الموضوع: من الاخر علشان انا زهقت

هو الموضوع بقى زي و زيهم, و اللي مع واللي ضد..!!!!!!!!!!!

انا واحد من الناس نزلت قلت بوضوح (( لااااااااااااااااااااااا )) للتعديلات الدستوريه

لا دي لاسباب من هنا لبكره الصبح... ولا سبب فيهم ليه علاقه بالفزاعه الجديده
بتاعة الماده التانيه من الدستور و ده لسبب واحد و واضح بالنسبه ليا جداااا

(( لا مساااااااااااااس بالماده الثانيه من الدستور بأي شكل و تحت أي ظرف مهما كان ))

الماده التانيه من الدستور خط احمر, و فوق اي تعديلات دستوريه او دستور جديد

اللي بيقول ان اللي قال (لأ) ده علماني, انا ممكن اسمعه كلام اعرفه انه لا يفقه شئ

الاخوان لهم ما لهم و عليهم ما عليهم, لكن غلطوا في امر الناس بالتصويت بنعم

و البابا و القساوسه لهم ما لهم و عليهم ما عليهم غلطوا في امر الاقباط بالتصويت بلا

معترض على بدايتك للموضوع, لان في بعض الحاجات اللي انت قلت ده
كلام (اهبل) على حد تعبيرك حصلت فعلاً... لو ماتعرفش, الافضل ماتقولش...

باقي الكلام او المضمون متفق معاك فيه اكيد, لان مش كل واحد بذقن
او لابس على السنه, او بينصح الناس بالمعروف او بيقول قال الله او رسوله الكريم
يبقى ارهابي, او خطر على البلد, او هيقلب البلد افغانستان زي ما بيقال

عموما اللي بيعمل خير, بيعمله لوجه الله, و لنفسه, مش علشان الناس تشوفه بيعمله

ربنا يعدي الايام دي على خير... و عموماً انا متوقع ان رأي الأغلبيه هيكون (نعم)

و الله اعلم

المشاركة الأصلية كتبت بواسطة zago

يا جماعه مش موضوع نعم و لأ

واحد شايف ان التعديل وان الرئاسه فترتين مش عاجبه وراح قال لأ هو حر
واحد عايز الطواريء ومش عايزهم يشيلوها ( مزاجه كده ) يروح يقول لا وهو حر برضو

انا بتكلم في موضوع مهاجمه المسلمين للمسلمين وده لا يصح
بتكلم في الناس اللي بتتبرا من الاخوان وتقولك انا لا مسلم ولا سلفي ولا ملتحي ولا أخوان .....ومادام انت مش كده جاي تتكلم ليه وتقول عليهم وحشيين ؟؟؟؟

على فكرة حضرتك ...أنا قولت لا..ومش عاوز قانون الطوارئ(أنا ملاحظ من كلام حضرك تهكم على الطرف الاخر ) عموما دى وجهة نظر حضرتك ..وتحترم بس أرجوك بلاش تتهكم على الرأى الاخر لان كده اتعقد ان نتايجه مش هتبقى فى صالح أحد

حضرتك بتدافع بحمية جدا عن جماعة الاخوان الملسمين وده برضه شئ خاص بحضرتك ...بس معتقدش ان حد بيقول على نفسه انه مش مسلم ..واى حد من حقه انه يعبر عن رأيه وعن انتمائه السياسى..واذا كان غير منتمى لاى تيار سياسى من حقه يقول ده ...اللى بينفى انتمائه لجماعة الاخوان المسلمين والجماعات السلفية ( الجهاد - الجماعة الاسلامية وغيرهم) ميقللش ابدا من تدينه



أرجو ان تتقبل مشاركتى بصدر رحب

السلام عليكم ورحمة الله وبركاته

ردا على بعض الإخوة الكرام

1- احنا كمسلمين لا نقدس شيخ الأزهر أو غيره ولو السيد الإمام الأكبر - مع إحترامنا له - قال فتوى دينية أو رأي سياسي فهذه الفتوى وهذا الرأي غير ملزم لأحد من المسلمين وكل يؤخذ منه ويرد إلا كتاب الله وكلام نبية صلوات الله وسلامه عليه

ثانيا شيخ الأزهر تم تعيينه من قبل النظام وكذلك جميع الهيئات الإسلامية ولذلك فهم عمليا لا يستطيعون نقد النظام خصوصا لأن النظام اختارهم بعد تدقيق ولذلك فغالبية المسلمين لا يثقون في مواقفهم ولذلك فعلماء المسلمين المستقلين هم أهل ثقتهم
وهذا طبعا شئ مؤسف

لنكن واثقين تماما أنه لو كان شيخ الأزهر بالإنتخاب ولو كان مستقل حقيقيا فإن مواقفه ستكون مستقلة وحقيقية وصحيحة ورغم ذلك لن يلزم المسلمين برأيه وكأنه شئ مقدس

أما بالنسبة للبابا فهو منتخب ومستقل بحكم القانون فما الذي يدفعه أن يفتي مرة بصحة المظاهرات ومرة أخرى بحرمة المظاهرات لأي سبب ( لم يقل ساعتها إن التظاهر ضد مبارك حرام ولكنه حرمه إجمالا بحجة أن الكتاب المقدس يحرم ذلك ) ثم بعد ذلك أحلوه

أنا أعتقد أنه لو كان شيخ المشايخ أخذ هذه المواقف المتناقضة والمخذلة فإن المسلمين لم يكونوا ليثقوا فيه مرة أخرى


2- الاخوة الكرام اللي بيقولوا ما نهاجمش إخوانا المسيحيين

طب ليه هم عمال على بطال بيهاجموا الإخوان المسلمين

ليه شغالين أربعة وعشرين ساعة علماؤهم بيتدخلوا في السياسة وفي نفس الوقت يطالبوا الإخوان بعدم التدخل في السياسة

ليه مواقعهم على النت والقنوات المسيحية عمالة تطلع فيديوهات كاذبة تحاول بيها التشويش والتخوين وإهانة الإخوان وغيرهم

ما كفاهمش ما تعرض له التيار الإسلامي من النظام السابق من ظلم لمئات الآلاف منهم وكثيرا تم ظلمه بتهمة إضطهاد المسيحيين وهو ما لم يحدث

ما كفاهمش ما تم من ظلم للمسلمين بتهمة قتل المسيحيين في كنيسة القديسين
دي كلها مش مبررات إنهم يتأنوا شوية في توجيه التهم للإخوان وغيرهم


أنا عايز أعرف هو إخوانا المسيحيين محصنين ضد النقد ولا إيه الحكاية

طالما هنراجع مواقف يبقى نراجع مواقف الكل علشان كل واحد وكل جماعة وكل فئة تعرف أخطاءها مش يبقى كل واحد ماشي في وادي والتاني في وادي

أنا لا أطالب أحد بالتوقف عن نقض الإخوان لكن لازم كل واحد لما يوجه نقد يكون نقد بناء

اللي عنده نصيحة للإخوان أو غيرهم ينصحهم مش يحاول هدمهم أو التخلص منهم بشكل أو بآخر

ليه ما نستفيدش من قوة بعض وإمكانيات بعض
ليه ما نستفيدش من الإخوان
ليه ما نستفيدش من المسيحيين


أقسم بالله العظيم أنه لو واحد مسيحي ولا علماني ولا حتى ملحد اترشح في إنتخابات أو غيره وشفت إنه أصلح لهأنتخبه حتى لو كان اللى قدامه إخوان أو غيره

أنا بأتمنى وبأناااااااااااااشد إخواتنا المسيحيين إنهم يبطلوا ياخدوا تعليمات سياسية من الكنيسه وإنهم يحرروا نفسهم شوية من تدخل الدين في السياسة كما يطالبون هم الآخر

يعني المطلوب من كل مسيحي أو مسلم طبعا - إنه لو اترشح واحد في أي مجال إنه ما يتوقفش كتير قدام دينه ومذهبه ويبص أكتر للشخص ده هل هو نزيه هل برنامجه إصلاحي حقيقي هل هو كفؤ للمنصب اللي بيسعى إليه


يا جماعة ده لمجرد إن واحد من الإخوان تم اختياره ضمن لجنة الدستور لقينا حزب الوفد وأغلب القنوات وطبعا غاااااااااالبية المتحدثين المسيحيين بيشككوا في اللجنة وبيتخوفوا من نتائجها
كل ده لمجرد إنه من ضمنهم واحد من الإخوان
رغم إنه كان فيهم واحد من الوفد

أنا عايز أعرف هو عضو الإخوان هيسحرلهم ولا هيمسكلهم عصاية يقولهم لو ما عملتوش كذا هأعبطكم
ولا مثلا هم ناس صغيرين وممكن ينضحك عليهم
ولا مثلا القرار النهائي هيكون في إيده

إيه الموضوع يا عم
هي البلد ما فيش فيها غير الكوادر الإخوانية

لو كده يبقى خلاص بقى هم المفروض يتولوا كل المناصب طالما بقية الشعب تنابلة

يا إخوانا أنا ممكن في يومين أجمع لحضراتكم أسماء ألفين أو ثلاثة آلاف زعيم سياسي نزيه ومحترم ومقبول وعنده فكر إصلاحي وقدرة على التغيير وكاريزما وكل المواصفات اللي نحتاجها في عضو مجلس الشعب وكمان مش من الإخوان أو من السلفيين ويمكن مش مسلم نهائي

يعني الأحزاب والتجمعات المختلفة مش هيقدروا يقدموا كام ألف مرشح في ثلاثين محافظة وستمائة دائرة إنتخابية
دي تبقى خيبه مالهاش حل

الكوادر المصرية خلاص خلصت وما بقاش غير المنتمين للإخوان

افترضوا جميعا من الآخر إن الإخوان هيترشحوا في كل الدوائر
هل ده يعني إن الشعب كله هيختارهم


3- الحاجة الثالثة

أنا مؤيد جدا للإخوان وأقولها بملئ فيي
وأقول لحضراتكم لو حتى واحد في المائة من الشعب فقط عايز يغير المادة التانية من الدستور ولو حتى عايز يعلن مصر دولة مسيحية يتفضل ويدعو إلى ذلك ويا ريت كمان يعملوا استفتاء على هذه المادة ونشوف رأي أغلبية الشعب إيه

ويا ريت كمان يتم الإستفتاء على بدء التطبيق الفوري التدريجي للشريعة الإسلامية ونشوف رأي الأغلبية إيه

وكل واحد حر فيما يدعو وفيما يختار
وأنا أتعهدلكم بأن جميع الإخوان وغالبية السلفيين هينصاعوا لرأي الأغلبية ولن يخرج منهم أحد يتظاهر في الشارع أو يوقف حركة الناس أمام ماسبيروا حتى لو تم إختيار الدين اليهودي أو حتى الوثنيه هي الديانة الأولى لمصر

بس يا ريت باقي الشعب يحترم بقى رأي ما يختاره الناس

يا ريت إخواتنا المسيحيين يعملوا حزب سياسي زي الحزب الديمقراطي المسيحي بتاع ألمانيا ويقدمولنا كوادر وخدمات زي اللي بيقدمها الحزب الألماني وأنا هأكون اول مسلم ينتمي إليه

يا ريت يقدموا ناس مسيحيين للمجالس المحلية والنيابية وكمان لرئاسة الجمهورية ولو فازوا يبقى فعلا هم أفضل من يستطيع أن يرتقي بالمنصب

كل مسلم وكل مسيحي عليه بتقديم تضحيات وخدمات للناس ويحاول يحصل على رضاهم وعلى ثقتهم ( ثقتهم ) واللي يرضى عنه الناس ويحبوه هيختاروه
النفس البشرية جبلت على حب من أحسن إليها وخصوصا لما ما يكونش فيه نظام بيشوه صورته بطريقة منهجيه


يا جماعة كفانا تقديس للشيخ الفلاني وللقس العلاني

اللي يكدب ما حدش يدافع عنه

اللي يغش واللي يظلم الطرف الآخر بعلم أو بجهل يبقى كفاية عليه كده وشكرا



4- رابعا

أنا رأيي وبكل وضوووووووووووح
إن أي واحد شارك في النظام السابق سواء كعضو فيه أو متعاون معه ضد الشعب أو ضعف قدامه ورضخ له أو انكسر تحت ضغوطه او أو أو أو
هذا الشخص لو لم يتم إعدامه جسديا لجرائم قتل ارتكبها
وحتى لو لم يتم إعدامه معنويا لجرائم معنوية وتضليل ارتكبه
حتى وإن رأى البعض أن يستمر في منصبه

لكن في إعتقادي أنه من الغباء الوثوق فيه مرة أخرى
من الغباء إختياره مرة أخرى وإعادة تجربته لأن المثل الشامي يقول ( اللي يجرب المتجرب مخه مخرب ) والرسول الكريم يقول ( لا يلدغ المؤمن من جحر مرتين )
من الغباء السماح له بتصدر المشهد مرة أخرى

اللي أثبت كفائته في الثورة
اللي ضحى فيها
اللي أبدى من الشجاعة والمروءة والوفاء للشعب واللي لم يضعف ولم يرضخ ولم ينهزم ولم يبع القضية لأي سبب واللي تلقى الرصاص الماطي والحي بصدرة ووجهه ووقف موقف رجاله ( سواء رجل أو إمرأة )
هذا هو من يجب أن يحوز على ثقتنا وهذا من يجب علينا أن نقدمه لو لم يقدم هو نفسه


لازم نعرف إننا لو أخطأنا سواء عن جهل أو علم سواء عن حسن نية أو عبط وقمنا بتقديم أشخاص سيئين نبقى بنظلم أجيالا كاااااااااااااملة حاليا ومستقبلا
والفرص مش بتتكرر كتير فياااااااااااااااااااريت كفانا عاطفية وهوان وما حدش يزعل مني

وأنا بأقول الكلام ده على أي شخص بغض النظر عن دينه وفكره




5- أخيرا وأنا طولت عليكم

يا ريت الإدارة تعمل موضوع عن الأشخاص - من غير الإخوان والسلفيين - اللي فعلا يستطيعوا أن يكونوا خير من يمثلنا في البرلمان

وأنا سأذكر لحضراتكم أول عشرين إسما

1- جورج اسحق
2- أسماء عبد الفتاح
3- نوارة نجم
4- وائل غنيم
5- صفوت حجازي
6- عمرو خالد
7- جورج اسكندر
8- عبد الرحمن يوسف القرضاوي
9- وائل الإبراشي
10- البرادعي
11- كمال الجنزوري
12- نادية مكرم عبيد
13- جودت الملط
14- محمد عمارة
15- خالد الصاوي
16- محمد سليم العوا
17- محمد رفاعة الطهطاوي
18- السفير يسري ....
19- نهى الزيني - المستشارة
20- أحمد مكي - المستشار

وكل واحد يقولنا مين كمان

وتحياتي للجمييييييييييييع