع حصل هنا انتخابات الرئاسة ولا المجلس الاول
طيب نحل المجلس ونعمل الانتخابات بعد سنتين : امال مين اللى هيراقب الرئيس الجديد وحكومته فى سنتين
تكلفته كام وتتحمل التكلفة ولا لا : الوضع الاقتصادى دخل مرحلة الخطر وهو اصلا اقتصاد هش
مين الصنايعى اللى هيعمل كدة : مفيش شخصية متفقين عليها
عصام شرف اللى الناس طالبت بيه النهاردة مكتوب عنه " اصل كلامه قديم "
كلامه قديم علشان قال ان واحد اتصل بيه بيدعى له وان شخص مسيحى بيضيء له الشموع فى الكنيسة
طيب : امال طالبت بيه ليه وانت عارف انه شخص قديم وتفكيره كدة
ياما تدى له فرصة يشتغل ، ياما مكنتش تختاره
لكن مش هنغير رئيس وزرا وحكومة كل 6 ساعات

وغير كدة الناس لازم تعرف ان فيه اقلية وفيه اغلبية
يعنى التحرير اما يكون فيه 2000 واحد دول اقلية
يبقى يحترموا راى الاغلبية اللى قالت فضوا المظاهرات دلوقت
واليوم خير مثال على ذلك من احتكاك بين الشعب وبعضه
او ان منتفعى النظام ياخدوها فرصة لاشاعة الفوضى

**A.Saad** · 10-03-2011 12:54 AM

المشاركة الأصلية كتبت بواسطة hhoo

أهلاً بيك...........طبعاً رأى حضرتك محل إحترام
ولكن اللى ميقتنعش بعد كل اللى حصل إن النظام كان فاسد يبقى فعلاً مش بيفهم
لإن ده حاجه مينفعش نختلف عليها ده من الثوابت يا أستاذى الفاضل أنا ممكن نحتلف أنا وحضرتك على فض الإعتصام أو بقاؤه لكن فساد النظام لايجوز الإختلاف عليه ولو حضرتك مش مقتنع بأنه لايجوز الإختلاف عليه ممكن نعمل استفتاء
وبعدين أنا فى كلامى لا اتكلمت على التغيير ولا انه مرفوض أو مش مرفوض لإن حضرتك مع احترامى الشديد ليك دخلتنى فى حاجه تانى أنا كل اللى أقصده إنى أقدم فكره نقنع بيها الناس بفساد النظام السابق
يبدو إن حضرتك متحامل علينا جداً وباين من طريقة كلامك مع إن أول مره أتشرف بيك
عموماً نورت الموضوع وأهلا بيك..........السلام عليكم

يا استاذى
انا مش قصدى ان النظام مش فاسد ولا بدافع عنه
لكن عنوان الموضوع ده كان تعليقى
العنوان اللى مكتوب " تشبيه بسيط علشان الناس اللى مش عايزه تفهم ربنا يكرمهم ويفهموا يارب" والتعليق كان على الموافقة على الحاجة للتظاهر من عدمه وتحاورك مع اتنين مع المختلفين معك فى الراى
اقرا حضرتك العنوان وهتلاقى معناه ان اللى مختلفين فى الراى مش عايزين يفهموا
وممكن يكون قصدك غير كدة لكن ده اللى ممكن يبان لاعضاء تانيين

باقى المشاركة كان تعليق على حوار حضرتك عن جزئية عملية الجراحة فبالتالى اديت ليك تشبيه اخر
وتقبل احترامى ليك
ولو شفت منى تحامل ...... اعرف انه غير مقصود

**fepsceasar** · 10-03-2011 02:04 AM

ارى كل الحق مع صاحب الموضوع
وزى ما قولت كان فى ناس كتير فاكرة 25 يناير لعب عيال وهيخلص من غير حاجة وولما لاقوها بقت ثورة ونجحت خسوا انهم انهزموا فكريا فبقوا ضدها على طول الخط، مع ان الغالبية العظمى كان مدى مساندتها فوق وتحت مش ثابت فى خط واحد ، لكن فى النهاية كان تغيير النظام الديكتاتورى شئ ضرورى واسعد تاس كتير حتى اللى كانوا بعد كل خطاب لتدليك المشاعر بيقولوا كفاية كدده الثورة حققت مطالبها
العنوان سليم لان الراجل بيقول اللى مش عايزين يفهموا مش اللى ما بيفهموش والفرق كبير
فى ناس مش عايزة تفهم بارادتها، حتى بعد الفساد والتعذيب اللى شافته كان بيحصل ولسة شايفين ما هى كانت ماشية طالما لسة بعيد عنى بس المشكلة مهما شوفتها بعيدة انت ممكن تتاثر بيها. وصدقنى معظم اللى كانوا بيعتقلوا كانوا حاسين انها بعيدة عنهم وهم مالهومش فى السياسة لغاية ما وقعت الفس فى الراس ولاتفه سبب، انت كان ممكن ضابط امن دولة يكسر عليك بعربيته وتقولوا ايه اللى انت بتعمله ده، يوقلك انت عارف انت بتكلم مين ويهددك وما تروحش بيتك يا اما تدوس على كرمتك
كنت برضه هتقول مش مشكلة كرامتى اهى ماشية

-

الموضوع: تشبيه بسيط علشان الناس اللى مش عايزه تفهم ربنا يكرمهم ويفهموا يارب

LinkBack

أدوات الموضوع

عرض

تشبيه بسيط علشان الناس اللى مش عايزه تفهم ربنا يكرمهم ويفهموا يارب - انشر الموضوع فى :

-

-

-

-

-

-

المواضيع المتشابهه

=-=-=-=- ياريت الناس تفهم و تبطل فهلوة =-=-=-=-=-

استفسار بسيط من الناس اللى فاهمة

يارب الناس الجامده هى اللى ترد

مقابلة استثنائية جدا علشان الناس اللى زوغت امبارح

الكلمات الدلالية لهذا الموضوع

المفضلات

المفضلات

ضوابط المشاركة