الموضوع: اقفش نصاب سيارات

حاله النصب انا نقلها للاحتياط والحذر
السلام عليكم ورحمة الله وبركاته
اللهم صل على محمد وعلى آله وصحبه أجمعين
و الحمد لله على السراء و الضراء
انا مش عارف اعمل الموضوع فين فياريت المشرف يشوف القسم المناسب و ينقل الموضوع

اكسبوا ثواب و حاولوا تنشروه على قد متقدروا عشان ماينصبش على حد تانى

تعرضت لعملية نصب من شخص مجرم محترف نصب
الموضوع من اوله انى كنت عارض العربية اللانوس للايجار فى قناة اوتو موتو فى تاريخ 10/6/2010
اتصل بيا واحد قالى حضرتك عارض عربية لانوس للايجار قولتله ايوة قالى انا اسمى محمد ابرهيم مرشد سياحى فى احدى الفنادق قالى هاجى اشوف العربية النهاردة قولتله ماشى

كلمت خالى عشان هو شغال فى ايجار السيارات من زمان و عنده خبره فى الموضوع دة و عملتله توكيل للايجار

قابلنا الراجل فى شارع السودان و شكله مهندم و محترم و شيك و كان جاى بعربية اكسيل بيقول انها بتاعت مراته
شاف العربية قالى تمام هاخدها النهاردة قلناله هانكتب العقد و نكتب وصل امانة على بياض و تمضى و تبصم عليه قال موافق و تيجوا تكتبوا العقد عندى فى البيت عشان اواريكوا اهل بيتى و كدة قالتله حضرتك ساكن فين قالى فى حى الاشجار
المهم هو روح و انا خالى روحنا و روحناله الساعة 7 قابلنا قبل حى الاشجار بشوية
مشينا وراه لحد الحى و احنا داخلين من البوابة افراد الامن سلموا عليه و اذيك يا محمد بيه و بتاع
طلعنا معاه شقته و يا عينى على الشقة ولا مكتب حبيب العادلى مكلفة مكلفة يعنى
متجوز واحد استغفر الله العظيم فى شكلها غريب جدا و قاعدة قدامنا بشعرها و لبس ضيق جدا ( ملناش دعوة هو خروف بقى ) و عنده اربع اطفال
سالته حضرتك هاتشغل العربية فى ايه ؟
قالى هاشغلها معايا فى الفندق باخد اجانب من الفندق و اوصلهم للامكان اللى عايزين يروحوها
و بعدين قال انا كان عندى عربية و بعتها عشان واخد قطعة ارض فى مشروع ابنى بيتك عشان بابنى شقق للعيال
المهم كتبنا العقد و وصل الامانة و باصم و ماضى على الاتنين و العقد كانت مدته 6 شهور
خد العربية و ادانى حساب شهر
المهم كان كل يوك يكلمنى يطمنى على العربية و يقولى غيرت زيت و مية خضرا ...الخ
و تانى شهر قابلنى و ادانى حساب شهر و كان معاه مراته قالى احنا رايحين عيد ميلاد
فى نفس اليوم كلمنى قالى فى شركة بترول هاتحتاج عربية فى شهر 6 قالى تقدر تتصرف فى عربية ؟ قلتله اة اقد
دة غير المكالمات اللى بيجر بيها ناعم يقولى انتا شخصية محترمة يا استاذ ادهم و الكلام الفاضى دة
هو كان بقاله شهرين مش باشوفه بحجة انه فى اسكندرية معاه خبراء اجانب و قاعد معاهم فى فندق سان استيفانو و بيعملوا ابحاث فى مكتبة الاسكندرية
قالى نازل يوم 7 اللى هو امبارح
كلمنى امبارح قالى قابلنى الساعة 3 قدام مجمع المحاكم فى شارع السودان على القهوة اللى قدام المجمع على طول
كنا انا و خالى روحنا و قعدنا على القهوة
الساعة 3 و خمس دقائق مجاش روحت مكلمه قلتله ايوة انتا فين قالى 5 دقائق و جايلك
المهم قولتله العربية كويسة ؟ غيرت و زيت ؟
لقيت اتنين بيقولى حضرتك استاذ بدوى (خالى ) قلتله بدوى اهو
قالوا دب اتفضلوا اقعدوا معانا
فا بتصل بـ محمد النصاب بقوله انتا فين قالى بجيب اكل من شارع رشيد قلتله العربية فين ؟ قالى انا جايلك اهو
قتله انتا غيرت الزيت امتى ؟ قالى من حوالى اسبوع
بعد مخلصت المكالمة واحد من الاتنين قالى بخالى هو حضرتك الاستاذ بيتكلم عن مين ؟
قاله مع محمد اللى مأجر العربية
اندهشوا و قالوا يعنى حضرتك مش خاله
قاله لاء دة مأجر العربية و المفروض اخد فلوسى النهاردة
الاتنين بان عليهم علامات القلق واحد منهم قالى انا هاقوم اجيب سجاير و اجى
و التانى فضل قاعد معانا و بعدين جاله تليفون و قام خرج برا القهوة و بيتكلم فى الموبايل قمت انا و خالى واقفين و جايين عليه قام جارى ( اتارى اللى كان معاه قاله انا خت العربية اجرى انتا وهاحصلك ) طبعا جرينا وراه و فى اللحظة دى كان ابن خالتى شغال فى سوبر ماركت مشهور ملاصق للقهوة كان واقف برا فا شافنا بنجرى راح جايب الناس اللى شغاله معاه و جريوا ورانا
فضل يدخل فى حوارى و احنا وراه فا تاه مننا فقابلنى توكتوك قالى فيه ايه يا باشمهندس قالتى واحد سرق منى فلوس و لابس بدلة قالى " هاجيبهولك "
المهم قاعدنا نلف فى المنطقة سالنا ناس فى ورشة ميكانيكا قالناله ماشوفتوش واحد بيجرى لابس بدلة قالى " اة ماسكينه اهو هناك فى التوكتوك "
روحنا بسرعة على التوكتوك و مسكنا الراجل طبعا خد احلى ترويقة من ضرب لطلتيش لشتيمة لسحل لحد ماتحفظنا عليه و خدناه على القهوة و هاوطناه و جيبنا بلطجية من معارف ابن خالتى محاوطينه
هو كلم الراجل اللى خد العربية و جرى و قالى " يا عبده ارجع الناس هايقتلونى "
عبده دة من سيناء و طبعا مش عارف السكة فقعدنا نوصفله الطرق لحد مرجع قالناله تعالى بقى انا خت العربية وطرت خبيتها فى جراش قريب من القهوة و رجعتله

طلع ان محمد بيه اللى كان مأجر العربية عمل توكيل مزور باسم خالى بتاريخ 11/6 يعنى بعد ما خد العربية منى بيوم
و عمل اعلان عنها فى قناة اوتو موتو فالناس دى كلمته و راحل قابلهم فى شارع احمد عرابى فى المهندسين ( و هو كان مفهمنا انه كان فى اسكندرية ) قاله بدوى دة يبقى خاله و جاى من امريكا يوم 7 اللى هو امبارح و كان عاملى توكيل بيبيعها
الناس دفعلته 35 الف و الباقى بعد تسجيل العربية فى الشهر العقارى اللى المفروض خاله يقابلهم على القهوة ياخد بقيت فلوسه و الناس جايه على اساس كدة
بعد مافهمنا الموضوع بقوله طب انتوا جريتوا ليه قالى احنا افتكرناكوا نصابين خوفنا منكوا فجرينا قلتله انتا لو كنت صح ماكنوتش تجرى و كنا روحنا علمنا محضر فى القسم
قالى بص العربية جتلك اهى ياريت بقى تساعدنى ارجع فلوسى
قلتله ورينى التوكيل
طلع صورة من توكيل و كاتب اسم خالى و كاتب رقم البطاقة مختلف تماما لانه طبعا مش معاه بطاقة خالى

قلت للراجل على فكرة انتا حمار
قالى ليه ؟
قلتله اذا كان الواحد بيكون قلقان و هو بيشترى عربية بتوكيل ما بالك بصورة توكيل و طلع مزور كمان
قالى طب انا اعمل ايه انا كنت بشترى بحسن نية قلتله ماليش فيه دى غلطتك
قالى طب عانعمل ايه ؟
قالتله كل اللى ليك عندى هاوريك شقته اللى كتبنا فيها العقد
اجرنا مكروباص و ركبنا كلنا و معانا البلطجية و روحنا على حى الاشجار و كلنا ظابط نعرفه فى 6 اكتوبر عشان يفتحلونا البوابة و ندخل
روحنا العمارة طلعنا الشقة بنخبط محدش بيفتح
فى الشقة المقابلة واحد فتح و قالى عايزين مين ؟
قالنالى اللى ساكن هنا اسمه محمد ناصب على الناس دى
قالى دة كان مأجر الشقة لمدة 20 يوم و مادفعش الايجار 4000 جنيه و هرب من غير ماخد منه حاجة
طلع محترف يعنى
بعدين نزلنا على المهندسين تانى و قالى يعنى انا اتنصب عليها
قلتله " القانون لا يحمى المغفلين "
بعد ماوصلنا قالى طب بعد اذنك كان فيه ازازتين بيرا فى شنطة العربية قلتله انا بعد ماخت العربية فتشتها حتة حتة مالفتش فيها حاجة
قالى لاء احنا حاطنها جوا غطا العربية
قلتله طب خاليك هنا ماتتحركش
روحت للعربية و فتحت الشنطة و فردت الغطا لقيت ازازتين فودكا
روحت واخدهم فى كيس بلاستيك اسود و ورجعتهمله
قلتله صورة بطافة النصاب دة معايا و عنوان اللى موجود فى البطافة غير العنوان اللى روحنا كنا سألناه قبل كدة قالى دة عنوان والدتى

دلوقتى انا معايا صورة بطاقتة و صورة رخصته
العقد مدة 6 شهور و ماضى و باصم
وصل امانة على بياض و ماضى و باصم عليه

فالسة هانشمى فى اجرائتنا و ربنا يسهل ان شاء الله

صور النصاب




__________________

يا نهار ابيض علي كل ده نصب
ربنا يخرب بيتهم