السلام عليكم و رحمة الله و بركاته
أنا من الأول و أنا رايح اللجنة و أنا عارف أنه لازم فى مكان ما فى لجنة ما فى مدرسة ما فى البلد, هيحصل تجاوزات , مابين بسيطة و شديدة و ده طبيعى لأننا كشعب لسه بنتعلم ديمقراطية على أصولها و ماحدش بيتعلم من غير ما يغلط و الموضوع مش صفحة و هنقلبها, لأ, لازم هيكون فيه ناس متعصبين من الأخوان من باقى الأحزاب و لازم يكون هناك برضه بعض المحاولات المستميتة -من حلاوة الروح- من قبل الحزب الوطنى و الكلام ده كله متوقع و عارفينه و مش لازم نقف عنده.
المهم أن فى المستقبل, بيكون الوضع أحسن و منظم أكتر.
لكن اللى أنا شوفته النهاردة و أنا رايح أصوت فى المدرسة اللى فيها اللجنة فى المنصورة, كان الأداء بنسبة 95% مما يجب أن يكون عليه فى الدول المحترمة و ده لما يحصل أول مرة بالشكل ده, يبقى ممتاز جدا و ميه ميه و لا فراخ الجمعية.
اللى أنا خايف منه فعلا , أن الناس اللى هتكون النتيجة مش على مزاجهم, أنهم يحاولوا يعملوا أى حركة نص كم و لا كده و لا كده و ساعتها هتبقى فعلاااااااااااااااا حاجة تزعل.
ربنا يستر و الأمور تمشى أحسن مما كنا عايزين.
بس كان فيه كلمة بتزن فى دماغى و عاوز أقولها لحسن يجرالى حاجة, أن اللى باع صوته النهاردة ب 50 جنيه و لا بأى مبلغ -رغم أن ماعرفش حد عمل كده و طبعا المنتدى هنا كله ناس محترمين و مافيهوش حد عمل حده- يبقى زى اللى باع شرفه بالفلوس, دى زى دى بالظبط.