محاوله ترتيب افكار حول الاستفتاء علي تعديل الدستور

انا في السطور دي بأحاول ارتب افكاري حول الموضوع ده لان الواحد مجربش الحيره دي من زمان و انا مش بأحاول اقنع حد انا بس باتكلم بصوت عالي مع نفسي

انا ملاحظ ان فيه محاولات تأثير باستخدام مؤثرات دينيه في الموضوع وده اسلوب مش تمام
الموضوع كله سياسي و سواء نعم او لا الاتنين نتيجتهم في الاخر واحده يبقي دخول الدين في الموضوع مش في مكانه بالمره
بمعني ان اللي بيقول ان لأ هتأدي لتغيير في الماده التانيه علشان كده احنا نعدل الدستور بس بدون المساس بيها طب ما احنا حتي لو قلنا نعم هنعمل دستور جديد بعد فتره يعني نفس الكلام
اللي بيقول المسيحيين هيصوتوا بلا طب و انا مالي كل واحد بيدور علي مصلحته ومش شرط مصلحتهم تتعارض معايا

الموضوع انا شايفه صراع مصالح مش اكتر بمعني

الاخوان و التيارات السلاميه الاخري تظن ان ليها الغلبه الحاليه في الشارع و بالتالي لو تمت انتخابات برلمانيه الان سيكون لهم نصيب الاسد منها سواء بالمقاعد المباشره او غير المباشره (محاوله استرضائهم من الفائزين من غير الايدلوجيين) او الاعضاء من غير الاسلاميين اللي هيعملوا معاهم تربيطات بوعود بالمسانده في الانتخابات و بكده هيكون ليهم التأثير علي شكل الدستور الجديد المقترح وغالبا هيتم الموافقه عليه في الاستفتاء بحكم طبيعه الشعب المصري وده الدستور اللي هتتحدد فيه شكل مصر في الخمسين سنه اللي جايه

التيارات الشبابيه و الاحزاب الجاده تظن ان عمل دستور الان سيكون له شرعيه ثوريه يعني الناس اللي رتبت و دعت للثوره هيكون ليها تمثيل قوي يعادل تأثير التيارات الاخري فالتالي الدستور هيكون متوازن بين الحريات و الالتزام اما موضوع انهم بيأجلوا علشان يجهزوا لانتخابات برلمانيه في خلال سنه ده مش سبب قوي لان التواجد في الشارع ونشر افكار جديده محتاج اكتر من كده

يعني الموضوع شكل الدستور الجديد مش البرلمان ولا الماده التانيه و الكلام ده هو صراع مصالح مش اكتر من كده


ولاني وعييت الدرس اللي عشنا فيه طول 60 سنه فاتت كان فيها تيار واحد هو اللي موجود علي الساحه
و لاني الحمد لله مسلم وسطي زي اغلب المصريين
ولان اهم فضائل الدين الاسلامي زي ما انا مقتنع عدم الحجر علي العقل خصوصا في موضوع زي ده
و لان من حق الناس اللي بدأت العمل العظيم ده انها تشارك في رسم المستقبل اللي بدأته


انا استخرت ربنا و هأصوت بلا علي التعديلات الدستوريه

فعلا انا معاك محدش هيقدر يجى جنب المادة الثانية من الدستور دى نفس القصه اللى كان مبارك بيخوفنا بيها .. يا انا يا الفوضى .. اهو مشى وكل حاجه بقت كويسه ومفيش حاجه حصلت والبلد اتحسنت ولسه هتتحسن اكتر بكتير .. احنا 96 % مسلمين!!!
غير كدة ان الموضوع سياسى معظمه سياسى
وسلطات الرئيس فى الدستور القديم لو قولنا نعم هتفضل زى مهيا واحنا اشعرفنا لو جه مش هيغير الدستور على مزاجه هوا ويرضى مجلس الشعب والشورى وان الاخوان هيستافدوا من نعم عشان مجلس الشعب وهما اللى هيقدروا لو ليهم الاغلبية فى المجلس انهم يقدروا يخلوا اللجنة التأسيسية فيها معظمها اخوان وفبالتالى ممكن يقدروا يوصلوا للحكم ونعم تخلى يبقى فى استقرار وامان شوية غير لأ وعشان ميكونش فى فراغ تشريعى وغير كدة احنا اشعرفنا ان لو قولنا لأ الجيش مش هيعلن الاحكام العرفية او بريق الكرسى ياخده ويفضلوا قاعدين ف الحكم كتير وده بيزود عدم الاستقرار شوية ولأ هيخلى الجيش يعين اعضاء اللجنة التأسيسية بنفسه فما بالك لو الشعب موافقش على الناس اللى فيه بس ميزتها انها هتقصر الوقت ان منعملش انتخابات برلمانية مرتين زى نعم ويبقى فى مصاريف كتير وغير كدة معظم الاحزاب غير مستعدية لمنافسة شريفة على مجلس الشعب
وفى الاخر هتلاقى ايجابيات وسلبيات لكل كلمة فيهم
وانا بقول لا مع التعديلات الدستورية

اتفق مع اغلب ما قلته حضرتك ... وسأصوت ب لا ايضا