الموضوع: الترخيص فى مرور العجوزة

اليك تجربتي انا مرور العجوزة وجددت من كام يوم :

الأول قلت يا ترى اروح مرور العجوزة ولا بين السرايات قلت اروح العجوزة

رحت لقيته شغال .. قلت كويس .. ركنت العربية ونزلت لقيته زحمة موت عمره ما كان كده وكله موتوسيكلات.. يا نهار اسود ايه اللي حصل.. سألت ظابط على الباب قال لي انه شغال لوحدات مرور امبابة وان شغل العجوزة اتنقل بين السرايات

رحت بين السرايات .. ركنت بعيد لأن الركنه هناك من رابع المستحيلات

هو زحمة لكن معقولة ومنظمة

ابدا بالمخالفات .. النيابة الدور الأول شباكين للعجوزة وشباكين للدقي وشباكبن لفيصل وشباكين لحاجه كمان
المهم حوالي ساعة واستملت شهادة المخالفات سليمة الحمد لله ودفعت 5 جنيه (معظم الناس كده ما الملفات اتحرقت كلها) انما فيه ناس بيجيلها برضه مخالفات من 200 الى 500 جنيه وفيه شباك للتظلم وتدفع اقل شوية

تنزل بعد كده امام المرور في الشارع كشكين لشركات التأمين مش هتلاقي الشركات اللي نعرفها مصر والشرق والكلام ده انما هتلاقي المصري السعودي ومش عارف ايه .. مش مهم اهو كله شوكولاته

بعد كده من كشك جوا المرور تشتري ملف جديد وفيه طلب التجديد تملاه

وفيه صالة داخلية لمرور العجوزة كله في حته واحدة داخل الصالة دي ونفس الموظفين بتوع العجوزة اللي اتعودنا عليهم

مكتب في النص عليه السيدات هتكتب لك استمارة الدفع والموظفة على المكتب اللي وراها تراجع على الكمبيوتر وتطبع مستند ومن خلاله تدفع في الخزنة اللي هي المكتب الديسك اللي جنبها ما هم كلهم في حتة واحده وبعدين تنتظر شوية وبعدين مكتب جنبهم يراجع ومكتب منهم يطبع الرخصة الجديدة والظابط يوقع عليها ومكتب يتم تغليفها وكل المكاتب دي في نفس الصالة الواسعة اللي فيها الموظفين مع العملاء في مكان واحد علشان نحس بالألفة

بس خلاص

الوقت الاجمالي حوالي 3-4 ساعات

الزحام معقول جدا انما كل مكتب لازم يعطلك شويتين تلاته

المعاملة طيبة والناس وشوش مألوفة المصريين الطيبين

النتيحة العامة : الحمد لله