الموضوع: سؤال لكل اللى قالوا نعم (هو عدد الأقباط و العلمانيين قد إيه فى مصر نسبة للمسلمين؟؟؟؟)

الإخوة الأفاضل المحترمين أصحاب نعم عشان الحفاظ على الهوية الإسلامية و المادة التانية
سؤال صغير هو الدستور لما يتعدل دلوقتى أو يتعدل بعد سنة هل نسبة المسيحيين و العلمانيين هتتغير فى الوقت ده مقارنة بالمسلمين؟
أو عشان يبقى سؤالى أوضح شوية إيه اللى يمنع لما الدستور الجديد يتعدل و يبقى ما فيهوش المادة التانية حتى لو كان زى الفل ما فيهوش الهوا يعنى 210 مادة يخللوا الشعب يتنطط و المادة دى مش موجودة أو متغيرة إيه اللى هيمنع الأغلبية المسلمة إنها تعترض و تقول لأ؟
يا ريت بدل ما نقبل بلغط سياسى مهجن و مواد ضعيفة الصياغة و المعنى و المبدأ تودينا لنفق ضلمة ما نعرفش هنطلع منه على فين زى ما بتقولولنا ميدان التحرير موجود برده بنرد عليكم بضمانة أكبر صوتكم و صوتنا معاكم لسه برده موجود لو حد مس المادة التانية
أنا زهقت من اللعب على المشاعر بالدين و اللعب على العقول بالاستقرار و الأدهى اتهام كل اللى قال لا بإنه علمانى و مهدر دمه و لم يؤدى واجبه الشرعى و سيسأل أمام الله يوم القيامة عن صوته الذى أدلى به ليحكم المسيحيون و العلمانيون مصر و تندثر الهوية الإسلامية للبلاد و ما شابه من استعطاف الناس على حساب مشاعرهم الدينية
و أسئلة هسيبها للناس اللى عايزهم يعرفوا إن أساس الإسلام هم الحكام و ليس فقط المواد المكتوبة
و أهه الحجاج ابن يوسف الثقفى أحد أشهر الطغاة ما كان دستوره و هل كان ليردعه عن ظلمه
و ماذا عن الخليفة المأمون الذى اعتنق عقيدة فاسدة و هى خلق القرآن بل و عذب الأئمة الأربعة على قولهم الحق فى هذه القضية.
بلاش الماضى و خلينا فى الحاضر ...........................
حد يرد عليا احنا الفترة اللى فاتت دى كلها و المادة موجودة حد كان بياخد بيها و بيرجع لها فى إصدار الدستور أو القانون؟ كل العرى و الأفلام الساقطة و الغناء السافل و التعذيب فى السجون و الفساد القائم و الرشاوى و النقابات الفنية و الرقابة على المصنفات الفنية و منها بدل الرقص. إمتى وجود المادة التانية اتصدى للظواهر دى. طبعا أنا مش بتهم المادة التانية إنها ورا الأحداث اللى ذكرتها و لا حتى إن وجودها زى عدمه عشان ماحدش يتهمنى بحاجة بس أنا بقول إن الحاكم الصالح هو اللى بيطبق عدل ربنا سبحانه و تعالى مش الدستور و اتفرجوا على السعودية و على قسم الملك السعودى و اسألوا الناس هناك بصرف النظر عن الرفاهية المادية عايشين إزاى و اسألوا شارع الهرم عن السعوديين اللى بيتدلعوا فى بلدنا و اسألوا السعوديين نفسهم بيعاملوا المصريين فى السعودية إزاى و وايه أخبار فيلم كيف الحال و أخبار الشباب السعودى اللى بيعلن للخمور على الفضائيات
و افتكروا مقولة الإمام محمد عبده الشهيرة (فى الغرب وجدت مسلمين ولم أجد إسلاما، وفي الشرق وجدت إسلاما ولم أجد مسلمين) برده يا ريت ماحدش يفتى و يقول إنى عايز أبقى زى أوروبا حضارة بدون دين ده الناس كلها بره دلوقتى بتدرس الاقتصاد الإسلامى عشان فشل النظم الاقتصادية القائمة زى الرأسمالية و الاشتراكية.
أنا مسلم فخور بإسلامى و أحمد الله سبحانه و تعالى على نعمة الإسلام و قد صوت النهارده بلا من أجل الحرية و الديموقراطية و ليس من أجل طمس هوية الدولة الإسلامية و أقسم بالله أنى لن أصوت لدستور ألغيت منه المادة الثانية حتى لو كنت موافق و مقتنع بنسبة مليون بالمائة بكل المواد الأخرى التى يضمها هذا الدستور
موقفى ده يخلينى علمانى و ملحد ومرتد و لا يخلينى باخد بنصيحة السلف الصالح و الصحابة و الرسول عليه الصلاة و السلام عندما طلب إلينا أن نسعى فى تحصيل العلم و لم يحدد نوع العلم فى الحديث الشريف مما يعنى أنه لا يقصد العلوم الدينية فقط لا غير و أيضا سيدنا عمر بن الخطاب رضى الله عنه عندما خاطب رجل وهب حياته للعبادة فى المسجد و قال له أن أخوه أفضل منه عندما علم أن أخوه هو من يصرف عليه و ذلك لأنه يعمل و يعبد الله و يعيل نفسه فى وقت واحد

المشاركة الأصلية كتبت بواسطة Moh.Abdelbaset

أنا قولت نعم على التعديلات مش علشان المادة الثانية

وأنا ايضا