الموضوع: يا تري بتطلب فاتورة بمشترياتك.او الخدمات المؤداة ليك ..من اي حد...!!!؟

دايماً باطلبها بس في الحاجات اللي انا عارف اني ممكن ارجع له فيها
زي ما كنت عاوز اشتري انذار وسنتر وصممت مشتريهمش غير بفاتورة
وبعد لف ييجي ساعتين ملقيتش حد يبيعلي بفاتورة فقلقت ومرضيتش اشتري
لما تيجي تشتكي لجهاز حماية المستهلك مش بيرضى يستقبل شكوتك الا لو كان معاك فاتورة
عشان كدة بقت الفاتورة أول حاجة في طريق رجوع الحق قصاد كتير من التجار الجشعين

أحب أضيف على الحاجات اللي حضرتك قلت لازم تكون موجودة في الفاتورة انها لازم يبقى مكتوب عليها مطبوع او حتى بختم رقم التسجيل الضريبي ومأمورية الضرائب التابعة لها المنشأة

انا بطلب فواتير فى حاتين بس
انى بشترى حاجه ذات قيمة علشان لو طلعت بايظه أعرف أتكلم مع المكان الى اشتريت من
أو انى بشترى حاجه لحد تانى علشان ميبأش فى شك
غير كده باه فتورة من الحلاق وفتوره علشان أشتريت زجاحه عصير والكلام الاهبل ده لأ طبعا

المشاركة الأصلية كتبت بواسطة TAG_Turbo0

غير كده باه فتورة من الحلاق وفتوره علشان أشتريت زجاحه عصير والكلام الاهبل ده لأ طبعا

تاج باشا...
حكاية فاتورة من الحلاق ومن الدكتور ...ومن اي حد بيقدم لك خدمة او حتي فاتورة علشان باكو لبان...مش كلام اهبل ولا حاجة....ياريت مصر تبقي كدة..

انا اول مرة شفت الكلام دة كان في اوروبا...وبقيت مسغرب برضة كدة...بس لاقيت انة نظام عالي قوي قوي..يعني ممكن تعرف انت اشتريت اية وبكام ومنين واي وقت....

تاني مرة شفت فيها الحكاية دي....في الدول العربية....ما شاء الله ...بقوا زي اوروبا في كل شيء..تقريبا...وخصوصا النظام ايلي بيدي شكل حضاري حقيقي مش كلام وبس...

يعني لو حبيت اركب تاكسي ...واطلب فاتورة ..بيديني فاتورة...ودي ليها مميزات كتيرة...
اولا : دة اثبات قيمة الاجرة المدفوعه....(في حالة انك هاتسترد القيمة دي...علي حساب الشركة مثلا لو كنت في مأمورية)
ثانيا : السواق ما قدرش ينصب عليك ...لان موضح فيها انت راكب من فين ولفين ...
ثالثا: فيها ميعاد ركوبك ...وميعاد وصولك ...لانها بتنطبع برة من مكنة السواق بيشغلها لما تركب ويطبع لما تنزل...ودة اثبات علي تواجدك في التاكسي خلال الفترة الزمنية دي...(يعني لاقدر الله حصل شيء يبقي انت تعرف تثبت انت كنت فين)
رابعا: حق الدولة في انها تاخد ضريبة من خلالها ترصف بيها الطرق وتبني مستشفيات وخدمات تانية...

يعني الفواتير ...مش وحشة هي ممتازة....بس احنا ايلي مش متعودين عليها ...زيها زي اي شيء منظم ..

انا امنية حياتي ...اني الاقي اي شيء بيتباع او بيتشري يبقي بفواتير.....

المشاركة الأصلية كتبت بواسطة hazem_khidr

مش دايما بتفوتر :).
استحاله اروح اشتري علبه سجاير او احط بنزين اطلب فاتوره.

و لما بشتري خيوط او مستلزمات انتاج للمصنع مش بطلب فاتوره.
انما قطع الغيار بطلب فاتوره علشان اضمن حقي في ترجعها.

لا انا لبا مقلق اطلب فاتورة
مثلا بعد مشاكل البنزين بقيت لما ادخل من بنزينة مش واثق منها اطلب فاتورة
او لو سلعة عليها ضمان
او عشان ادخل سحب اللانسر ex في كارفور
او بغتت على البياع
غير كده لا

مستحيل تبقى الفواتير بالسهوله اللى بتتخيلها يا هيرو

معتقدش لو رحت تجيب لتر بيبسى من سوبر ماركت هتقوله هات فاتوره

او اشتريت كيلو خضار هتقول للبايع هات فاتوره اظن ده مستحيل

لكن الفاتوره فى الاجهزه والاشياء اللى عليها ضمان ضروريه وبنطلبها طبعا

انا فى العادى بطلب فاتورة لكل حاجة بشتريها

لو مفيش ساعات بكبر دماغى, لكن فى اوقات بتبقى طالبة معايا اغلس على البياع و ممشيش غير بفاتورة مختومة و سليمة

انا فى بعض الحاجات باخد بيها فواتير و بعضها لأ يعنى طبعا م هروح عند دكتور و اقولى ادينى فاتورة و عند الحلاق نفس الكلام و بعض الحالات اللى شبه ديه


انما فى اى سوبرماركت كبير باخد فاتوره البنزين باخد فاتوره اى اجهزه بشتريها باخد فاتوره