ليون ، كماليات،أسعار قطع الغيار، أسعار الصيانة

**SAbuhashem** · 09-04-2008 02:18 AM

رحت توكيل سيات النهاردة وعملت فحص شامل للعربية بنفسي لمدة أكتر من ساعة :). العربية فعلاً أقل ما يقال عنها انها تحفة فنية من جميع الجهات على أساس السعر بتاعها دة .

كماليات بالهبل مثبت سرعة ،٨ أير باج ،بور ستيرنج كهربائي ،التكييف Climate Control،MP3 player ، ABS،EBD ،Traction ،Sun Roof،Fog lights ،جنوط ١٦ ، وأخيراً والجديد في 2008 والجامد فعلاً Car Kit للموبايل بلوتوث ودة أنا جربته بنفسي في المعرض بيطلع ال phone book على الشاشة وكمان رقم المتصل وممكن تتصل بواسطة ال-Voice Command يعني مللي الرقم أو إسم الشخص ويتم الإتصال

كل دة ب-١٤٥ ألف !

نيجي للمهم بقى ، قطع الغيار ،

أنا دخلت مخزن قطع الغيار بفسي واتكلمت مع أمين المخزن وشفت قطع الغيار بفسي موجودة من خيرات الله ما شاء الله :)

بعض الامثلة لأسعار قطع الغيار شاملة الضريبة :

طقم تيل أمامي ٣٨٥
طقم تيل خلفي ٣٣٠
سير كاتينة 201
سير دينامو ١٠٤
فلتر بنزين ١٢١
فلتر زيت ٥٠
مساعد أمامي ١٢٠١ _ للواحد
مساعد خلفي ٦٣٢ _ للواحد
طنابير أمامييه ٤٠٣_ للواحدة
فانوس أمامي ١١١٢
فانوس خلفي ٤٠٠

اسعار مناسبة جداً وخصوصاً إن دي عربية أسباني واخدة جنسية ألماني

أول صيانة عند ٥٠٠٠ كم وبتتكلف حوالي ٥٠٠ جنيه بعدها ١٠٠٠٠ كم وكمان بتتكلف حوالي ٥٠٠ جنيه بعض كدة كل ١٠٠٠٠ كم وإنت ونصيبك فهى بقى :)
الضمان ، سنتين مفتوح

أعتقد مفيش حجة بقى بعد دة كله ليه بقى مش منتشرة :)

Thanks
Eng.Sherif Shaker

________
تم تثيت الموضوع
مشرف القسم.

**NaderNabil** · 09-04-2008 02:32 AM

ثقافة عند المصريين...ان أي عربية شكلها ثوري أو غريب يبقي ابعد عنها....اللي يقوللك قطع الغيار مش هاتلاقيها و اللي يقوللك الفانوس ده معرفش هيبقي بكام...و اللي يقوللك محدش هايصلحها....بس انا فعلا مابقتش أسمع كلام حد...أجيب اللي علي مزاجي مش مزاج الناس....

لو ناوي علي الليون يبقي اختيار أكثر من رائع....ده كفاية المساحات بتاعتها....أخدت بالك منها ولا لأ؟:)

هي مشكلتها الوحيده انه مانوال...اوزر وايس كانت هاتبقي أفضل سيارة بدون منازع في الفئة دي...

ربنا يوفقك:)

**ابو سيف** · 09-04-2008 02:37 AM

السوق المصري بيحكمه حاجات مختلفه خالص عن الاسواق العالميه
في عربيات بتاخد اكتر من حقها بكتير في مصر مع ان بيكون في عربيات تانيه بتكون احسن منها و قد تكون في نفس السعر لكن مش واخدة حقها خالص

مش عارف دة عيب وكلاء و لا عيب فينا احنا و لا عشان تلاعب التجار بالسوق في المستعمل فدايما احد اهم ما يميز اي عربيه في مصر سعد اعادة البيع و سرعته و غيره كتير
ام هي مجموع هذه العوامل مع بعض

لكن بجد انا مقتنع جداااااااا ان في عربيات تحفـــــــــــه مش واخدة حقها خالص في مصر

**mahamedaraby** · 09-04-2008 02:43 AM

هى ب١٤٥ ألف ومانيوال !!!

لوكانت كده يبقى حرام جدا مش بعد ما دفعت ١٤٥ ألف هجيب عربيه مانيوال

هى عربيه الصراحه شكلها تحفه وامكانيتها زى ما حضرتك بتقول طبعا لا تقارن وقطع غيار معقوله

لكن واحد زى هيقول ليه ادفع فلوس فى حاجه مبشفهاش اصلا ومش معروفه ما انا ممكن اجيب تويوتا كورولا 2008 وازود حاجات بيسيطه وعندى امكانيات كتير واتوماتيك ويابانى

**fahd_628** · 09-04-2008 02:51 AM

بجد تحفة لو ناوى عليها توكل على الله بجد تحفة و مظلومة فعلا بس لازم برضة تاخد فى عين الأعتبار ان هل قطع الغيار موجودة ولا لأ عند التوكيل و اية بقى سبب انها مش منتشرة مع ان يعنى سيات ملهاش سمعة سيئة مثلا فى مصر او منزلتش عربية سيئة و اية بقى سبب ان الناس خايفة منها ؟

**SAbuhashem** · 09-04-2008 03:04 AM

إلي يحير هو دة :

اشمعنا الجيتا
اشمعنا الاسترا
إشمعا الأكتافيا ؟؟

بلاش _ الهوندا سيفك فقيرة جداً في الكماليات ومنتشرة بشكل يخلي أي حد يفكر ١٠٠ مرة قبل ما يشتريها دي أكتر من التاكسي :) ولا الكورلا إلي ب-١٦٧ ألف !! مش ممكن علشان الاتوماتيك أكيد مش دة السبب واديكوا شايفين أسعار الصيانة وقطع الغيار !!

Thanks
Eng.Sherif Shaker

**SEATLOVER** · 09-04-2008 12:18 PM

يعنى صدقتنى دلوقتى يا SAbuhashem مش انا قولتلك :)
و بالنسبة لموضوع المانيوال ..انا هاقولك وجهة نظر التوكيل فى الموضوع دة لما اتكلمت معاهم
هما وجهت نظرهم ان المانيوال مطلوب اكتر و خصوصاً ان عربياتهم رياضية و نمط سواقينها معظمة من الشباب .. و اللى بيأكد و جهة نظرهم ان مبيعات المانيوال حتى فى الفئات العالية اكتر من الاتوماتيك ولما بينزلوا الاتوماتيك مبيبقاش علية اقبال حتى لو كمالياتة اكتر بكتير من المانيوال

يعنى انا شخصيا برضو عمرى ما هافكر فى الاتوماتيك ..هى مسألة نمط قيادة للنوع دة و خصوصاً ان الفتيس المانيوال فى السيات مميز جداً

حاجة و احدة بس نصيحة هاقولهالك لو ناوى على لبون إن شاء الله ..انك ماتبعش قبل 3 او 4 سنين
هاتبيع قبل كدة هاتخسر الرُبع ...هاتبيع بعد كدة ممكن تكسب الرُبع

والصيانة تبقى توكيل فقط .. وتستحملهم بحلووهم و موروهم .
و ربنا يوفقك

**CryptonX** · 09-04-2008 12:38 PM

سيارة جميلة فعلا !
و كمان مواصفتها حلوة .. بس هي عدم انتشارها يرجع لكذا سبب مرتبط بينا احنا ..

الشعب المصري بيكره حاجة اسمها " هاتشباك " ان شاء الله كانت احسن و ارخص سيارة في الوجود ..

تلاقي واحد لسة متعلم سواقة جديد .. مبقلوش اسبوع ! و رايح يشتري باسات و لا بريليانس !
ليه يا سيدي ؟ السيدان برستيج تاني خالص .... >>> قمة التخلف .

و الاسباب التانية انها سيارة تقريبا جديدة في مصر كليا ..
يعني الاسترا كانت من احسن السيارة مبيعا من فترة .. وارخص من الليون ( موديلات ) و في موديلات زي الgtc و الenjoy بيعدوا ال 165 و حتلاقيهم نادرين برده جدا .

الاوكتافيا برده بقالها فترة و مش هاتشباك D: الجيتا نفس اللكلام ..

المشكلة يا باشمهندس .. الي بيدفع فوق ال 120 الف ...يا اما عايز حاجة تبين انه راجل غني .. و ينعكس عليها من برة ! يا اما مش عايز يوجع دماغه و بيجيب حاجة معروفة وخلاص ..

و بما اننا اتفقنا ( في التخلف ) ان كل السيارات الهالتشباك شبابية و مش للكبار ولا للبرستيج ... يبقى انسى ان حد يفكر فيها !

و في سيارات كتير هاتشباك ناجحة برة مصر .. و فاشلة جوة مصر !
يعني الكيا ريو الهاشتباك .. لو شفتها مرة ام مرتين تبقى معجزة .. بينما السيدان منتشرة !

الفيات برافو .. تقريبا هي هي السيات الليون .. بفتحة السفق و جنوط 16 و بلوتوث و و و و وو ب 135 .. مشتفش ولا ولااحدة في الشارع !

حتى ال Bmw الفئة الاولي ... نادرة ! بصرف النظر عن تنمنها ..

الناس هنا بتشتري بالاسم و البرستيج ...
يعنني في سيارة خلاص .. ضمنت انها لو نزلت اي حاجة حتتباع !
الانسر - الكورولا - السيفيك _-- باي شكل و باي تصنيف و باي سعر حيبتاعه !

**SEATLOVER** · 09-04-2008 01:07 PM

المشاركة الأصلية كتبت بواسطة hero

متهايلي دي مشكلة تسويق....
وممكن برضة علشان عربيات سيات الكبيرة ماتجربتش هنا قبل كدة....
...

يا hero عربيات السيات الكبيرة موجودة و بتجرى فى كل حتة بس معظمهم مش عايز يبيع ذى حالاتنا
من اول التوليدو 98 وفوق ال 2000 و الليون من 2001 و القرطبة من 94 و فوق ال 2000و الهامبرا اللى مالية اوروبا

-

الموضوع: ليون ، كماليات،أسعار قطع الغيار، أسعار الصيانة

LinkBack

أدوات الموضوع

عرض