الموضوع: أنا أتعقدت و جاللي أنهيار عصبي

انا باتفق قلبا و قالبا مع توت فى كل اللى قاله فعلا الناس بقت تقرف و معندهاش ريحة الدم انا خلاص ما فيش حد من اهلى بقى يقدر يركب معايا العربية من كتر ما انا عصبى يعنى اول كام دقيقة فى المشوار بيبقى كله تمام و لكن بعد اول احتكاك مع اى حد من العربجية اللى بيسوقوا ببقى خلاص انسان تانى لونه احمر بيطلع شياط و النتيجة ايه من كل ده ضغط دم مرتفع و قولون عصبى مزمن و وجع مستمر منه .
حاول تقلل من السواقة على اد ما تقدر و انت حاتس بفرق و راحة يعنى اعمل زى و دور على وسيلة مريحة تروح بيها الشغل و فى الايام العادية لما تحب تتفسح او تقضى مشوار انزل فى اوقات ماتشات الكورة او الجمعة الصبح قبل الصلاة.
حاول تمارس رياضة و انصحك بالسباحة و الاسكواش مجهود كبير و يفرغ شحنات جامدة بدل ما الواحد يجيله ذبحة صدرية لا قدر الله .
و ربنا يخرجنا من البلد دى على خير ان شاء الله

المشاركة الأصلية كتبت بواسطة fahd_628

توت باشا انت معاك حق فى كل الى قولتة و انا حاسس بيك لأنى فى الأسكندرية ( اقل زحمة من القاهرة ) و مقروف برضة اصل الحكومة عندها بجد ازمة ملهاش حل فى المرور ان الناس بتشترى عربيات جديدة و تبيع القديمة و الجديدة شغالة و لقديمة شغالة + ارتفاع عدد السكان المهول

و كمان الى بيضايقنى ان لما الواحد يلاقيك محترم كدة و هادى ياكلك و يقولك دة لقطة و يغلى مثلا الأسعار ليك

و كمان بجد موضوع ان الواحد ميمشيش على الخط بتاعة حاجة عجيبة جدا انا لما بسوق على البحر بمشى على الخطوط زى فى الدول الاجنبية و بمشى على 60 و مكدبش عليك ساعات 70 بس الاقى الناس كلها بجد معديا من جمبى طيارات !!! لية يعنى بيمشو على 80 - 90 و السرعة المقررة 60 ؟ و تلاقيهم بيبصولى بعجب لأنى ماشى على الخط و انت عارف بقى لما بيجى ملف لازم امشى على الخط و احود مع الطريق و تلاقى الناس بتكسر عليك و ماشية مستقيم مفيش حاجة اسمها تحود مع الملف

و كل يوم مش اقل من حادثتين على البحر الواحد بيشوفهم

و الناس متخلفين بجد و تلاقى النفق جمبهم و تلاقيهم بيعدو من الشارع شكلهم مكسلين ينزلو و يطلعو على السلم انا والله لحاد دلوقتى عمرى ما عديت البحر دة و عمرى ما حعدية ان شاء الله :)

و ربنا يصبرك و يصبرنا جميعا

اسكندرية بقت تقرف برضه كفاية ان البلد كلها بتلف من الملف اللى قدام مستشفى الشاطبى كل يوم الصبح .
اما عن موضوع الانفاق ده فحدث و لا حرج و المهم انك تلافى اللى بيعدى ده بيضحك كانه بيلعب فى الملاهى قمة فى التخلف و الهبل و المفروض اللى يخبط واحد على البحر و يموته ما يتحاسبش و الشرطة تمشيه من مكان الحادثة من غير نيابة و لا اى حاجة
معلمومة : انت تعرف ان فى اشاعة انهم حايعملوا الكوبرى العلوى اللى فى سيدى جابر عند محطة القطار بسلالم كهرباء ؟؟

يا باشا مصر هيا سبب الديبريشن ده كله .. سافر بره غير جو لمده شهر كده و ارجع .. هاتحس بان الدنيا ربيع و الجو بديع :d

توت ، اظن بعد ما قريت الردود بتاعت الاعضاء كلهم اكيد اكتشفت انك مش لوحدك فى هذا العالم الملىء بكل ما يجعل الانسان يموت ناقص عمر .

تصدق يا توت انا حاليا مبقتش عارف انا ايه ، مهذب ، قليل الادب ، هادى ، ملتزم ، قليل الذوق ، صوتى منخفض ، صوتى عالى ، يحترم القوانين ، غير عابئ بالقوانين ، يحترم الاخرين ، لا يحترم الاخرين ، ايجابى ، سلبى ، يسعى لمساعدة الاخرين ، لا يبالى بمصلحة الاخرين .

الشارع المصرى خلانى مزيج مما سبق .

سواء كنت سايق او ماشى على رجلى ، سواء كنت مع اصدقاء او وسط مجموعة من الحثالة فى منطقة ما او فى الجامع اكتشف ان سلوك المحيطين غريب تماما عن الطبيعى و المنطقى

يعنى ممكن ابقى مشغل موسيقى هادية او اغنية حالمة و فجأة واحد يعمل يعمل فى موقف على الطريق اقوم انقلت 180 درجة ، يعنى مرة كنت ماشى على 100 فى الحارة اللى على الشمال فى الطريق الدائرى ، واحد راح كسر على بشكل عنيف و تسبب باحتكاك سيارتى و سيارته و تظاهر بان المشكلة بسببى و راح شتمنى و زود سرعة و طار، لم ادرى بنفسى الا و انا اجرى واره بكل سرعتى ، و مراتى فى هيستريا و ابنى فى حالة صراخ و خوف مما افعله و انا غير عابىء بما يحدث و مستمر فى الحرب اللى نويت عليها و فعلا تهيألى انى حصلت الراجل اللى عمل كدة ورحت كاسر عليه و شادد اقدامه و مفرمل عليه و و عندى احساس انى لازم اخبط عربيتى فى عربيته بأى شكل و بدأت فى عمل ذلك بالفعل و لازم اعمل مصيبة بأى شكل و مش مهم ايه اللى يحصل فى عربيتى لكن المهم انى اخبطه بأى شكل ، و اكتشفت بعدها ان هذا الموقف اللى دام اقل من دقيقتين انى باعمل كدة فى واحد تانى عن طريق الخطأ و اما المستهدف بهذا الموضوع كان قد اختفى عن الاعين لان فى الاصل كان فاتح من البداية و انا كنت على ال 100 فقط ، طبعا خجلت من نفسى و اعتذرت بشدة و لوحت بيدى بالاعتذار لقائد السيارة اللى كسرت عليه عن طريق الخطأ و رجعت لطبيعتى مرة اخرى من الخجل و الاعتذار .

- حاليا انا لا اذهب فى اى مكان غير من المنزل فى الهرم بجوار المريوطية الى الدائرى الى مدخل مدينة نصر اللى عند طريق العين السخنة الى مكرم عبيد و العودة من نفس الطريق
- لا اذهب فى الى مكان فى الاجازة يكون فى وسط الزحام ، و التنزه فقط يكون فى النادى فى الطريق الدائرى ( الصيد )
- لا ازور والدتى اطلاقا فى بيت عائلتى فى عابدين ، لان عابدين فى وسط البلد و هى منطقة محرمة بالنسبة لدى و النتيجة طبعا معروفة - الوالدة متهلفة دائما لرؤية الابن و الحفيد لكن ...

- لا ارى اصدقائى الا نادرا مرة فى السنة و لا حاجة و ممكن كل سنتين لانى ببساطة لا اخرج فى الاجازة او بعد العمل الا للشديد القوى ، طبعا من القرف اللى فى الشارع المصرى و النتيجة انقطاع فى علاقتى بالاخرين

حاليا اسعى لنقل السكن لمنطقة اقل كثافة من الهرم .

- اكثر كلمة تصيبنى بحالة من الجنون و العصبية هى كلمة ( أهدأ )

كنت اسعى لنقل العمل لخارج القاهرة بس ربنا مسهلش ( طبعا مع انى كنت حابقى بعيد عن زوجتى و ابنى ) بس كنت حابقى افضل نفسيا و مشاكلى مع المجتمع كانت حتبقى اقل خصوصا خارج القاهرة .

بصراحة بالنظر لكل ما سبق اكتشف انى ضحية ما نحن فيه و اكتشف انى لم استطيع الا حل 15 % من المشكلة و لا ازال اعانى مع ( جهلاء الشعب المصرى ) بنسبة 85 %

بس حقولك حاجة ، لا زال جزء داخلى يحترم الاخرين و اعطى الاولية للاخرين للمرور فى حالة احقيتهم ، و التزم بخطوط السير الخاصة فى الشارع ، استخدم الاشارات دائما لما احتاج الى الحركة بمرونة فى الطريق السريع يمين و شمال ، اتكلم مع الاخرين بمنتهى الذوق فى بعض الاحيان
( حتى يثبت العكس ) ، مرة تاكسى قديم قوى واقف فى الشارع عربيته مش رادية تدور و طلب منى انه يستلف البطارية الجديدة بتاعتى اللى لم يمضى على شراءها شهران فرحبت بهذا و خليته ياخد البطارية و يحاول يدور عربيته ( مع انى مرة دوخت الى سبع دوخات علشان ادور عربيتى فى احد الايام قبل شراء البطارية الجديدة و لم افلح و لم اجد احد يساعدنى ) ، اتطلع دائما الى مساعدة من يحتاج مساعدتى ، ساعات ، ساعات ، اسيب اللى يكسر بسيارتى على سيارتى بدون ما ارد عليه
و لا حتى بكلاكس .

يعنى انا كويس اهه ،

فى احد الايام سمعت جملة بتقول انه يجب ان لا تكون افعالى هى ردود على أفعال الاخرين
انا مقتنع بهذه الجملة بس ليست دائما .

شوف ممكن تكون خلاصة ما احاول قوله انه دائما لا تتوقع ان يكون رد فعل الاخرين مهذبا
بس لما تلاقى معاملة الاخرين مهذبة ، احرص على الرد بمثلها و احسن منها كمان

الحديث النبوى يقول ( افشو السلام بينكم ) احرص على ذلك كلما جاءت فرصة

هناك الكثيرين من قائدى السيارات مهذبين جدا و هم ما يجب ان ننظر اليهم على انهم هم الشعب المصرى ، و على العكس يجب احتقار كل ما يسىء لنا كشعب ، و طبعا اقول الاحتقار فقط وليس الرد او العراك ، حتى لا نخسر الجزء الجيد اللى لا يزال موجود بداخلنا و لا نستطيع بعد ذلك اصلا التعامل مع المهذبين من ابناء هذا الشعب.