روحت النهاردة رخصت 3 سنوات وفحص فى مرور مدينة نصر وجايبلكم مفاجئة

اللهم صل على محمد وعلى آله وصحبه أجمعين



روحت النهاردة مرور مدينة نصر رخصت 3 سنوات و كان عندى فحص وجايبلكم مفاجئة

أن الخزينة مابقتش بتقفل الساعة 12 لقيتها شغالى لبعد 12.30 قلت يمكن بتقفل 1 سئلتهم قالولى بقو يشتغلو لحد 3 مساء

حتسئلونى دفعت كام

حقولكم عربيتى 1300 سى سى دفعت 835 جنية منهم 265 تأمين و 525 ضريبة و20 مخالفات مع أنى معنديش مخالفات بس حاجة كدة فوق البيعة

الصراحة يعتبر زحمة متوسطة بس حاجة تحزن أنك تقعد 3 ساعات عمال تروح من شباك لشباك ومن موظف لموظف ومن طابع لمستند لتصوير ورق

مع أن المفروض يبقى ورقة واحدة ومتخدش غير 15 دقيقة

دة غير الأسف والحسرة على الحكومة الأكترونية اللى متوقفة وبقت منظر بس

الحمد لله

اقتباس:

---

المشاركة الأصلية كتبت بواسطة ashraf1212

الصراحة يعتبر زحمة متوسطة بس حاجة تحزن أنك تقعد 3 ساعات عمال تروح من شباك لشباك ومن موظف لموظف ومن طابع لمستند لتصوير ورق

---

اتفضل ياباشا عندنا في مرور السلام

:36_8_1[1]:

عندما ترخص سيارة فى مرور السلام وبعد اول خطوة وهى نيابة المرور لابد وان تحتاج بعدها الى علاج نفسى حسبى الله

مرور مدينة نصر يعتبر أفضل مرور على مستوى القاهرة .

وحكاية الخزنة دي حاجة مفرحة والله , كنا نضطر نرحل باقي الإجراءات لتاني يوم عشانها

اقتباس:

---

المشاركة الأصلية كتبت بواسطة aly252

عندما ترخص سيارة فى مرور السلام وبعد اول خطوة وهى نيابة المرور لابد وان تحتاج بعدها الى علاج نفسى حسبى الله

---

جامدة علاج نفسى دى :new: كويس أننى مجربتهوش ولا ناوى

اقتباس:

---

المشاركة الأصلية كتبت بواسطة د.محمود صلاح

مرور مدينة نصر يعتبر أفضل مرور على مستوى القاهرة .

وحكاية الخزنة دي حاجة مفرحة والله , كنا نضطر نرحل باقي الإجراءات لتاني يوم عشانها

---

أنا كنت فاكرهم طوروهم كلهم مش مدينة نصر فقط عموما الحمدلله أن حظى كويس

والله حاجه مفرحه فعلا والف الف مبروك ليك يا باشا ع الترخيص وربنا يباركلك ويكون فعونك مع العلاج النفساني :d
وفعلا دي حقيقه علميه مؤكده اننا كنا ينضطر نجري ونستعجل ويخلونا نستعجل ونرحل الاجراءات لليوم التاني وحاجه تقرف ومشكله كمان من وجهه نظري ربنا يستر ونشوف ايه نظامها شهاده المخالفات ايه نظامها دلوقتي مش عارف وربنا يستر هرخص كمان ايام

معلش لو فيها رخامة منى زياده
ممكن اعرف حضرتك اشتريت ورق ايه وبكام بالظبط والاكراميات والكلام ده موجود لسة ولا لا؟؟؟
وممكن اعرف ضريبة اكسيل 1500 موديل 96 تبقى فحدود كام لو حبيت اجددها 3 سنين؟؟
وبالنسبة للطفاية وشنطة الاسعافات والمثلث اجبهم من بره عادى ولا لازم من المرور؟؟؟
وبالنسبة للفحص لو عندى خبطات خفيفة كده لازم اظبطها قبل ما اروح ولا عادى مفيش مشاكل؟؟
معلش استحملنى واشكر سعة صدرك وربنا يباركلك فى العربية

مكنش عندى مخالفات ومع ذلك دفعونى 20 جنية فوق البيعة الظاهر غرامة علشان معملتش مخالفات

اقتباس:

---

المشاركة الأصلية كتبت بواسطة ashraf1212

مكنش عندى مخالفات ومع ذلك دفعونى 20 جنية فوق البيعة الظاهر غرامة علشان معملتش مخالفات

---

ههههههههههههههه
دى بيسموها رسوم ميكنة
وكانت قبل كده 5 جنيه

اقتباس:

---

المشاركة الأصلية كتبت بواسطة beshomilan

معلش لو فيها رخامة منى زياده
ممكن اعرف حضرتك اشتريت ورق ايه وبكام بالظبط والاكراميات والكلام ده موجود لسة ولا لا؟؟؟
وممكن اعرف ضريبة اكسيل 1500 موديل 96 تبقى فحدود كام لو حبيت اجددها 3 سنين؟؟
وبالنسبة للطفاية وشنطة الاسعافات والمثلث اجبهم من بره عادى ولا لازم من المرور؟؟؟
وبالنسبة للفحص لو عندى خبطات خفيفة كده لازم اظبطها قبل ما اروح ولا عادى مفيش مشاكل؟؟
معلش استحملنى واشكر سعة صدرك وربنا يباركلك فى العربية

---

تحت أمرك أنا الصراحة مبحبش موضوع ألأكراميات والرشوة مع أنى مع زيادة المصاريف عشرة جنية فى مقابل راحة الموظفين والحفاظ على كرامتهم

أنا تقريبا مدفعتش خالص بالرغم من حكاية كل سنة وأنت طيب وخلافة اللى حتسمعها من أكترهم بس فية موظف محترم و جابلى دوسية من عندة فأديتو 2 جنية فقط ودة علشان الدوسية فقط

أما المصاريف فكانت بالنسبة لثلاث سنوات

دفعت 835 جنية منهم 265 تأمين و 550 ضريبة و20 مخالفات

بس خالو بالكو عربيتى 1300 سى سى فقط يعنى بالنسبة لل 1600 زودو شوية حوالى 200 جنية

وكان معايا الطفاية وصلاحيتها خمسة سنوات فقط من التاريخ المحفور عليها أو أدفع 145 جنية واحدة جديدة من جوة المرور أو أشترى من شارع دمشق أوفر لو محتاج

اقتباس:

---

المشاركة الأصلية كتبت بواسطة khaled_nowaihy

ههههههههههههههه
دى بيسموها رسوم ميكنة
وكانت قبل كده 5 جنيه

---

كان كلة بيدفع 10 أو 20 أنا دفعت 20 الظاهر علشان رخصت 3 سنين و 10 للى بيرخص سنة واحدة فقط

وبعدين أحنا ندفع وخلاص مش مشكلة المسميات شكلنا كلنا بعد كدة حنبيع العربيات ونجيب عجل

بس ساعتها حيحطو رسوم على العجل وحيرخصوة ويحطولو نمر ويفط كمان علشان الرادار

اشكرك استاذ اشرف لتعاونك..وربنا يوفقك

اقتباس:

---

المشاركة الأصلية كتبت بواسطة beshomilan

اشكرك استاذ اشرف لتعاونك..وربنا يوفقك

---

العفو دة أنا اللى سعيد أننى حقدر أفيد ناس كتير عن طريق موضوعى دة ويسهلهم ويوضحلهم ألأجراءات ويختصر وقتهم فى المرات القادمة

حتى الناس اللى حتقرأ الموضوع وتمشى
بس يا ريت يفتكرونى بدعوة حلوة وهمة فى المرور بيرخصوا

فى حاجة أفتكرتها خلو معاكم صورة الرخصة والبطاقة بدل متتأخرو فى التصوير هناك

اقتباس:

---

المشاركة الأصلية كتبت بواسطة ashraf1212

كان كلة بيدفع 10 أو 20 أنا دفعت 20 الظاهر علشان رخصت 3 سنين و 10 للى بيرخص سنة واحدة فقط

وبعدين أحنا ندفع وخلاص مش مشكلة المسميات شكلنا كلنا بعد كدة حنبيع العربيات ونجيب عجل

بس ساعتها حيحطو رسوم على العجل وحيرخصوة ويحطولو نمر ويفط كمان علشان الرادار

---

تصحيح بسيط 10 جنيه بالنسبه للعربيات اللى بتجدد ومعلقه لوحات قديمه و 20 جنيه للعربيات اللى معلقه لوحات جديده اكيد حضرتك كنت معلق لوحات جديده ومبرك

اقتباس:

---

المشاركة الأصلية كتبت بواسطة elhelawy

تصحيح بسيط 10 جنيه بالنسبه للعربيات اللى بتجدد ومعلقه لوحات قديمه و 20 جنيه للعربيات اللى معلقه لوحات جديده اكيد حضرتك كنت معلق لوحات جديده ومبروك

---

صح غريبة عرفت الموضوع دة منين ؟

اقتباس:

---

المشاركة الأصلية كتبت بواسطة أبو صلاح

اتفضل ياباشا عندنا في مرور السلام

:36_8_1[1]:

---

يا راجل حرام عليك مرور السلام ايه بس ههههههههههه
دة عشان انقل ورقي منه
عملت تغيير لمحل الأفامة و غيرت بطاقتي و نقلت لمرور الأميرية ساعة أو ساعتين بالكتير و تخلص كل حاجة

انا سمعت ان مفيش مخالفات وكل الناس بتدفع حاجه بسيطه وكان في صاحب ليا بيقولي روح طلع شهادة مخالفات دلوقتي
هل الكلام ده صحيح ولا اشاعه؟

الحمد لله انك تبع مدينة نصر وبلاش تزعل على موضوع 3 ساعات ده عشان فى ناس بتعد 3 ايام

اقتباس:

---

المشاركة الأصلية كتبت بواسطة hero_xp10

الحمد لله انك تبع مدينة نصر وبلاش تزعل على موضوع 3 ساعات ده عشان فى ناس بتعد 3 ايام

---

والله الواحد نفسة يشوف حاجة تتعمل بعد الثورة

بدل حالة ال لا سلم لا حرب اللى أحنا فيها

أقلها نشوف تحديث فى المرور و التراخيص خلينا نشم شوية تكنولوجية مش حقول ذى أوروبا لأ زى ألأمارات

يعنى فى خلال دقائق يكون معايا الرخصة الجديدة

أو حتى يشغلو موقع تجديد الرخص اللى على النت وواقف من ساعة ما عملوة بلد بدائية صحيح

اقتباس:

---

المشاركة الأصلية كتبت بواسطة أبو صلاح

اتفضل ياباشا عندنا في مرور السلام

:36_8_1[1]:

---

+1111111111111111111111

التامين الاجباري زاد جدا
فيه شبه اجبار لتشتري طفاية ب 121 جنيه
الموظفون كما هم اغلبهم يتميزوا بالنطاعة وطلب الاكرامية بالعين وليس الفم والحدق يفهم ويمشي اموره
وطبعاً روح هات استمارة كمبيوتر و روح صور دى وبعدين روح هات تاريخ صرف لوحات وبعدين روح صور تاني وثالث
ورابع منتهي قلة الذوق
ونفسي اعرف ليه دق الارقام علي الطفايه طب لو حابيع العربية وعاوز الطفاية لعربية اخري ممنوع ولا ايه


التجربة دي من مرور عين الصيرة-القاهرة

أنا لسة مجدد الرخصة من كام يوم و الى تبع مرور مدينة نصر تحديدا ممكن أقول لحضرتك أزاى تنجز الوقت و تخلص بسرعة صور الرخصة و البطاقة قبل ما تروح المرور يفضل صورتين
أول ما تدخل المرور على أيدك اليمين الجزنة الى بتبيع النماذج اشترى النماذج المحتاج اليها سواء تجديد أو تجديد زائد فحص زائد طابع شرطة ب 1 جنية
روح عند الاكشاك الالوميتال أول كشك أشترى نموذج كدة ب 50 قرش بتاع المخالفات و جنب الكشك دة أدفع التأمين الاجبارى بالمرة بعد ذلك توجة الى شباك رقم 11 الى فى الصالة الداخلية أخر الشبابيك و أديلة الرخصة و النموذج و هو حا يبعتهم لما يكشفو من الملف علشان النمر القديمة الى على العربية و بعدين بيسلمك الرخصة و أنت قاعد مستنى الرخصة أتسلى كدة و من صورة رخصة العربية الى معاك قم بملآ النموذج بتاع التجديد من بيانات الرخصة الى معاك صورتها و من ورقةة التأمين الاجبارى الى أنت دفعتة
أول ما تستلم الرخصة أذهب للشباك بتاع المخالفات و بعد ما تستلم شهادة المخالفات أدخل الصالة و قم بتقديم الاوراق الى الموظف و حا ياخد منك صورة من البطاقة و تدفع فى الخزنة و بعد كدة تطلع فى الهواء تستنى الرخصة بتاعتك بس كدة
بلاش تروح المرو لا يوم خميس و لا يوم سبت دول زحمة شوية .
على فكرة المخالفات ممكن تدفع 5 جنية أو 10 جنية أو عشرين جنية مش عارف الفرق أية الحقيقة بس أنا عندى النمر الجديدة و دفعت 5 جنية فقط
كل الى أتعمل دة أخد وقت بالظبط ساعة و عشرين دقيقة و أنا روحت المرور متاخر الساعة كانت 10 صباحا لما دخلت المرور

اقتباس:

---

20 مخالفات مع أنى معنديش مخالفات بس حاجة كدة فوق البيعة

---

هو انت اخدت بيهم وصل ولا دفعتها جدعنه
لان فيه واحده في مرور المعادي كان الي معلهوش مخلفات تقله هات 5ج ومتديش وصل وعرفت انها بتسفها في جبها
وجه واحد محترم طلعلها 10ج فردت بكل ادب انا اسفه مش باخد فلوس من حد وهي في الاصل بتلبع 5 ج من كل واحد علي تمن مخلفاتة
حاجة في منتها الغرابة

يا باشا تعالى شرفنا فى مرور فيصل واحنا نعرفك يعنى ايه مرور على حق :049:فعلا حتعرف المعنى الحقيقى للروتين ....... مرور فيصل .....مرور مصرى ام الاجنبى :C_laugh[1]:

الى شوفتة فى المرور أن أى حاجة بتتدفع بتاخد بيها أيصال أنا دافع 5 جنية فقط و أخدت أيصال
و بصراحة مكنتش عاوز ادفعهم بس دول زى دمغة خدمة
http://img831.imageshack.us/img831/4...0520115756.jpg

ان سمعت ان اللوحات الجديده هتتلغى وهيشغلوا النمر القديمه تانى الكلام ده صحيح ولا دى اشاعه

ياريت يلغوها

انا مرخص وفاحص هناك من فترة والوقت كان تقريبا ساعة واحدة مش اكتر!!