-
سؤال هام عن فيات اونو
السلام عليكم و رحمة الله و بركاته
انا لسة عضوة جديدة فى المنتدى و دى أول مشاركة لية
بصراحة مواضيع المنتدى و الردود شجعتنى إنى أسأل سؤالى:
انا عايزة اجيب عربية جديدة بالتقسيط بس يكون تمنها الاصلى فى حدود من 50 الى 55 الف
, و كان امامى خيارات كتيرة منها الماروتى و السبارك و الالتو بس فى ناس كتيرة شكريتلى فى الاونو
المشكلة انى لما دورت على الاونو على النت ملقيتش اى معلومات عن اونو جديد كله مستعمل
الفكرة كلها انى عايزة حاجة بالتقسيط مقدم لغاية 10000 بس
يا ريت تفيدونى من حيث اسعار الاونو الجديدة.
شكرا
-
اهلا و سهلا بيكي خت عزيزه معانا :)
بالنسبه للاونو الحديثه ف انا بقالي فتره مش بشوفها اطلاقا و اظاهر كده معدتش بتنزل
غير كده انها مختلفه عن الاونو القديمه كليا و بالتالي قطع غيار الموتور حتبقي اغلي.
لو هيا موجوده و انت متقبله نقطه قطع الغيار يبقي توكلي علي الله و انا عموما حسألك عليها واحد قريبي كان جايبها اشوفها لسه بتتباع و لا لاء.
لو مش موجوده يبقي الالتو اختيار مناسب جدا في الفئه دي
-
اونو الجديدة او اونو فاير
1300 cc حقن الكتروني.
حجمها اصغر من الاونو القديمة لحد 2002
الاجزاء الميكانيكية مختلفة تماماً عن القديمة
لاختلاف الموتور ونظام حقن الوقود.
قطع غيارها اغلى كتير من القديمة واغلى
من الالتو والماروتي، وغير منتشرة خارج التوكيل.
نصيحة لو لقيتي كيا بيكانتوا هتكون احسن
100 مرة من الاونو فاير الجديدة بغض النظر
من مشاكل التوكيل لان اوماترا توكيل فيات البعد
عنة غنيمة!!.
-
متشكرة جداااا على ردودكم
انا اتصلت بالتوكيل "اوماترا" و سألتهم قالوا انهم بطلوا يجيبوها خلاص
انا حاليا بفكر اجيب التو او لادا (اصل انا المسافة اللى هامشيها كبيرة و عايزة حاجة تستحمل فناس كتيرة رشحتلى لادا و لما سألت على ال لادا الروسى مالقيتش عند التوكيل غير 2111 و 2107 بس و قالولى ان عددهم محدود و مش هيجيبوا غيرهم قريب) بصراحة انا محتارة جدا دلوقتى بين :
1. التو 1.1 56000
2. لاد 2107 روسى + تكييف + بور 52500
يا ريت لو حد يقدر يفيدنى
و هل ال لادا 2111 تستاهل تمنها 64500 هيا station و فيها كل الكماليات
شكرا
-
انصحك باللادا 2107 الروسي عربية تتحمل المشاوير الطويلة وتتحمل المطبات و الحفر الموجودة في الشوارع و قطع غيارها رخيصة و متوفرة
-
لو وصلتي لـ64500 يبقى سيبك
من كل العربيات دي وهاتي لانوس SE 1500cc
افضل منهم جميعاً. العربية ناعمة وسحبها حلو وقطع
غيارها منتشرة ومش غالية والكل بيفهم فيها وفي صيانتها.
العربية فيها تكيف وباور ستيرنج.
ملحوظة اللادا عموماً سيارة ناشفة للرجال فما بالك للسيدات.
-
متشكرررررة جدا لردودكم و نصايحكم.
انا فعلا ناس كتيرة قالولى ان اللادا تستحمل المطبات و الحفر بس ناشفة.
و بالنسبة للانوس هى حلوة جدا انا عارفة, بس المشكلة انها واطية و بالتالى بتحك فى المطبات, صح؟
عموما انا بقيت مترددة اكتر لان فيه ناس نصحتنى بالفيرنا لانها بتعمل حوالى 63500 مانيوال و هاف اوبشن
او اجيب هوندا سيفيك مستعمل مديلات التسعينات
انا خلاص اتحيرت و مش عارفة اعمل ايه :confused:
و عموما متشكرة لكل الردود و لو محدش رد تانى انا مش هتضايق لان الموضوع تشعب جدا و دخلنا فى نوعيات عربية مختلفة كتير
شكررررررررررررررررررا :)
-
طب ما تقولي حدود الفلوس اللي معاكي كام؟
و عاوزه تجيبي كاش و لا تقسيط
و مفيش حد بيضايق هنا كلنا خوات:)
-
متشكرة جدا يا hazem
لو هجيب مستعمل اقدر ادبر فى حدود 30 الف بس
لو هجيب جديد هيكون بالتقسيط و المقدم يكون فى حدود 20 الف و قسط 1500 فى الشهر
ملاحظات هامة:
1. طريقى طويل حوالى 70 كم رايح بس , بس ده هيكون مرتين او تلاتة فى الاسبوع باقى الايام استخدام عادى
2. طريقى فيه مطبات كتييييييرة جدا
3. نفسى فى حاجة فيها تكييف
4. انا بخاف من المستعمل لانى جديدة فى السواقة و معنديش خبرة , بس الميزة انه بيكون ارخص و احيانا بتكون حاجات كويسة
شكرا مرة تانية لكل الاعضاء الافاضل اللى ردوا عليا
-
طيب لو مستعمل ممكن تجيبي ريجاتا ولو زودتي 3 ولا 4 الاف
ممكن تجيبي اكسيل او سويفت.
بالنسبة للزيرو هي الفيرنا حلوة بس انتي وحظك بقى لان في
عربيات كتير بتنزل بعيوب في الموتور وعيوب في التقفيل
او تجيبي الفيرنا الفيفا التجميع الهندي وتبعدي عن غبور خالص.
ممكن تجيبي بردة شيفرولية افيو التجميع المحلي
واخر اختيار هو الفيات سيننا.
Content Relevant URLs by
vBSEO 3.6.0 PL2