الحمد لله قدر الله و ما شاء فعل عملت حادثه اول امارح

حصل معايا اول امبارح واقعه بلطجه و محاولة سرقه , الحمد لله الواحد نجى , بس العربيه اتخرشمت خالص .. الاضرار كما يلى
1- رفرف يمين و شمال امامى
2- مرايه يمين
3- زجاج باب يمين امامى
4- الباب اليمين الامامى اتعوج جامد من عند المفصلات كده
5-قدام العفشه اتضررت جامد و انا مش متأكد ايه اللى بايظ بالظبط
6-كسر زجاج خلفى
انا عندى سؤالين اتمنى حد يقدر يجاوبنى عليهم
اول سؤال
العربيه متامن عليها , هل بيبقى فيه مشكله مع التامين لو اللى سايق مش مالك السياره, ( السياره ب اسم الولد ) هل التامين ممكن يمتنع عن التصليح؟
تانى سوال
فيه اى معلومات عن اسعار القطع المذكوره؟

ربنا يعوض عليك بس ايه الموضوع بالضبط

بلطجيه اتعرضولى الحمد لله كان فيه ناس فى الشارع و عرفنا نتعامل معاهم , بس للاسف معرفناش نمسك حد منهم هربوا كلهم ..

نوع السياره سيراتو 2011 , 4 سرعات

الف سلامة والحمد لله على قد كدة
لكن بالنسبة للتامين فلابد ان يكون صاحب السيارة هو اللى عمل الحادثة للاسف وده هتلاقيه فى وثيقة التامين اللى معاك

اقتباس:

---

المشاركة الأصلية كتبت بواسطة dolly13

الف سلامة والحمد لله على قد كدة
لكن بالنسبة للتامين فلابد ان يكون صاحب السيارة هو اللى عمل الحادثة للاسف وده هتلاقيه فى وثيقة التامين اللى معاك

---

الله يسلمك يا باشا انا فى الوثيقه مش مكتوب فيها حاجه زى دى , و هو دا اللى مخلينى اسال , انا بالمناسبه تبع تامين شركة قناة السويس

مش هاتفرق فى حاجه طالما باسم الوالد كلم التامين واعملها تبعهم لان الموضوع كبير وحمدالله على سلامتك

اللى اعرفه ان الشغب مش مغطى فى الوثائق التأمينية
يعنى ممكن الشركة ترفض التعويض

الحمد لله ان انتي بخير وقدر الله وماشاء فعل


ممكن حضرتك تقولهم انها كانت مركونة وحصل فيها اللي حصل

حمدلله على سلامتك

فدي حضرتك 10000000000000000000000000 عربيه
المهم انت متعملش في المحضر شغب اعمله ضدد مجهول دا علي حسب خبرتي

اقتباس:

---

المشاركة الأصلية كتبت بواسطة mohamedaghali

مش هاتفرق فى حاجه طالما باسم الوالد كلم التامين واعملها تبعهم لان الموضوع كبير وحمدالله على سلامتك

---

الله يسلمك يا باشا شكرا .. كلمتهم و الحمد لله بدأو التصليح فى التوكيل دعواتك بقى

اقتباس:

---

المشاركة الأصلية كتبت بواسطة felix

الحمد لله ان انتي بخير وقدر الله وماشاء فعل


ممكن حضرتك تقولهم انها كانت مركونة وحصل فيها اللي حصل

---

الله يسلمك يا باشا شكراً..انا عملت محضر تامين .. انا بالمناسبه رجل :) ..

اقتباس:

---

المشاركة الأصلية كتبت بواسطة hpxp

فدي حضرتك 10000000000000000000000000 عربيه
المهم انت متعملش في المحضر شغب اعمله ضدد مجهول دا علي حسب خبرتي

---

الله يكرمك , شكرا على شعورك الرائع .. انا عملت كده فعلا , الكل نصحنى ب كده ..

سلامت سيادتك الف سلامة و كويس انها جت في الصفيح زي ما بيقولو

أولا ألف سلامة عليك و فداك ألف عربية
و يا ريت لو تقولنا اية اللى حصل معاك بالظبط علشان ناخد حذرنا

اقتباس:

---

المشاركة الأصلية كتبت بواسطة smartchoice

أولا ألف سلامة عليك و فداك ألف عربية
و يا ريت لو تقولنا اية اللى حصل معاك بالظبط علشان ناخد حذرنا

---

عربيه كسرت عليه من الجنب الشمال , خلتنى اخبط ف عربيه تانيه على جانب الطريق و طبعا اضريت اخرج بره العربيه عشان كانت وقفت و طبعا هما نزلوا من العربيه و بدأو ممارسة البلطجه.. البلد مبقاش فيها امان للاسف .. بس عمتاً , حاول ب استمرار اقفال العربيه على طول مقفوله و الزجاج على طول مش مفتوح , و ما تسمحش ل حد يلهيك ونتا فى الشارع (مثلا واحد يفتح معاك حوار بحجة انه بيسال عن عنوان او شحات عايز صدقه ) و الايام دى برده بيحاولوا يسفزوك بأى طريقه عشان يخلقوا مشكله معاك ,حاول تحافظ على هدوئك , المكسب الحقيقى انك ترجع بيتك ونتا سليم منغير مشاكل.. يفضل ترجع البيت قبل 7 او 8 بليل .. معظم الحوادث بتحصل فى الوقت من 9 بليل ل 11 .. ربنا يحفظنا جميعاً يا رب

اهم حاجة روح أقرب قسم شرطة و اعمل محضر قول فيه إن العربية اتخبطت و هى واقفة حتى خد معاك بطاقة الوالد احتياطى و ضمها للمحضر... و أيدها ضد مجهول

معلش ربنا يعوض عليك

بس المكان اللي حصل في الموضوع ده معاك كان فين

حمد لله على سلامتك أولا
ثانيا وزير المالية سمير رضوان عامل حملة للمتضريرين من أعمال الشغب
خضرتك تروح لمراكز معينة وتملى الطلب وفي خلال الأيام القادمة كل الناس
الى قدمت طلبات هتاخد تعويض مادي على حسب حجم الضرر والتعويض بيشمل
سيارات وبيوت و أي ممتلكات شخصية

الف سلامة عليك يا باشا فداك العربية كلها....بس هو ده كان فين بالظبط ؟؟ و العربية بتاعت البلطجية كانت ملاكي ولا ميكروباص ؟؟

ده حصل لحضرتك فبن ؟