الى عشاق هيونداى فيرنا ارجوا الأفادة من مالكى هذة السيارة

**ramysultan** · 12-04-2008 10:44 PM

ياجماعه كل اللي انتم بتقلوه ده ماشي بس في حاجه مهمه تانيه انها العربيه الوحيده اللي ع الزيرو بالتمن ده 70.000 جنيه العربيه دي ماتمفعش للتاجير مطلقا وصعب جدا المقارنه بين عربيه واحد بس بيركبها وعربيه كل يوم واحد شكل بيركبها باسلوب سواقه مختلف.

وبعدين الفلوس اللي معاك هي اللي هاتحدد

**Ahmed Anwer** · 13-04-2008 03:54 AM

المشاركة الأصلية كتبت بواسطة starpro

نصيحة اخوية اوعى تشترى هذه السيارة لقد ذكرت هنا من قبل انها عندى صديق يمتلكها و عنده شركة تأجير سيارات و كان جايب منها كمية كبيرة و باعها كلها بسبب مشاكلها و بها كوارث كثيرة و لاننا مهندسين فحصناها فحص دقيق و اكتشفنا تحلل البلاستيك و الكاوتش بها فى وقت قصير لانه داخل فى صناعتها انتاج محلى غير مطابق للمواصفات الاصلية و للعلم لا يوجد شىء اساسا اسمه فيرنا و الحكاية ببساطة ان النصاب الكبير غبور كان لديه استوك كبير من الاكسنت القديمة عايز يبيعه و فى نفس الوقت عايز ينزل الاكسنت الجديدة و علشان الناس تستمر فى شراء القديمة سمى الاكسنت الجديدة فيرنا و حاليا نزل موديل احدث و هو نيو اكسنت و كلمة نيو تعتبر لعب فى اسم السيارة الاكسنت ايضا و الفيرنا كتصميم من الخارج و الداخل ليست جيدة كما يعتقد البعض و قد نزل منها تعديل موجود فى السوق هذه الايام فى الكبوت الامامى حيث قاموا بأزلة الارتفاع الايمن و الايسر اعلى الكشافات الامامية و قد كان هذا سؤ تصميم فى الفيرنا قاموا بتعديله .

الأخ Starpro

بداية تحية علي اسلوبك الصريح و المواجه في كل مواضيعك

بحس انه اسلوب قوي بتقول للأعور انتا أعور في عينه

بس في شوية حاجات مش منطقية في ردودك

هل من الطبيعي ان واحد شاري عربية يروح يحلل الفيبر و الكاوتش اللي فيها ؟؟

حتي لو شغال في مصلحة الكيميا ؟؟

طيب ماشي ،، الفيرنا بقالها من 2004 في مصر ،،

مش كان المفروض المشكلة التحليلية الإكتشافية دي تظهر بعد 4 سنين

حتي حكاية حضرتك عن صاحبك اللي عنده ريحة بنزين في الفيرنا

و قالوله هات 1000 جنيه عشان نصلحها

ده يبقي توكيل نصاب دي ماشي لكن كمان توكيل نصاب و غبي

يعني المعتاد انهم يسوفوه و يطلعوا عينه لحد ما يزهق او يقولوه الكلمة المعتادة ده كده الطبيعي و انتا بتحلم ،،

لكن يبقوا من الهبل انهم يقولوا ده عيب صناعة و نعرف نصلحه و هات فلوس ؟؟؟

و بخصوص حكاية المسميات

المفاجأة ان الإكسنت اسمها فيرنا في كوريا نفسها

و في بعض البلاد مازالت تسمي اكسيل و في بلاد اخري بتنزل تحت علامة دودج

و كل بلد بيبقي ليها اسم خاص بيها

و الفيرنا واحدة من انجح السيارات الصغيرة في العالم (اكسنت من 2002 إلي 2005 )

و ممكن تعمل سيرش بسهولة عليها و تشوف الجوائز اللي واخدها

او تراجع الموضوع ده

http://www.nilemotors.net/Nile/showthread.php?t=20667

و لو غبور نصاب و عنده دفعه راكدة من الإكسنت القديمة عايز يخلص منها

يبقي ايه الحال بابو الفتوح اللي لسه بيجمع اللانوس اللي شركتها فلست و اتباعت

يعني الحكاية ببساطة ان في بعض بلاد العالم النامي بيستمر تجميع الموديل لفترة اطول بعد انتهائه

بعدين حكاية نزول موديل جديد منها الكبوت غير مرتفع من اليمن و الشمال ،،

عشان عيب تصميم ،،، هوا كلام و خلاص

يا سيدي الفاضل دي الفيفا ،،

الشكل القديم من الإكسنت ،،

اللي هيا اكسنت من 2000 إلي 2002

يعني المصري هيا الإكسنت الشكل الأحدث

اللي فيها عيب تصميم الكابوت مرتفع من اليمين و الشمال

و ما زالت بتتصنع في مصنع هيونداي بالهند حتي الآن

و الفيرنا عربية حمالة اسية و لذلك بقت المفضلة كتاكسي في شرم و الغردقة

و مكاتب الإيجار و ممكن تسأل عليها العضو انليزر اللي بيشكر في الفيرنا جدا

رغم انه عنده كذا موديل تاني

و شوف كلام الخليجين عنها سيارة كرف بحق و في السعودية عربية الدليفري الأساسية

باختصار مظهرش مشاكل عامة منها زي اللانوس مثلآ علي المدي الطويل

و معظم المشاكل في البداية

و لكن للحقيقة مفيش دخان من غير نار

و المشكلة انها بيبقي فيها عيوب تجميع مش عيوب خامات لأنها من اكتر العربيات اللي مكونتها كوري

العيوب دي من مفيش لحاجات بسيطة في الأغلب لمصايب

و حجتهم المرفوضة ان السنة اللي فاتت كان انتاج المصنع مش مكفي الطلب عليها

و المشكلة في التوكيل اللي مقتنع ان الكواليتي كنترول هيا الضمان

و كل ما يبقي فيه مشكلة يجوبوك ببلاهة امال هما عاملين الضمان ليه ؟؟

و لكن للحقيقة ضمانهم حقيقي و عن تجربة

و بتفرق مع ناس و ما بتفرقش مع ناس اطلاقا

و عجبي علي شركة بتصدر اتوبيسات الحج و مش عارفة تعمل نظام كواليتي كنترول محترم و متابعة تطوير رغم قدمها في التجميع

انا مثلآ كان عندي نوبيرا جابت وش سلندر قبل 40 الف كم

ببساطة خرطوم الرديتاتير باظ و انا مخدتش بالي

و مع ذلك احترم النوبيرا جدا

الغريب بقه ان ازاي الواعي و العليم ببواطن الأمور اللي عارف الحاجات دي كلها

يروح يشتري من الشركة النصابة عربية مش رخيصة زي الماتريكس ؟؟

رغم توفر خمسين بديل بنفس السعر

يمكن حب للمعارك ???

الأخ السائل

سؤال سهل زي ما وضحت المشاكل كلها في البداية فقط

لو في مشاكل

يبقي الحل انك تكشف عليها كويس ممكن في التوكيل يدوك ريبورت كامل عنها بمائة جنيه

و التوكيل باختصار زي اي حاجة في مصر

و لو مفهاش حاجة اتكل علي الله

و اديك شفت اصحابك عاملين 150 الف كم

و ممكن تستني رد ا / حسام حمدي لأنه اكتر خبرة بالفيرنا 1500

و السعر لازم يكون اقل من سعرها زيرو 7 الاف جنية علي الأقل عشان تبقي مستاهلة

و الأفضل مادام نفسك قفلت منها من ردود الأخوة تشوف حاجة تانية

عشان متتلكلهاش

**mido128** · 13-04-2008 08:34 AM

استاذ احمد انور:-
بصراحة انتا كلامك جميل جدا ومقنع جدا واشكرك على الردود الجميلة دى بصراحة انتا اعدت لى الأمل من جديد فى هيونداى فيرنا اشكرك كثيرا جدا جدا

**starpro** · 13-04-2008 09:49 AM

المشاركة الأصلية كتبت بواسطة mido128

استاذ احمد انور:-
بصراحة انتا كلامك جميل جدا ومقنع جدا واشكرك على الردود الجميلة دى بصراحة انتا اعدت لى الأمل من جديد فى هيونداى فيرنا اشكرك كثيرا جدا جدا

نصيحة اخوية بلاش فيرنا و الكلام اللى عجبك و اعاد لك الامل فهو مردود عليه حيث قارن بين الفيرنا الموجودة برة بالفيرنا الموجودة فى مصر من تجميع غبور و هذه مقارنة غير سليمة طبعا لان الفيرنا المصرى داخل فيها نسبة خامات مصريه مع التجميع المصرى المعروف بردائته و علشان اقرب لك الصورة اكثر اننا لم نأخذ البلاستيك او الكاوتش نحلله فى معمل كمياء كما اعتقد الاخ Ahmed Anwerاللى رد على نصيحتى لك وسأوضح لك الامر الاكثر و ان الموضوع ليس له علاقة بتأجير السيارة من عدمه .
و كمثال بسيط يوجد اسفل الكنبة الخلفية ماكينة البنزين بها صوباعين بلاستيك تحللوا و تشققوا و تسببوا فى انتشار رائحة البنزين داخل السيارة و هذا حدث بعد فترة زمنية قصيرة جدا و داخل الضمان طبعا هذه العيب خطير جدا و ليس له علاقة بتأجير السيارة من عدمه بجانب و جود تشققات واضحة فى معظم الكاوتش بها و لا تحتاج خبير لاكتشافها و هذا بجانب ان تصميمها ليس جيد كما يعتقد البعض و اقسم بالله انى عندما ركبتها اول مرة من سنة انتقدت تصميمها و خاصة الارتفاعين الموجودين اعلى الفوانيس الامامية و كأن الشركة قد سمعت انتقادى هذا و بالفعل وجدتهم قاموا بتعديل الكبوت الامامى فى الفيرنا الجديدة و سبب مشاكل هذه السيارة شيئين هامين اعترف بهم الجميع و هما التجميع السيىء و دخول مكونات مصرية فى التصنيع غير مطابقة للخامات الاصلية بجانب ردائة التوكيل الم تقراء هنا قصة الاخ اللى ساحت الاطارات الامامية منه بعد شرائه السيارة مباشرة و ذهب للتوكيل و خرج من عندهم كما دخل .
على العموم انت حر اللهم بلغت اللهم فشهد .

**starpro** · 13-04-2008 10:04 AM

المشاركة الأصلية كتبت بواسطة mido128

استاذ احمد انور:-
بصراحة انتا كلامك جميل جدا ومقنع جدا واشكرك على الردود الجميلة دى بصراحة انتا اعدت لى الأمل من جديد فى هيونداى فيرنا اشكرك كثيرا جدا جدا

نصيحة الدايو لانوس احسن منها الف مرة و السعر متقارب و قطع غيرها ارخص و الميكانيكية اللى بيفهموا فيها كثيرين جدا و اللانوس سيارة ممتازة كتصميم و موتور ممتاز و اكثر انسابية فى الشكل من الفيرنا و شوفتها فى شوارع مريكا و دول الخليج و مازل عليها طلب كبير حتى بعد غلق مصنعها فى كوريا .

**mido128** · 13-04-2008 10:04 AM

عم القناص انتا كلامك جميل مع انى مقتنع بها لثمنها قولى ايه البديل

**mido128** · 13-04-2008 10:06 AM

شكرا Starpro القناص برده انتا ردت عليا قبل ما ابعتلك انا عاوز ايه الف الف شكر لك

**starpro** · 13-04-2008 10:10 AM

المشاركة الأصلية كتبت بواسطة mido128

عم القناص انتا كلامك جميل مع انى مقتنع بها لثمنها قولى ايه البديل

اللانوس سيارة مية مية و مش هتندم ابدا و عن تجربة شخصية لقد كانت معى قبل الماتريكس و كنت بطحنها و زى الفل عمرها ما خزلتنى ابدا . و مش عايز اقولك اننى متردد فى بيعها حتى الان لانى نفسى شالت من الماتريكس بسبب التوكيل السيىء بتاعها و احتمال ارجعلها تانى و ابيع الماتريكس و يمكن الناس اصحاب الماتريكس هنا يزعلوا منى بس بجد انا حاسس انى سايق ميكروباص و السيارة ثقيلة جدا على العموم احتمال اتعود عليها و انسى البهدلة اللى حصلتلها فى توكيل غبور .

**Ahmed Anwer** · 13-04-2008 11:25 AM

هوا طبعا من حق اي حد عنده جهاز كمبيوتر و بيخش علي الإنترنت ،،

يكتب اللي هوا عايزه ،،

بس يكتب اللي عايزه علي انه رأيه الشخصي مش حقائق علمية ،،،

بس سؤالين ،،

عايز اعرف ايه الفيرنا الجديدة دي ؟؟؟؟

و ممكن تفيدنا بعلمك ما هوا عيب التصميم في الإرتفاعين يمين و شمال الكبوت ؟؟

مهمه اوي نعرف من سيادتك ،، عيب التصميم يؤدي إلي ماذا ؟؟

الأخ السائل ،،

الفيرنا بعيوب تصنيعها أفضل من اللانوس ،،

و الله مش تعصب ،،،

بس نتيجة سؤال ناس كتير‘ شركات ايجار و مراكز خدمة ، و ناس من غبور نفسه ( قالولي صراحة

عربية زي الفل بس بيبقي فيها شوية حاجات بسيطة بتضبط في الضمان )

الدايو عفشة ضعيفة و دي كانت اهم نقطة عندي عشان طبيعة شغلي و محل عملي في حتت مدغدغة

سحب مفيش ، فتيس ناشف و بيعض ، ثبات ضايع ، استهلاك بنزين اعلي ،،

و كمان فيها احتمال مشاكل التجميع برده ،،

مع الفارق انها كارت محروق بالنسبة لابو الفتوح اللي خلاص مركز مع الإسبرانزا ،، غير غبور اللي

بيحاول يحسن نفسه مع الفرخة اللي بتبيضله ذهب

رغم عيوبه ،،

بس مش معني كده انها وحشة هيا كانت حلوة سنة 97 ،، و دي نقطة تانية مش هتحس انك راكب عربية جديدة ،، غير ان انتاجها هيتوقف

بالعكس من الفيرنا اللي فيها شئ من متعة القيادة ،،

بص باختصار لما حد بيسألني علي الفيرنا بقوله لو تعرف تزود شوية و تجيب حاجة تانية يبقي أحسن

( عشان احتمالات مشاكل التجميع )

متعرفش و مش هتقارنها غير مع اللانوس ،، لأ تبقي أفضل

**Nile_Storm** · 13-04-2008 03:05 PM

احمد انور الله ينور عليك

الفيرنا افضل من اللانوس بمراحل و دعني اسرد لك السبب

اولا الموتور تكنولوجيا احدث جدا من اللانوس و حصل علي عده جوائز وهو موتور الفا 2 اللي موجود فس سيارات الماتركس و الالنترا

ثانيا العزل افضل جدا

ثالثا حجم الشنطه

رابعا فرامل الفيرنا افضل كثيرا من اللانوس وقدرتها على المناورة جيده

صاج الفيرنا افضل ميه مره
و اخيرا بالعقل كده عربيه ايه دي اللي تقنيتها من عام 99 اللي احسن من عربيه تقنيتها 2004

اما موضوع الفبير معلش مش داخل دماغي - مع فائق احترامي لشخصك طبعا -
اخيرا لو العربيه وحشه مكنتش انتشرت كده
و مكنتش بقت التاكسي الاساسي في لمناطق السياحيه مظنش اني شفت لانوس تاكسي هناك خالص احتمال النوبيرا