عايزين نجرب يعني إيه حرية لأول مرة في حياتنا!

الناس الجميلة اللي مش ناوية تنزل تصوت عالتعديلات! مش واخدين بالكم إن دي أول مرة تقريبا في تاريخ مصر من أيام الفراعنه إن صوتنا فعلا هيفرق؟ مفيش خلاص اخترناك و99.99999% موافقه! انزلوا! شاركوا و قولوا رأيكم!

محتارين؟ مش عارفين تختاروا نعم ولا لا؟ عادي! ما احنا كان علينا ستار حديدي عشان ما نفهمش يعني إيه سياسة و عشان ما نشاركش في أي حاجة سياسيه. وكان النظام السابق الله يكرمه بيختار لينا بنفسه من غير مانوجع دماغنا! ف طبعا حاسين بصعوبة عشان محتاجين نعرف حاجات كتير وعشان هنجرب حاجة عمرنا ماجربناها قبل كده.
ماتخلوش حد يأثر عليكم برأيه! عشان تاخدوا قرار, اقرأوا أراء الناس اللي بتثقوا فيهم, اتناقشوا مع بعض, اتفرجوا على لقاءات لناس واسمعوا رأيهم. بس لازم تقرأوا وتسمعوا أراء الناس اللي بتقول نعم واللي بتقول لا, وشوفوا كل اختيار من الإتنين حيودينا فين. شوفوا الأحسن من وجهة نظركم لمستقبل البلد وانزلوا شاركوا في التغير.

طبعا لازم نخلي اهلنا ينزلوا يصوتوا. خدوا بالكم الناس دي بقالها 40 أو 50 سنة ميعرفوش حاجة غير اخترناك والقناه الأولى! ف هيبقى صعب شوية يقتنعوا إنهم ينزلوا استفتاء و يصوتوا...
وحاجة تانية مهمة قوي, يا ريت اللي عنده سواق أو بواب عمارة أو حد بيبيع حاجة في الشارع والناس اللي زي كده يفهمهم إيه اللي هيحصل ويعني إيه دستور ويتعدل إزاي ولو اتوافق عليه إيه اللي هيحصل ولو اترفض إيه اللي هيحصل. أنا اكتشفت إن في كتير من الناس دي ميعرفش إن فيه استفتاء أصلا السبت الجاي! البواب عندنا كان فاكر انها انتخابات رئاسة أو مجلس شعب وفي الحالتين ماكنتش فارقة معاه! مجرد 10 دقائق معاه بقى مقتنع إنه لازم يروح ويصوت.

أخيرًا البلد بقت بلدنا تاني وصوتنا هيبقى مسموع... عايزين نجرب الديمقراطية بجد! يعني نقول رأينا ونحترم الرأي الاخر, ولو طلعت نتيجة الاستفتاء غير اللي انت اخترته تحترم رأي الاغلبيه... عايزين نقرر مستقبل البلد دي بنفسنا... عايزين نجرب يعني إيه حرية بجد لأول مرة في حياتنا!

أماكن الإستفتاء..
http://استفتاء.مصر/referendum-map.html

خطوات التصويت...
Login | Facebook

محمد هشام