حمله ضد سواقه الميكروباصات و النقل.....جمد قلبك

**3mr Farrag** · 09-04-2008 05:11 PM

المشاركة الأصلية كتبت بواسطة zalabany2007

أنا معاكم قلبا وقالبا وما عنديش أي مانع إني أزنق على ميكروباص نقل أتوبيس إنشاالله حتى أتوبيس نهري أنا اتخنقت خلاص وفعلا انا بمشي فى الشارع متحفز لأي بني آدم سايق ميكروباص بالذات ولا المني باص الأخضر ده راخر اللي بقى مشكله وأنا موافق على الحمله دي ومعاكم ايه رأيكم نطبع استيكر ونلزقه على العربيات ضد سواقين الميكروباص والأتوبيس ونعملها حمله قومية لمحاربة سائق الميكروباص

هي فكره مش بطاله .....
بس اكيد هيبقي حرب ذي ما قال cybrarian استاذ
و تلاقي الشارع كلوا عمال يزنق علي بعضوا:) ذي عربيات الملاهي

**vet mitcho** · 09-04-2008 05:26 PM

رجعولي بس ال 504 القديمة وانا اوريهم
بس المشكلة انك لازم تتلط طبعا انا ازنق على الناس دوول لكن على البطئ فقط و في الاشارات لكن في الظروف العادية بنفضلهم
لانك مثلا لو معاك 2007 او 2008 اي خبطة لا قدر الله في الفبريكة عربيتك قلت 5000 جنيه اقل ما فيها واتخانق واضرب براحتك

**mahamedaraby** · 10-04-2008 03:41 AM

ياجماعه والله مشكله سواقين الميكروباص ان هو بيبص على اى حته فى الطريق ماعدا ادامه يعنى ماشى عمال يبص على الزبون ده على اليمين والشمال وطبعا ولا فى دماغه السواقه ولا الطريق وياسلام بقى لو ميكروباص جانبه ونفس الخط وفاضى كمان اتفرج ياجدع على احلى دراج ممكن تشوفه فى حياتك

ياجماعه انا شايف ان الموضوع اكبر من كده

**lightspeed** · 10-04-2008 04:13 AM

فعلا والله معظم سواقين المكروبصات بقوا حاجه صعبه..... قلبينها( نيد فور سبيد)
بس انا اعرف واحد كان بيأدبهم;) من كتر متخنق منهم
اى ميكروباص يزنق عليه يقوم ماشى على يمين الميكروباص(وطبعا الميكروباص هينزل ويطلع زباين من اليمين) ويفضل ماشى جنبه المكروباص يسرع هو يسرع لو المكرباص هدى هو يهدى (يخليه ميعرفش يركب زباين) لحد ما يخنقه وبعدين يسيبه:p

**cazanova555** · 10-04-2008 04:50 AM

جمد قلبك واخبط عربيتك :):):)

انت عارف السواقين دول تنحين ليه وباردين ؟

لانهم 24 ساعه علي الطريق لازم يكونو باردين

بس انا ياويله الي يقف قدامي يركب زبون ويتنح

علي طول اطلع دماغي من الشباك وخش يابن ال ........... انتو عارفين الباقي

**دموع الثلج** · 10-04-2008 06:36 AM

انا اختلف معاك بصراحه فى الفكره مش معنى ان سواق ميكروباص عربجى وبيسوق العربيه وهو فى ايده سجاره مخدرات ومستبيع للطريق اجى انا بئه اعمل زيه

ولو ماشى عكس الاتجاه اروح اعكس الاتجاه زيه عشان ازنق عليه

طبعا الكلام برضوه على النقل كله حاجه زفت فى زفت خصوصا على الطرق الدائريه مهزله وبما انى لو تنحت وجمدت قلبى وعملت كده مع واحد همجى ممكن تكبر فى دماغه ويخبطنى لانه عارف الخبطه فى عربيتى هتاثر فيا جامد وكمان مش هيصلح لى حاجه لا قدر الله لكن هو ولا هتفرق معاه لى ماشى حتى من غير ابواب لانه غالبا العربيه بتكون مش بتاعته وهو سواق عليه متفرش معاه خالص

ضيف بئه على الملعون الميكروباص والزفت النقل المسخوط التوك توك ده انا نفسى بجد بجد ربنا يولع فيه يعنى ده مهزله بكل المقاييس وخصوصا اللى بيسوقوا التوك توك
اغلبهم من متعاطى المخدرات وبيسوقوا بغباوه ماهم مش فى وعيهم يا حرام
واللى غايظنى ان الحكومه خلاص هترخص للتوك توك عشان يعملوا سيوله مروريه فى الشارع

انا من يومين كنت ماشيه ومهديه بطلع مطب لقيت جاى فى وشى ميكروباص فولكس وجمبه توك توك بيسابقه عشان يعدى قبله راح الميكروباص مرخم وحادف يمين على التوك توك رح خبطه وحدفه على عربيتى لانى مهديه عند مطب يعنى على اخر ثانيه ربنا سترها حدفت بعربيتى على الشمال ركب الرصيف بعجله .......

والمصيبه كل واحد فيهم قام بص على عربيته وضحك ومشى ولا حتى اعتذار

فلذلك مش هقول غير ربنا يهد القوى والمفترى وسواقين التوك توك والميكروباص

**KarimAbulEla** · 10-04-2008 07:50 AM

مع انى فرحت جدا بهذه المشاركة لانها بداية الطريق فى ايجاد حل لهذا الموضوع اللى كرهنى فى السواقة و الشارع و الناس كلها بس ارجع و اقول كما قلت سابقا فى مشاركة اخرى ، الناس دول سواقين الميكروباصات يبتعاملوا - مع موضوع الكسر على العربيات المجاورة و الوقوف فى وسط الشارع بلا انتباه للعربيات الاخرى و الكثير من الافعال الاخرى - بلامبالاة تماما و فى نفس الوقت هما تربوا على هذا يعنى هذا يعتبر شىء له زى الهواء اللى بيتنفسوه ، يعنى ممكن تلاقى سوق ميكروباص بيكلم معاك كويس و ابن حلال لو انت قاعد جمبه فى المقعد الامامى لكن ساعة السواقة تلاقيه بيكسر على عباد الله اصحاب العربيات الاقل منه فى الحجم ( الملاكى ) ، و طبعا زى ما قال الزملاء ان دول لا يفرق معاهم هذا الكلام و هذه الحملة لن تكون رادع اطلاقا من وجهة نظرى
لكن انا اعتقد و هذا مجرد اعتقاد اننا لو قدرنا نوصل شكوى من عدد لا بأس به اعضاء المنتدى الى وزارة الداخلية او ادارة المرور من سائقين الميكروباص و حاجاتنا كسائقين ملتزمين الى من يظبط الطريق من رجال المرور بحيث يكون هناك مراقبة فعلية لحالة الطرق و الشوارع و ايقاف و ردع كل من يحاول تحويل الطريق الى ساحة العاب كمبيوترية اعتقد ممكن هذا ممكن يجيب نتيجة و لو بصفة موسمية ، فرجال المرور هم الوحيدين على ردع سواقين الميكروباص و هم الوحيدين القادرين على الزام جميع السائقين - الغير ملتزمين بالاداب القيادة - بالنظام و اتباعه لكنهم لا يؤدوا دورهم فى هذا كاملا و يعتبروا وجودهم فى الشارع فقط هو لاخذ المخالفات و هذه هى المهزلة و بسبب هذا اصبح كل الناس سواء كان سائقين ميكروباص او نقل او ملاكى يفعل ما يشاء بدون رقيب
طيب والله العظيم انا منساش مرة و انا فى رمضان شوفت مندوب شرطة بيتخانق مع سواق عربية نقل اصر انه يخش عكس الاتجاه فى شارع البطران اللى موازى للمريوطية و ووقفه و نزله من العربية و تشابك معه ، طبعا هذا ليس معناه ان هذا صح ، بس لو لكل رجال المرور تعاملوا مع المواقف المشابهة بنوع من الحزم كان الموقف يكون افضل بكثير مما عليه الحال الان

و لهذا اعتقد انه دورنا لتسليط الضوء على تفعيل دور رجال المرور المغيب تماما فى الشارع المصرى

تحياتى

**tutankhamoun** · 10-04-2008 08:28 AM

يا جماعة الموضوع ده بقى مٌتعب بجد
يعني أنا بحس إني بحارب جيش و أنا منفرد وحيد

أصل المشكلة مش في سواق الميكروباص بس
الأسوء هم سائقي الميكروباص
النقل
الشباب الملعون بتاع الغرز و خلافه و اللي فاكر نفسه ماسك دراع أتاري و بيلعب على التليفزيون أو قاعد على الكمبيوتر و بيلعب need for speed
و بعدين تيجي نسبة السائقين اللي مبيعرفوش يسوقوا أصلا
و بعدين الستات
و بعدين الأخوة محبي السرعة

----------------

مفيش أي التزام من أي نوع
مفيش أي أحترام لأي حد

---------------
و الله العظيم ساعات بحس و أقول في نفسي
يا سلام لو في مدفع آلي على سطح العربية
بحيث كل غبـــــــــي و هم كثيرون .......... يعمل أي حركة معايا
أطلق عليه طلقة مميتة ........ تأخذ أجله و يغور في ستين داهية

--------------
بس أرجع أقول .......... حــــــــــــــــرام ...مينفعش

و بعدين أصلا مينفعش أركب المدفع ده..... و لو مكنش حرام .... و لو مكنش ضد القانون !!!!!!!!!!! كنت لن أتوانى في تركيبه و قتل الأغبياء

--------------
بس أنا زهــــــــــــــــــــقــ ـــــــــــــت
..............و طــــــــــــــــــهـــــ ـــــــــــقط
و حسبي الله ونعم الوكيل