الموضوع: حكاية أم صابر ..... حدوتة من قلب الريف المصري

كان ياما كان في سالف العصر والاوان ولا يحلى الكلام الا بذكر النبي عليه الصلاة والسلام
كان فيه واحد ست فلاحة اسمها خضرة وعشان الناس في الريف مش بيحبو ينادو الستات بأساميهم كانو بيسموها ام صابر
ام صابر كانت فلاحة بسيطة بتجري على عيالها التمانية الأيتام ... اتنين من جوزها الاول وستة من جوزها التاني
وكل اللي حيلتها 3 قراريط أرض بتزرعهم وتربي عيالها
اكلهم كان معظمه عيش بتاو وجبنة قريش وشوية مش وخضار من اللي بتزرعه في الارض فجل ولفت وبصل وجرجير ولما يبقى فيه موسم كانت بتدبح جوز فراخ ولا وزة وياكلوها سوا ويحمدو ربنا
ومن شهر تقريبا داست ام صابر على شوكة في الارض وانغرست في رجلها
ام صابر استحملت وجت على نفسها وفضلت تشتغل في الارض عشان تأكل عيالها
لكن لما الالم زاد ورجلها ورمت وبقت مش عارفة تزرع زي الاول وعيالها بدأو يجوعو ما قدرتش تستحمل
قام الواد صابر ابنها موديها للحكيم
الحكيم قالها رجلك فيها خراج يا ام صابر ولازم يتفتح
قالتلو بس انا خايفة يا دكتور
قالها ما تخافيش ده من مصلحتك ومصلحة عيالك علشان تقدري تشتغلي وتربيهم
وبالفعل اتفتح الخراج
ام صابر بقت مذهولة وهي شايفة الصديد والتلوث خارج من رجلها
وقالت الحمد لله غمة وانزاحت اروح بقى اشتغل في غيطي عشان العيال
الدكتور قالها لأ يا ام صابر لازم الخراج يتنظف كويس وينزل كل الصديد اللي فيه
وبعدين يتطهر قبل ما يقفل
علشان لو قفل على تلوث ح يرجع اكتر م الاول وممكن والعياذ بالله يعمل في رجلك غرغرينا ونضطر نبترها عشان تعيشي
ام صابر قالت يا دكتور طب والعيال دي مين ح يأكلها ؟؟؟
رد الدكتور وقالها يعني يستحملو شوية ولا رجلك تتقطع وماحدش يأكلهم طول عمرهم ؟؟؟
وام صابر لقت كلامه صح وفضلت تبص على الصديد والقيح اللي بيخرج م الجرح اللي في رجلها وهي متألمة ومستغربة .... كل ده كان فين ؟؟؟ كل ده كان جوا جسمي من اسابيع وانا مش حاسة ؟؟
وبعدين بدأ الدكتور يطهر الجرح بالكحول وصبغة اليود .... وصرخت ام صابر م الالم لكنها استحملت لجل الجرح ما يتطهر
ولما رجعت ام صابر للبيت وهي تعبانة لقت ولادها متخانقين مع بعض ولاد جوزها الاولاني متخانقين مع اخواتهم من جوزها التاني مع انهم اخوات م الام
ام صابر راحت متحاملة على نفسها وقايمة جايبة الخرزانة وراحت صارخة فيهم وقالت
ده وقت خناق انتو عاوزين تفرجو علينا الخلق .... عاوزين جيرانكو يقفلو عليكم الترعة اللي بنسقي منها ويبوروا أرضكم ؟ ولا عاوزين ولاد عمكم منهم لله يحطو اديهم على الأرض اللي وارثينها عن جدودكم ؟
قسما بالله لو ما اتعدلتو ونزلتو تشتغلو في الأرض و وقعدتو كلكو تاكلو سوا ع الطبلية وتشربو من نفس الكوز لكون نازلة عليكم بالخرزانة وانا مغمضة عنيا ومطرح ما تيجي تيجي
وفعلا كلهم سكتوا وقعدو سوا ع الطبلية وكلوا سوا م اللي موجود وكأن شيء لم حصل



وتاني يوم ام صابر خفت ورجلها بقت زي الفل ورجعت تاني تزرع ارضها وتربي عيالها أحسن م الاول 100 مرة
صحيح ام صابر دي ست لكن ب100 راجل

..
وتوتة توتة خلصت الحدوتة
حلوة ولا ملتوتة