انتاج شيري a11 هيستمر ..........؟

ياشباب a11 انتاج شيري هيستمر للعربيه دي ولا خلاص علي كدا ....؟العربيه بقلها اكتر من سنتين في السوق قطع غيارها انتشرت خارج التوكيل ولا لسه.....؟اخبار التوكيل ايه مع مالكي الشيري....؟ المعامله الصيانه وجودتها قطع الغيار....؟ الضمان بتعها فعلا بيغطي عيوبها ولا ضمان اي كلام....؟وسؤال اخير عن a11 لونج هيا فعلا عربيه يعتمد عليها وخصوصا لوحد حياته كلها سفر بالعربيه ولالا...؟وبعد اذنكم ممكن تقوللي عيوب العربيه ايه بالظبط عشان اعرف اذا كنت هتقبل العيوب دي ولالا....؟ارجوكم المساعده وشكرا :confused::confused::confused:

افهم من عدم الرد ايه....ان محدش عارف...حد عارف وخايف يقول...العربيه ماضي وانتهي....الصيني فعلا اثبت فشله زي مالناس توقعت....انا بصراحه مش فاهم فين الناس اللي بتحارب عشان تثبت وجود العربيات الصيني مع اني بحاول الجاء ليهم دلواقتي عشان اعرف خبرتهم........................وشكرا لعدم المشاركه

:eek:ياملاك شيري a11 اين انتم..........................

اقتباس:

---

المشاركة الأصلية كتبت بواسطة timo_crosswind

:eek:ياملاك شيري a11 اين انتم..........................

---

نحن هنااااااااااااااااااا
طيب يا اخى لماذا لم تضع سؤالك هذا فى قسم الشيرى لكى نراة
المهم موضوع استمرارية انتاج شيرى a11 انا مش متأكد منة لكن اسيارة لها ما يقرب من 5 سنوات فى السوق مش سنتين كما قلت أنت
و على فكرة الشيرى a15 هى نفسها a11 مع اختلافات بسيطة كالتابلوة و الشكل الخارجى و الصالون اما الموتور و العفشة واحد
فلا تقلق من موضوع قطع غيارها و خاصة انها هى نفسها نفس شكل و مواصفات سيات توليدو موديلات من 94 الى 97 على ما اتذكر فوانيس و عفشة و تابلوة و كل شئ تقريبا فأنت ممكن تشتريلها قطع غيار التوليدو موديل 94 حتى 97
اما موضوع التوكيل فهو جيد يعنى مش بطال و كل توكيل لة عيوبة سواء ابو الفتوح او غبور و غيرهم من الكبار و الشيرى توكيلها شركة CIG تبع مجموعة شركات السعودى المشهورة و لا تقلق من موضوع السفر بالسيارة فهناك الكثير ممن اعرفهم يسافرون بها كثيرا و السيارة ماشية تمام معهم بسم الله ما شاء الله و عندك المهندس محمد خلف و زملاؤة بالعمل بيسافروا بها بإستمرار و شبة يوميا للعين السخنة منذ سنوات فموضوع تحملها هذا لاتقلق منة كما قلت لك و على فكرة السيارة مع السرعات و الملفات ثابتة جدا جدا و عن تجربة شخصية لأنى املكها و تكيفها جيد جدا
و السيارة انا اراها من افضل السيارات الصينى الموجودة بمصر و تفوق سيارات كورية منتشرة فى مصر و سعرا اعلى من الشيرى a11 و كماليات اقل
توكل على الله و استخيرة و ياريت تعرفنا لو اشتريتها عشان نباركلك عليها

متشكر اوي ياممدوح باشا علي ردك انا بصراحه معروض عليا واحده شيري a11 لونج نهايه 2006 ترخيص 2007 صاحبها زميلي في الشغل بيقول ان العربيه مركونه في الجراج لايستخدمها الا قليل جدا وده عشان معاه عربيه تانيه بيستخدمها العربيه فابريقه بالكامل لونها اسود اللي انا مستغربله انها عامله 1800كم بس خلال المده دي كلها يعني لسه زيرو ....انا كنت عرضه ليه للبيع في قسم اللبيع والشراء وبعدين فكرت شويه وقولت اخدها انا بس انا معرفش اي حاجه عنها بصراحه ومتخوفف منها وبصراحه انا مبشوفهاش كتير مع العلم اني حياتي كلها سفر وبالتالي عاوز عربيه تستحمل سفر وميكنش فيها عيوب تخليني اسيب شغلي واقعد بيها عند التوكيل وعاوز اعرف معدل استهلاك البنزين والعربيه سواقتها مريحه ولالا ..............ارجو المساعده .........مع العلم هخلص معاه العربيه علي 55000 جم كدا السعر اخباره ايه كويس ولا لا.............وشكرا

اقتباس:

---

المشاركة الأصلية كتبت بواسطة timo_crosswind

متشكر اوي ياممدوح باشا علي ردك انا بصراحه معروض عليا واحده شيري a11 لونج نهايه 2006 ترخيص 2007 صاحبها زميلي في الشغل بيقول ان العربيه مركونه في الجراج لايستخدمها الا قليل جدا وده عشان معاه عربيه تانيه بيستخدمها العربيه فابريقه بالكامل لونها اسود اللي انا مستغربله انها عامله 1800كم بس خلال المده دي كلها يعني لسه زيرو ....انا كنت عرضه ليه للبيع في قسم اللبيع والشراء وبعدين فكرت شويه وقولت اخدها انا بس انا معرفش اي حاجه عنها بصراحه ومتخوفف منها وبصراحه انا مبشوفهاش كتير مع العلم اني حياتي كلها سفر وبالتالي عاوز عربيه تستحمل سفر وميكنش فيها عيوب تخليني اسيب شغلي واقعد بيها عند التوكيل وعاوز اعرف معدل استهلاك البنزين والعربيه سواقتها مريحه ولالا ..............ارجو المساعده .........مع العلم هخلص معاه العربيه علي 55000 جم كدا السعر اخباره ايه كويس ولا لا.............وشكرا

---

اللونج طبعا هى نفسها a11 لكن اطول منها شوية اما بخصوص استهلاك البنزين فالسيارة كما هو معروف 1600 سى سى و ممكن تعمل معاك فى الطوالى حوالى 280 كيلو فى الصفيحة و دة معدل معقول بالنسبة لسيارة 1600
و السيارة بتاعة صاحبك كدة تعتبر زيرو و سعرها جديد 70 الف و سعرها مستعمل معقول كدة لإن سعر اعادة بيعها بينزل و متزودش عن كدة و لو عرفت تنزل الفين او تلاتة تبقى برضة مصلحة لأن دة سعرها مستعمل طبيعى يعنى هو المفروض يعمل معاك واجب حتى ولو فى الف او اكتر و انت كدة هتكمل الضمان اللى هو 3 سنوات أو 60 الف كيلو ايهما اقرب
لكن استخير الله طبعا فى اى تحرك تعملة سواء فى شراء السيارة دى او غيرها عشان تبقى مستريح
و بخصوص السيارة دى بالذات لا تقلق ابدا لإنها سيارة تستحق

لاء ممكن تقرص اكتر من كدة
واحدة متباعة في الشغل عاملة 11 الف على 50 بس

شكرا ياخ كريم علي المشاركه

طب انت سئلت زوميلك اللي في الشغل عن ظروف العربيه دي ايه وليه بعها؟

أحنا هنا يا باشا وبراحة شوية
بص بقى أنا عربيتى موديل 2006 وعاملة 41 إلف كيلو - ما شاء الله لا قوة إلا بالله :)- وبسافر بيها للسخنة بصفة دائمة الفترة الأخيرة دية وشغالة زى الفل زى ما الأخ ممدوح قالك
العربية فعلا أتوقف أنتاجها فى الصين بس وبتنتج فى إيران وروسيا بس
اللونج كويسة قووووى وسعرها دة كويس بس أنا مستكبرها قوى فى الحجم دة إللى معايا حاسس أنها سفينة فما بالك باللونج بس لو سفر ومش جوة البلد يبقى زى الفل وتوكل على الله وميزة كبيرة أنك هتجابها مستعملة يعنى فطسانة من الأخر وهو دة المهم

اقتباس:

---

لاء ممكن تقرص اكتر من كدة
واحدة متباعة في الشغل عاملة 11 الف على 50 بس

---

صعب قوى يا كريم السعر دة على اللونج ممكن على العادية أقوللك إة لكن اللونج صعب حبيتين ولو كدة يبقى إللى أشترى صايع بحر على الأخر وكسب صفقة هايلة - ربنا يباركلة

انا شوفت مقاله بتقول ان اتوقف انتاجها في روسيا وموضوع ايران ده بصراحه انا اول مره اسمع عنه ....طب ليه اتوقف انتاجها في بلد المنشا دي معناه ايه...؟وقطع الغيار علي كدا هيستوردوها منين...؟ ولو المصنع بتاع ايران بردو اتقفل هيكون ايه الحل...؟ بصراحه الموضوع يقلق ...بس انا شايف ان فعلا العربيه حلوه بس المهم بعد كدا وبصراحه انا مش شايف انتشار مبشر للعربيه يعني الاسبيرانزا اللي نزلت بعدها رغم العيوب الكتير اللي سمعناها عنها بس محققه انتشار واضح وملحوظ ...ده تفسيره ايه...؟وقبل كل ده فرصه سعيده يابشمهندس

بص يا باشا
قطع الغيار متقلقش منها لأنها مش هيتوقف أنتاجها لأنها أولا وأخيرا مكسب ليهم وكمان عندك الأستيراد مخلاشى حاجة ومتنساشى أنها هية هية التوليدو وعائلة الجولف يعنى التباديل والتوافيق مش هتنتهى - أنا لغاية دلوقتى محتاجتش أجيب قطعة غيار من التوكيل - يعنى تيل الفرامل جيبت بتاع الأنكا والوجيهات عادية 3 شمعة والفلتر عادى وموجود فى السوق وأن شاء الله فلتر البنزين هغيرة قريب وأكيد هيبقى موجود فى السوق وكمان فلتر الهوا شكلة زى بتاع الآبيزا

الأسبيرانز طبعا أحسن لكن موضوع أحتكار قطع الغيار وعدم توافرها إلا فى التوكيل ملقق الواحد شوية لأنة أمر مش سهل

طب ازاي الاسبيرانزا احسن رغم العيوب الكتير اللي سمعناها عنها ومن كلامك ان الشيري a11 حتي الان مظهرش فيها عيوب او علي الاقل عيوب زي عيوب الاسبيرانزا....ممكن اعرف انت قولت علي الاسبيرانزا احسن علي اي اساس بغض النظر عن التوكيل ...ممكن مقارنه بسيطه بين العربيتين؟

باشا عيوب الأسبيرانز لا ترقى لمستوى العيوب ومتنساشى أنى لكل عربية مميزات وعيوب وحجم اللميزات بالنسبة لحجم العيوب هوة اللى بيحكم فى الأخر - وعلىالعموم موضوع ال A11 والأسبيرانز مسألة ميزانية وبس فى الأخر

يعني انت شايف ان الاتنين تقريبا نفس المميزات والعيوب يعني الشيري مش مميزه عن الاسبيرانزا باي شئ والاتنين نفس السعر ....بس انا كدا عرفت سر انتشار الاسبيرانزا عن الشيري....شكرا للتوضيح يابشمهندس

إى خدمة يا باشا