-
مشكلة الشكمان
إزيكم يا شباب ,
انا كتبت من فترة بسيطة عن احتياجي لورشة للشكمانات (قريبة من منطقة فيصل) لأني دوست على حجر و فيه صوت من الشكمان ,
و الأخوة أفادوني بوجود ورشة في منطقة أبوقتادة اسمها الوصال وورشة في المطبعة للأسطى موافي ,
المهم روحت عند الورشة اللى في أبوقتادة و لاقى خرم فعمله و شغلنا العربية لاقينا صوت فقاللي محتاج تغير اليّاي فرحت جبته بـ50ج من المنير و غيره و برده لقينا صوت فقاللي لازم نغير الجوانات الخاصة بالشكمان و بما إن الوقت اتأخر فقاللي تعالي بكرة ,
و مشيت بس مكنتش مرتاح لكلامه , المهم رحت للورشة التانية (موافي) و الراجل أول حاجة عملها انه فك الشكمان كله (فانا قلت باين عليه بيفهم) و لقى كسر في أحد الفواصل فلحمه و أقترح على انه يلغي العلبة الأولى اللي بعد الياي لأن الفحم اللى فيها بيتسد و بيأثر على سحب العربية و انه في العربيات الجديدة بقت بتنزل بعلبتين شكمان بدل تلاتة (انا عربيتي لانوس1 مو2000) ,
فالمهم قلت أجرب و قلته ماشي فخرج الفحم الموجود في العلبة و وضع ماسورة بطول العلبة و لحمها من الأول و الآخر فأصبحت العلبة مجرد شكل و من جوه ماسورة و الحقيقة محستش بفرق في السحب (يمكن هي أساساً مكنتش اتسدت) ,
المهم بعد كل ده لقيت في صوت بسيط برده و موافي قالي ان العلبة اللي في الوسط محتاجة تتغير لأن المصفى اللي فيها مش ثابتة و دي بتعمل صوت في السلانسيه و التسخين بس ,
انا آسف إني طولت عليكم بس عايز أعرف رأيكم في الكلام اللي حصل ده.
-
بص عن خبرة فى الدايو 10 سنين... مفيش علبة شكمان بتتصلح
لما العلبة تعمل مشكلة غيرها لانك ببساطة حتلصمها و بعدين حتغيرها كدة كدة
علبة البيئة تفرق معاك فى السحب من 5000RPM و انت طالع.. و الفحم اللى فيها بيتباع... انا بعت علبتى ب 200 جنية
MMamdouh
-
معلشي يا استاذ ممدوح تاني كدة
فحم اية الي بيتباع انا كدة شكلي اتنصب عليا
لان غيرت الشكمان والرجل خد القديم
ممكن تفهمني
-
المادة اللى جوة علبة البيئة بيتقال عليها فحم... و دى مواد كيماوية بتعالج غازات العادم
المادة دى بتتباع غالى و انا بعت علبة البيئة بتاعتى ب 200 جنية
MMamdouh
-
ايه العمل
يعني هو كده اشتغلني ,
طيب هل السيارات الجديدة (بعد موديل 2004) فيها العلبة دي ,
و هل لازم أشتريها مرة تانية بدل الشغل اللي عمله و الا مش ضروري ,
معلش كمان سؤال تاني هل في فرع لأبو اليزيد في فيصل أو الهرم و ما هو تليفون أبو اليزيد.
-
كل العربيات بتنزل بعلبة او علبتين لمعالجة غازات العادم معدا السيارات اللى عفا عليها الزمن و مازلنا بنجمعها مثل ال 128 و الشاهين
انت مش محتاج علبة البيئة فى حاجة ولا محتاج تغير حاجة فيما يخص الشغل اللى اتعمل فى علبة البيئة
مصنع ابو اليزيد فى المنطقة الصناعية الاولى تقريبا فى 6 اكتوبر... مشهور اوى و مش حتتوه لو سالت عليه
MMamdouh
-
سعر علبة الوسط
انا النهاردة عديت على المنير اللي في فيصل و قلتله على علبة البيئة و قالي اني مش محتاجها و ان الغاء العلبة من خلال ماسورة (زي ما فني الشكمانات عمل) ده شغل صح ,
و بالنسبة لسعر علبة الوسط لشكمان اللانوس فهي بـ 130 ج بالوصلات اللي معاها .
Content Relevant URLs by
vBSEO 3.6.0 PL2