الموضوع: أنا هقول لأ للتعديلات الدستورية وعن أقتناع ... ياترى أنت كمان هتقول نعم عن أقتناع ؟

المشاركة الأصلية كتبت بواسطة fepsceasar

انت مش بتقول نعم للدستور بتقول نعم لمجموعة مواد تكفل انتخابات ديمقراطية فى ظل اشراف قضائى وتخفيف القيود على المرشحين المستقلين للرئاسة
صدقنى العبرة مش بالمواد بريطانيا ما فيهاش دستور مكتوب اصلا
اللى بقول لا بيفكرنى بمنتخبنا لما كان يروح افريقيا ويتغلب من فرقة سكة ويقولك
اصل المناخ والارتفاع عن سطح البحر وقلة الاكسجين والملعب غير ممهد
اللى بيقول لا للتعديلات
أصل لسة ما فيش مناخ ديمقراطى والاخوان اقويا واحنا لسة مش مستعدين

أولا حضرتك القيود على المرشحين المستقلين خفت فعلا و كثيرا و لكنها مازالت ظالمة فكيف تقارن بين الحزب الذى يستطيع أن يرشح أى شخص لرئاسة الجمهورية حتى لو حصل على مقعد واحد ب1000 صوت مثلا فى دائرة انتخابية صغيرة و تطلب من المستقل أن يحصل على 30000 مش بس كده و من 15 محافظة و مش بس كده و العدد فى المحافظة الواحد ما يقلش عن 1000 صوت.
طبعا هى مقارنة بالقيود السابقة رحمة و لكنها مازالت مجحفة.

المشاركة الأصلية كتبت بواسطة korkor

وانا هقول نعم ومقتنع وفزاعه القوى السياسيه المنفرده بتاعه الاخوان وفلول الحزب الوطنى مش مستسيغها, واللى يقولك اصل احنا عاوزين وقت علشان الانتخابات دلوقتى مش هتمثل الشباب اللى قام بالثوره يبقى لامؤاخذه بياكل بعقلى حلاوه , الشباب اللى كان بيحرك ( الملايين) فى المظاهرات مش هيبقوا قادرين يحشدوا منتخبين ليهم فى الانتخابات !!!!! , فزاعات فزاعات فزاعات هنبطل نخترع فزاعات ونخاف منها لغايه امتى .

المشاركة الأصلية كتبت بواسطة korkor

انا مش قصدى ان حضرتك اللى قولت كده لكن ده الكلام اللى اتقال وبيتقال من معظم الرافضين للتعديلات , وبعدين الشباب يقدروا بالروح العظيمه اللى كانوا بيها فى ايام الثوره انهم يحشدوا ناس تؤيدهم من غير اى انتظار وتباظؤ على العكس مرور وقت هيخلى القوى السياسيه اللى كانت ميته ( الاخزاب العيره , قوى سياسيه اخرى ) تنتشر و تاخد من شعبيه الشباب بل ان الاخوان نفسهم وفلول الحزب هتكون فرصه جيده ليهم علشان يقدروا ينتشروا فى اوساط الناس ويكسبوا اصواتهم .

فى النهايه نعم او لا اكيد مصر هتبقى احسن واحلى والمستقبل ان شاء الله هيكون مشرق

يا فندم خللينى أرد على حضرتك فى نقطة نقطة:
- فى انتخابات نادى الزمالك الأخيرة و بعد أن حصل مرتضى منصور على حق الترشح و كان كتبقى على الانتخابات شهر كامل قضت المحكمة بتأجيل الانتخابات لعدم تكافؤ الفرص و ده فى نادى رياضى

- الحاجة التانية و هى الأهم مين قال أنا مش عايز إخوان مسلمين أغلبية فى المجلس إذا كان ده بيعبر عن رغبة الأغلبية من الشعب و حتى إذا كان ده للأبد المشكلة فى دلوقتى فى إنهم هما اللى يحطوا الدستور أنا عايز الدستور يتحط الأول و بعدين هما ينجحوا براحتهم مش العكس عشان فعلا اللى يحطوا الدستور يكونوا بيمثلوا كل قوى الشعب فعلا مش فئة واحدة منه.

النقطة الأخيرة و خلينى أقتبس كلام حضرتك تانى
الشباب اللى كان بيحرك ( الملايين) فى المظاهرات مش هيبقوا قادرين يحشدوا منتخبين ليهم فى الانتخابات !!!!!

طيب أنا حضرتك واحد من الشباب اللى كانوا فى ميدان التحرير و اللى قاموا بالثورة و هترشح عن دايرتك الانتخابية عشان بطاقتى عليها عنوان قريب منك جاوبنى بصراحة هتدينى صوتك؟؟؟؟؟؟؟؟؟؟؟

هل هى دى المؤهلات اللى هتبنى عليها؟؟؟؟؟

أى حد هيقول إنه كان من شباب الثورة و معتصم فى ميدان التحرير هنصدقه مباشرة و لا لازم يكون متعلم عليه مثلا؟؟؟؟؟؟؟؟؟؟؟؟

جاوب حضرتك الأسئلة اللى فاتت و قوللى رأيك

المشاركة الأصلية كتبت بواسطة amatoallah

طيب يا جماعه ممكن حد يفهمني لو قولنا لا وطالبنا بدستور جديد

مش ممكن الدستور الجديد دا يخلي مصر دولة علمانيه و الي كنا خايفين منه في دستور 71 ان المادة التانيه تتلغي يحصل

هو مش فيه تصويت على الدستور يبقى ليه الخوف
لو حاولوا يعملوا كده هيترفض الدستور يعنى العملية بأيدينا مش فرضا علينا

المشاركة الأصلية كتبت بواسطة ainshouka

فيه نقطتين عاوز حد يفسرها لى

لو احنا قولنا نعم على التعديلات واتعملت انتخابات البرلمانية والرئاسية وقاموا بطلب تشكيل لجنة عشان تضع الدستور الجديد

البرلمان اللى حينتخب حيكون نصه عمال وفلاحين
والدستور الجديد المفروض حيتلغى منه المادة دى عشان هى مش دستورية

وبعدين يتعرض الدستور على مجلس الشعب عشان يقرر ولو وافق ينزل للإستفتاء العام

طيب ازاى مجلس الشعب وهو نصه عمال وفلاحين حيوافقوا على المادة دى
يعنى يوافقوا على رحيلهم

دى نقطة هل انا صح ولا فى حاجة فاتتنى

النقطة التانية هى ان احنا بنقول نعم عشان حال البلد يستقر شوية

طيب هو ايه علاقة عدم استقرار البلد بالدستور حاليا؟
مفيش امن عشان مفيش شرطة ومش راضية تنزل وليس عشان ان مفيش دستور
المظاهرات الفئوية هى اللى معطلة الانتاج والمتظاهرين طالعين عشان يحسنوا من احوالهم المعيشية وموقفين الشغل عشان كده يعنى ملهوش علاقة بالدستور

يعنى مش الدستور اللى حيقول الراجل دا حياخد كام ولا الامن ينزل الشارع

مفيش حد رد على ووضحلى!!!