سوال بخصوص تصليح موبايل اتنقع في مياه

من 3 شهور كنت جبت موبايل سامسونج ستار واي فاي تاتش المهم الشغاله منها لله خددت الهدوم وكان فيها الموبايلونقعتها في الميه حوالي 10 دقائق المهم طلعت الموبايل وكان مال يشر في مياة وجريت بيه علي العنيا المركزة بتاع الصيانه المهم فتح الموبيل وقعد ينشف فيه وصبر عليه شويه وقالي ربنا يستر البطاريه كان فيها قفله وقالي كويس انك اخدت باللك وشلت البطاريه عديت عليه بعدين قالي اصبر هنغير الفلاته وربنا يسهل
المهم هو فيه امل انه يشتغل ولا كدا البقاء لله
وايه حوار الفلاته في موبيل تاتش اصلا
وقبل كدا وحد صحبي غسل هدومه وكان معاه موبيل زي ده بالظبط ونسيه يوووووووم في الميه راح التوكيل قاوله البردة سليمه والشاشه باظت طب الشاشه بكام قاله ب 600 جنيه!!!!!!!!! هل معقوله الرقم ده
وياريت الي عنده خبرة يفدني لا احسن انا محروق وبفكر احاسب الشغاله

ايه يجماعه هو محدش غسل موباله قبل كده ولا ايه :-)
وسوال كمان اطلع بيه علي توكيل سامسونج احسن ولا اخليه اخر حاجه

بص يا باشا .الآول الفلاته عباره عن كابل بينقل الداتا من ماذر بورد التليفون الي الشاشه.ومش ممكن الفلاته اللي هيركبها هتكون زي الاصلي.
المفروض اول ما الموبايل يقع في المياه تشيل بطاريته علي طول لكن في حالتك اليطاريه فضلت فيه شويه وده ضرره كبير شويه وما اقدرش احدده
.مش عاوز ازعلك بس انا بقولك حقايق ومن واقع تجربه حصلت معايا في موبايل NOKIA N 80 وقع في مايه وشيلت منه البطاريه علي طول ونشفته ومسحته وشغلته واشتغل تمام لمده 6 شهور وابتدت المشاكل في الشاشه .التليفون شغال بس مش شايف حاجه علي الشاشه .غير فلاته مرتين
وفي الاخر زهقت واديته لواحد.يا رب يكون ضررك اخف.تحياتي
bemo,ire

ربنا يجيب العواقب سليمة :_Alshmokh22[1]:
انت فكرتنى بموبايلى القديم كان سامسونج x120
وقع منى فى الغسالة وكانت مليانة مياه رحت واخده منشره فى البلكونة لحد مانشف :W_030:
ولسه شغال زى الفل حتى الان:monkey1:

نفس الموبايل دة وقع مني في المية ... بس انا اتغبيت و حاولت اشغلة علي طول منفعش طبعاً و انا كدة عكيتها اكتر ..
و ديتة التوكيل معرفوش يصلحوه ... وديتة بعدها مركز صيانة عندي في شبرا صلحهولي و بقي تمام قوي من ساعتها ...
و بعد كدة عرفت ان اي حاجة الكيترونية لو قعت في المية ... تشيل منها مصدر الكهرباء و تسيبها في رز و تفضل مغطيها بيها يومين كاملين ... لانة بيسحب الرطوبة بسرعة جداً و بكفاءة عالية ....

انا حصل معايا في موبايل سوني اريكسون نزلت بية حمام السباحة و شلت البطارية على طول و سبتو في البلكونة يوم ورجع اشتغل زي الفل

ان شاء الله تكون مشكلة بسيطة و تتصلح و الجهاز يرجع بحالته من تاني
بالنسبة لي انا تجربتي كانت مش كويسة في الموضوع دا
انا كان معايا نوكيا e72 و مكنش له شهر معايا وللأسف وقع مني في الميه بس انا لحقته في ثواني و طلعت البطاريه و شغلت بلاور علي الجهاز حوالي 5 دقايق و ركبت البطارية و حاولت اشغله تاني مشتغلش
فكيت البطارية وسبته للصبح علي اساس اني هودية للصيانة و الصبح قلت اجرب تاني و ركبت البطارية و شغلته راح اشتغل بس كانت سامع صوت تشويش و حسيت ان الجهاز سخن في ايدي و قفل لوحدة

رحت بيه لبتاع الصيانة و لغاية دلوقتي ما اتصلحش و الكلام دا من شهر 6/2010
الراجل بيقول انه شغله بارو و كل حاجة بس مش لاقط شبكة
و المشكلة ان الجهاز مالوش قطع غيار علي حد قول بتاع الصيانة

و طبعا انا فقدت الأمل فيه بقاله دلوقتي 9 شهور

أنا والدى معاه 6120 كلاسيك نوكيا اختى حطيته فى الحوض بس قعد بتاع ساعتين او تلاته فى الميه ومأخدتش بالها:grin06: المهم ببايا وداه لواحد يصلحه قالوا ده محتاج شاشه والبطاريه اتنفخت المهم قالوا ماشى وأخد 160 جنيه:pffft: المهم والدى جابه و جيه يحطوا على الشاحن موش قابل شحن نزل للواد تانى قالوا دايرة الشحن بايظه وعاوز 60 جنيه :durak:راح ببايا دافع وجيه حطه على الشاحن وتمام التمام راح جايله تليفون واكتشفنا ان المايك لازم تعلى صوتك قوى علشان اللى بتكلمه يسمع :azuztao:نزل للواد قالوه ده عاوز أى سى مايك المهم والدى قال موش مشكله نتكلم بالهاند فرى وجيه يركب كارت الميمورى لقى ان بيت كارت الميمورى موش شغال :breakpc1:المهم والدى اتنرفز وقالوا طيب انا عاوز ابيع التليفون ده قالوا ب 150 جنيه :36_2_49[1]:
فا من هذا المنطلق قبل ماتوديه اى مكان يتصلح قولوا اكشف على كل حاجه علشان هيصرف معاك
المهم التليفون مركون عندى ووالدى عاوز يبيعه اللى ليه سكه فيه يبعتلى على الخاص

أحب أطمن سيادتك ..
الموبايل عموماً إذا وقع في الماء كل ما يمكن عمله ببساطة يتم فك الجهاز وغسل الأجزاء الداخلية ببنزين لإزالة آثار المياه من على المكونات ( الموذر بورد - دائرة الشحن - دائرة الإرسال والإستقبال ) بواسطة فرشاة أسنان ثم ترك هذه المكونات في الهواء حتى يجف .. ثم إعادة تجميعه .
في حالة الموبايلات الصغيرة يمكن عمل كل ذلك بنفسك ..
أما في الموبايلات المتقدمة مثل موبايلك يجب عمل ذلك عند متخصص ولكن إحرص على أن يكون ماهر ( حتى لا يسئ حالته بمعنى لا يصلح شئ ويخرب شئ آخر ) وأمين حتى لا يقول لك فتح ونصب ..

انت من الزقازيق

فيه واحد اسمه محمد (اعتقد محمد فتحي) بتاع صيانه موبيلات فاتح في برج على زكي

هو انسان امين وشاطر جدا

خليه يشوف الموبيل ويقولك هيكلف كام الاول .. لو عجبك السعر صلحه

لو لقيت التكلفه كبيرة فكر في شراء موبيل جديد وريح دماغك

شكرا يا جماعه علي ردودكم
الراجل قالي منفعش وقالي اطلع علي توكيل سمسونج جرب

اقتباس:

---

المشاركة الأصلية كتبت بواسطة ain2006

انت من الزقازيق

فيه واحد اسمه محمد (اعتقد محمد فتحي) بتاع صيانه موبيلات فاتح في برج على زكي

هو انسان امين وشاطر جدا

خليه يشوف الموبيل ويقولك هيكلف كام الاول .. لو عجبك السعر صلحه

لو لقيت التكلفه كبيرة فكر في شراء موبيل جديد وريح دماغك

---

وكمان عرفت انا ساكن فين:-)
دا يباشا في الدور التاني في البرج وهو اول واحد جريت عليه بس طلع قافل فا نزلت لعمر (قورة فون)