يا جماعة ربنا يكرمكو حد يدلنى على الصححح

**mandebularis** · 13-03-2011 04:36 AM

السلام عليكم و رحمة اللة و بركاتة,,,,
أنا الدكتور شريف و برحب على المنتدى و أعضائة بالكامل اللى بجد كلهم ناس محترميين جدا و ولاد ناس و دة بيبان من طريقة الكلام و كمان على حالة الأخوة و العطاء......أدخل فى الموضوع علطول صراحة أنا بقالى أكثر من شهر مش عارف أجيب عربية و حلم حياتى كان دايما ان انا أجيب عربية حلوة و مريحة و تعيش أهم حاجة و وصلت فى النهاية لأقتراحات السيارات الأربعة التالية "1-نيسان صنى اكس 2-هيونداى نيو أكسنت 3-رينو سكالا 4-شيفرولية أفيو"يعن من الأخر حاجة فى حدود ال90 ألف جنية.
بالنسبة للشيفرولية أفيو أنا تقريبا أستبعدتها من كتر الى سمعتة عنها و كمان أتاكدت منة شخصيا طب نيجى بعد كدة للهيونداى نيو أكسنت صراحة الناس كلها بتشكرلى فى العربية دى سواء الى معاة العربية دى واللى معاهوش و كل الناااااس قالتلى ان دى أحسن عربية فيهم طبعا,,بس أنا مشكلتى ان انا فعلا م بحبش الهيونداى حاجة نفسانيا بجد أو بحس ان الشعب كلة معاة هيونداى و بعدين 90% من التكاسى هيونداى بجد حاجة مبيقأة أوى و مرطرطة مش بحبها و خلاصص,,,,,,
طيب بالنسبة للنيسان صنى أنا بجد عاجبانى جدا و حاسس ان بجد السعر دة قليل عليها جدا وحاسس انها بتعيش لأن طول عمرى أعرف ان اليابانى فعلا يمتاز بطول عمرة و ادائة بس هنيجى للمشكلة الرئيسية اللى مقابلانى عند السؤال عن هذة العربية مع كل الناس هى حاجة واحدة دايما"common "انها تقفيل مصرى يعنى من الأخر أى كلام يعنى قلة ضمير فى تركيب قطع الغيار و أجزاء العربية و يعنى كمية المشاكل اللى هاتقابل الواحد بعد كدة بسبب هذا التقفيل المصرى اللى دايما فى السيارات بيبقى سيىء جدا لأن السيارات بالذات عايزة فن و مهارةو اتقان و قبل كل دة ضمير ,,,,,,
نيجى بقى لأخر عربية وهى الرينو سكالا الجديدة فى السوق المصرى يا جماعة فعلا العربية دى حلوة جدا و مريحة فى ركوبتها و الناس بترشحها لأنها زى النيسان صنى بالظبط فى كل حاجة"قطع غيار هى هى النيسان يابانى بردة موتور نيسان صنى مع أختلاف الشكل طبعا""بس الجميل فى العربية دى أنها تقفيل كوووووورى وهو دة الفرق الرئيسى بينها و النيسان صنى اكس يعنى تتلافى عيوب و مشاكل التقفيل المصرى...بس مشكلتى معاها أنها عربية جديدة فى السوق محدش عارف عنها حاجة أصلا فى أصلا ناس أول مرة كانت بتسمع أسمها منى فبالتالى مفيش فى السوق خبرة بصيانتها و قطع غيارها أكيد مش متوفرة,,,,,,,بجد أنا أسف للأطالة عليكم
يس بجد ياريت من المشرفين والأعضاء أى حديفيدنى عشان بجد أنا تعبت من كتر التفكير,,,,وشكرا بجد على وقتكم اللى ضيعتوة معايا,,

**morsi** · 13-03-2011 06:16 AM

ان شاء الله الزملاء يفيدوك.بس حبيت اقولك لو هاتجيب الاكسنت استنى لما ينزل الشكل الجديد مصر.الشكل الجديد نزل هنا فى السعودية وجميل جدا زى السوناتا الجديدة بالظبط بس على صغير.

**superhano** · 13-03-2011 07:44 AM

من وجة نظري الصني أفضل سيارة في هذه الفئه السعريه
اما بقي بالنسبة للتقفيل المصري شوف اللنك ده
http://www.nilemotors.net/Nile/106154-a.html

ربنا يوفقك

**SonaSteel** · 13-03-2011 12:12 PM

السلام عليكم
د/شريف ... كيف حالك يافندم
بص اخي الكريم ... انا كنت في حيرتك ديه واكتر
نمسكهم واحده واحده ديه من وجه نظري ان شاء الله
1- الاكسنت: من غبور ... يعني ايه غبور يعني عربية فاضية وتوكيل فظيع وبشهاده ماليكيها ومفيش وسائل امان والنيو اكسنت انا سألأت عليها مخصوص قطع غيارها مش متوفرة اوي زي القديم وكــــــــــــــــــــــل ده بنفس سعر عربيات تاني توكييلها محترم وتوكيل محترم ووساءل امان وقطع غيار متوفرة وديه هارجعلها في الاخر ان شاء الله
بس انت اعل حسابك انك هاتدفع بتاع 10-14 الف زياده علي تمن اي عربية هيونداي هاتشتريها
الاكسنت الشكل الجديد : حاطولها موتور الالنترا وزودوا سعرها بتاع 14الف ده بعد ماكان زياده اصلا بتاع 10 الاف من موديل 2010
ولو في وساءل امان واتوماتيك بحوالي 109000 تقريبا ... مش فاكر الرقم من ايام الفورميلا .
2- الافيو : من اول يوم فكرت فيها محدش شجعني عليها لا هي ولا الاوبترا برده علشان نفس السبب ... توكيل وقطع غيار وناس من ملاكها اتكلموا في عفشتها كتير اوي.
3- الاسكالا : هما بيقولوا انها نفس الصني الخليجي بس موتورها مش ياباني وكده فقدت اهم ميزة ليها وتقفيلها مشوفتوش بس اضمنلك انه في نفس كفاءة التقفيل المصري وانا عند كلمتي وانزل معاك لاي عربية صني شوف تقفيلها عامل ازاي وقارن بينها وبين العربية الكوري اللي تحددها انت.
وتوكيل رينو محترم الي حد ما .... بس ليه تغامر ادام هي هي نفس الصني كصالون وموتورها كوري؟؟
4- الصني : العربية ديه اللي مظلومة جدا جدا والشائعات مش عارف اقولك انا اتمكنت اوي منها بشكل لا يصدق لدرجة ان زمايلي كانوا بينصحوني بيها ووالله ما كنت ركبتها ولا شوفتها . كنت بقولهم ديه تقفيلها مصري زبتاكل بنزين و كنبتها ضيقة وعفشتها ناشفة
بالنسبة للتقفيل: زي ما قلتلك انزل معاك وشوف تقفيلها بنفسك ماشاء الله عليه.
البنزين : زيها زي اي عربية 1600 ف استهلاك البنزين وعربيات 1300 كمان جوة البلد 200 و 210 فيا لصفيحة
الكنبة ضيقة : علي حسب كرسي السواق... يعني لو طويل ورجعته للاخر وضهره بس طلعته قدام سنه اللي وراك هايقعد مستريح وتاخد 3 كمان ... تخيل لو الكرسيين اللي قدام بقي طلعوا قدام اتبقي عاملة ازاي
عفشة ناشفة : هي في الاول كانت كده وبتنعم كل فترة ... ولو العفشة الناشفة تتضمن لي اداء احسن في شوارع مصر المحروسة وتحترم ل العربية .. اهلا وسهلا بيها .... :)) وبتديها ثبات رائع ماشاء الله
وطبعا موتور وكل مكونات العربية الاساسية ياباني من عفشة وخلافه
توكيل من احسن توكيلات اللي ممكن تشوفها في مصر وبشهاده مالكيها وغيرهم ماشاء الله ... رنا يديمها نعمة
وسائل امان محترمة وصاج متين ودهان محترم
وكــــــــــــــل ده وشوف سعرها بالنسبة لعربيات تاني في نفس الفئه بنفس السعر واعتقد موصلتش ل50% من المميزات ديه
وبكده
سعر ممتاز+موتور وحش+ثبات رائع+ تقفيل محترم+60% مكونات يابانية +وساءل امان +توكيل محترم+توافر قطع غيار ورخيصة =
صنـــــــــــــــــــــــ ي
الحمد لله رب العالمين
ومتنساش طبعا الاستخارة وربنا ييسرلك الحال وتستلم بكل خير ان شاء الله
اقعد بالعافية :))

**mandebularis** · 13-03-2011 01:57 PM

شكرا على أهتمامك .,

**mandebularis** · 13-03-2011 01:58 PM

شكرا بجد على أهتمامك دة و ربنا يجازيك خير العضو sonastel

**Ahmed.TV** · 13-03-2011 02:09 PM

بص يا دكتور ,موضوعك ده عشان تستفاد اكتر بيه اطلب نقله الى قسم المقارنات

تانى حاجة الصنى تقفليها تقفيل محترم جدا , واغلب اللى بيقولوا التقفيل المصرى مش كويس يا اما قرفان من العربية وعنده مشكلة فردية فبيقول الكلام ده او حد بيتكلم بدون علم وبنظام سمعت وشوفت

ودليل على كلامى اتفضل حضرتك وشرفنا فى مقابلة نيسان الجاية واتفرج على الصنى على الطبيعة مع الاعضاء ونفرجك على التقفيل المصرى بنفسك

الحاجة المهمة بقا , انا مش حتكلم عن سيارة اخرى غير الصنى
حتكلم عن الصنى

الصنى عربية منتشرة فى مصر جدااا سعرها ممتاز وبتاخد بيه ماتور يابانى محترم ومعمر وصاج قوى جدا , اغلب العربيات اللىش وفتها عاملة حوادث قوية لقدر الله الكابينة بتطلع سليمة والصاج بسم الله ماشاء الله قوى جدا والله

حاجة اخرى مهمة : معاك توكيل قوى وسمعته عاليه جدا وليه مراكز خدمة معتمدة وكتير فى مصر والحمد لله

قطع الغيار الاصلى منها غالية بس معمرة جدااااا حطها وانساها

وفى قطع غيار فى السوق منتشرة بردوا جديد واستيراد واسعارها زيها زى الاسعار الكورى كمان

لينك الموضوع هنا :

العربية بخصوص استهلاك البنزين اغلب العربيات ال1600 سى سى كلها زى بعض جوة البلد فى الزحمة , وصدقنى والله وحفضل حقول انها بتفرق من رجل الى رجل على دواسة البنزين , بمعنى حضرتك لو ركبت عربيتى حتعمل استهلاك مختلف عنى مع ان نفس العربية سواء بالناقص او بالزائد

العربية بسم الله ماشاء الله عربية ممتازة ومحترمة جدااا وبتتباع هوا بردوا

واذا كنت ناوى خد منها اللى فيها abs وتوكل على الله

**Hossam_Zaky** · 13-03-2011 07:52 PM

انا مع كل الزملاء الأفاضل اللي أشارو عليك بالصني و أحب أضيف معلومات بسيطة

أحلي حاجة في عربيتي الex اتوماتيك موديل 2009
- ارتفاع عن الأرض كافي لأجتياز المطبات بدون قلق أو حك
- ثبات العربية معايا لحد 150 لما جربت كويس جدا ( دي مش عربية سباق طبعا )
- العفشة مريحة
- الموتور كاتينة جنزير لا تحتاج لتغيير عند كيلومترات معينة و بالتالي أغلي صيانة بتاعة الـ40000 كانت 1100 جنيه بس تقريبا
- صوت الموتور عالي شوية و ده بسبب ان الكاتينة جنزير
- صاج العربية محمل مش خفيف و مش بيتطبق يسهولة
- الفتيس بتاع العربية الأتوماتيك تقنيته عادية مش معقد و بالتالي تكاليف الزيوت في التوكيل ( 160 جنيه بالمصنعية )

و أكيد زي أي عربية في مصر ممكن تلاقي مشاكل بسيطة و ده عادي في مصر بس التوكيل محترم و بيحل المشاكل مش بيتهرب أو يتحايل عليها و بيخافو علي سمعتهم و الكلام ده علي مركز السبع بتاع المعادي اللي بتعامل معاه

صديقي من 4 شهور كان حيران زيك بس هوه مكنش بيحب الصني و بالتالي أخترنا النيو أكسنت أتوماتيك ( كانت عاجباني برضه )
ملاحظتنا عليها كانت أن أدائها عادي مش أوفر و ثباتها مش وحش بس الصني افضل و برضه راكب هيونداي مش نيسان و حسينا أن سعرها أكتر من اللازم ( كان 88500 تقريبا ) و مثلا مافيهاش عداد حرارة للموتور لمبة بيان بس ( في فئة سعرها !! ) و حصل معاه مشكلة في علبة الدريكسيون وداها لواحد من مراكز صيانة هيونداي الكمبيوتر كان مهنج قالوله دي مش تبع التوكيل و طلبو 6000 جنيه تمن الدريكسيون و بعدين بعد خناق و تهديد بحماية المستهلك غيروها

بالنسبة لأكسنت RB الجديدة فأنا حاسس أن سعرها مبالغ فيه جدا لأنه قرب لسعر الألنترا يعني حوالي 90 ألف مانيوال و 97 ألف أتوماتيك ( كتير علي فئتها ) و شكلها حلو ماشي بس محدش لسة جربها

بالنسبة للأسكالا فأنا فعلا معجب بها و تقفيلها فعلا شوفته حوض الموتور و لحام الشنطة محترم جدا و الدهان الخارجي بتاعها نضيف جدا و كمان هي نازلة مواصفات خليجي و هي الشكل الجديد من الصني ( الكوري ) علي نفس الشاسيه و موتورها مش متأكد هو الصني ولا لأ بس كاتينة جنزير و فتيسها التعامل معه أفضل عشان المجري بتاعه متعرج ( أعتقد نفس فتيس الصني ) و الصالون بتاعها نفسه الصني الأختلاف في الألوان ( السكالا نازلة صالون أسود بس ) و فتح الشنطة في الأض مع التانك مش في التابلوه و الكاسيت سي دي بتاعها الستايل الجديد الكبير اللي ممكن تبدله بشاشة و كمان البلاستيك الأسود ( اللي بدل شكل الأبنوس في الصني ) شكله سيء جدا
لكن
مش منتشرة زي الصني و قطع الغيار بتاعة الصني مش شرط تكون تركب عليها ( الكشافات كلها مختلفة و الأكصدامات مختلفة )
ممكن أقولك الزجاج و الأبواب هي هي
توكيل رينو محترم بس العربية السكالا مش منتشرة و ده يتعبك في أعادة البيع و قطع الغيار
الفئة العادية بتاعتها اللي بتوازي الـex في الصني عجلها 14 بوصة مش 15 بوصة الفئة العالية بتاعتها هي اللي 15 بوصة لازم تتأكد من الكماليات ( لو حتختار السكالا تجيب أعلي فئة فيها اللي بتوازي السوبر صالون )

في النهاية أنا بفضل الصني و بقول السكالا مش وحشة بس حتتعب شوية في قطع الغيار و حتضايقك في أعادة البيع و أبعد عن الهيونداي لأنها غالبا و ده رأيي في مرتبة أقل من أسم نيسان أو رينو
( صاحبي معه مازدا و التاني معاه هوندا و أنا معايا نيسان )