في مطبخي صراصير

**a_samy** · 11-03-2011 09:33 PM

في مطبخي صراصير
سيبكوا بقى من الكلام في الثورة و وجع الدماغ دة ,,,, انا عندي مشكلة كبيرة من كام يوم لقيت صرصار فى المطبخ ,,, جريت جبت اكبر شبشب و اديته فوق دماغه و رحت غسلت ايدي و انا فرحانة بنفسي و حاسة اني جبت الديب من ديله ,,, يومين كدة لقيت واحد تاني ,,, قلت لأ بقى... رشتين فليت الجبار و قضيت عليه و مش قادرة احكاكوا على احساسي بالانتصار ,,,, تاني يوم الصبح دخلت المطبخ لقيت صراصير في كل حتة ,,,, يالـــهوي اعمل اية الفليت و الشبشب و اديلو معرفتش اعمل حاجة ,,, افتكرت اني كنت قريت عن شركة بتقضي على الحاجات دي ,, كلمتهم و كتر خيرهم جم على طول ,,,, دخلوا المطبخ , رقعوا بالصوت : اية كل دة يا مدام ازاي ساكتة كل دة ؟؟!! قلتلهم لأ انا بالشبشب و و الفليت و عملت الي عليا ,,, المهم قالولي احنا لازم نرش و نفضي المطبخ كله,, قلتلهم: كله؟؟!!!!!! السكر دة هترموه ,,, الرز دة خلاص,,,, السمنة دي ف الزبالة ؟؟؟؟ قالولي لازم تضحي علشان ننضف المطبخ ,, قلت امري لله.... فضلت يجي 18 يوم مش عارفة اطبخ و لا عارفة ادخل المطبخ ,,,, زهقت قلتلهم لسة مخلصتوش قالولي لسة فاضل شوية ,,, قلتلهم لا كدة كفاية انا زهقت ,,,, طاب يا مدام فاضل التلاجة و الركن دة لازم يترشوا ,,, طاب يلا اخلصوا ,,, اسبوع كمان ,,, كفاية انا تعبت و مش بطبخ و المطبخ ريحته مبيدات,,,, طاب يا مدام نمشي قبل منخلص,,, اه ,,, نمشي يا مدام و نسيب لسة مكان مستخبي فيه صراصير ؟؟!!!! اه امشوا انا عايزة اطبخ ,, مشكفاية الرز و السكر و السمنة الي رميتوهالي ؟؟؟!!!! الله يا مدام ما انتي الي قلتي نقضي ع الصراصير ,,, اة انا قلت بس خلاص انا زهقت ,, انا عايزة اعيش حياتي ,, خلاص عيشي حياتك و ارجعي ادخلي المطبخ بس الدرجين الي لسة منضفوش دول هيجيبوا صراصير و صراصير و ساعتها ماتلوميش الا نفسك.

ها ناويين تسيبوا بقية الصراصير علشان تكتر تاني وتتوحش ولا هتخلصوا عليها كلها ؟؟؟؟؟؟

منقوله

**Mohamed_Rashad** · 11-03-2011 10:13 PM

لا طبعاً نصبر شويتين مش شوية و نستحمل عشان نخلص على كل الحشرات و الزواحف.
و لا الناس أدمنت العيشة مع الحشرات و الزواحف?!

**aif** · 11-03-2011 10:31 PM

اهم حاجة تكوني واثقة في الشركة ..... وواثقة انها ح تخلصك من الصراصير ... ومش ح تسيبهم يستخبوا في الشقوق وبعدين يطلعوا تاني
...
وبرضه لازم تشاركي بنفسك في القضاء عليهم وتسليمهم للعدالة .... قصدي وضربهم بالشبشب
...
وماتنسيش كمان الدعاء
ادعي ربنا يخلصك منهم ومن شرورهم
واخيرا
ربنا يحفظلك بيتك من الصراصير ومن كل انواع الحشرات المتطفلة ... ويبقى بيتك نظيف وجميل .... ويباركلك في ولادك ويديهم الصحة ويقدرهم على مكافحة الصراصير هما كمان

**Mohamed_Rashad** · 11-03-2011 10:50 PM

المشاركة الأصلية كتبت بواسطة egyptiandiver

Buy Kirox for ants & cockroaches it will end ALL your problems. My mum tried many things but the ONLY thing that cut all the ants out was Kirox - Yalla , Good luck

I'm afraid that it's NOT enough :)))

**MASERATI** · 11-03-2011 10:52 PM

السلام عليكم و رحمة الله و بركاته

أنا من رأيى أن الصراصير لا تستحدث من العدم و الصراصير بتبقى بدايتها بيض صراصير .

يعنى اللى مطلوب منك, أنك تسدى كوووووووووول الشقوق اللى ممكن يكون فيها بيض صراصير أو صراصير صغيرة فى البيت عندك و تسيبى الشركة تكمل شغلها و تاخدى بالك من:

أى حاجة هتخش البيت بعد كده, ممكن تكون حاوية فى قعرها بيض صراصير على أساس أنها جاية من مكان فيه صراصير, زى مثلا, كرتونة مياه معدنية أو أنبوبة البوتوجاز و الحاجات التانية اللى زى دى, الأفضل أنك ترشيها بالفليت بتاع الصراصير من بره من ناحية تحت قبل ماتدخليها البيت و الله المستعان .

**aif** · 11-03-2011 11:00 PM

خلي بالك كمان يا ست البيت
الصراصير بتتأقلم مع المبيدات بعد فترة
لازم يبقى بيتك نظيف علطول .... بلاش كسل ونظفس اول بأول
والمطبخ بتاعك دايما عمران و فيه أكل ..... يعني مطمع للصراصير ... سواء اللي في بيتك او اللي جاية من عند الجيران
...
والوقاية خير من العلاج

**م.محمد علاء** · 11-03-2011 11:24 PM

أنا مش عارف...بس حاسس إن زي ميكون فيه ناس ردت..
و هي متصوره إن فعلا فيه عضوه عنده مشكله في وجود صراصير في المطبخ..
هي الناس مش بتقرأ الموضوع للأخر ولا إيـــــــــــــــــــه؟
ولا انا اللي بيتهيألي؟؟؟؟
__________________________________
أعتقد إن الصراصير الباقيه في الأدراج ترمز لفلول نظام مبارك البائد..
و إن إستعجال ربة المنزل هو إستعجال بعض فئاش الشعب على الإستقرار..
مش هو ده بردو مغزى القصه ولا أنا اللي فاهم غلـــــط؟