ناوى بإذن ربنا أشتري ساجا اوتوماتيك ومحتاج مساعدة منكم ياجماعة
أولا مساء الخير علي جميع ملاك بروتون المحترمين .. ثانيا انا عضو جديد فى المنتدي وباتعلم السواقة و الحمدلله فيه تقدم .. بس من كام يوم سألت نفسى طب علي ايه وجع القلب ومانيوال وغيارات مالواحد يجيب اتوماتيك و يلخص .. المهم انى كنت متحمس جدا للرينو لوجان بس لما فكرت فى اوتوماتيك لقيت ان الساجا تغلب بس محتاج اجابه لبعض الأسئلة من حضراتكم لأنى باتمنى أنضم ليكم وأبقى عضو فعال فى المنتدي :
1 - ايه هى عيوب الأوتوماتيك مقارنة بالمانيوال وليه الناس بتفضل المانيوال مع انه كله تعب
2 - ايه ترتيب الغيارات علي فتيس الساجا الأوتوماتيك بالحروف وامتي نستخدم كل غيار
3 - إيه ظروف التوكيل وخدمات ما بعد البيع .. يعنى هل التوكيل متعاون وقلبه علي العميل ولا أي كلام
4 - لو حبيت أشتري العربية ايه احسن مكان اشتري منه؟ انا بافكر ف أباظة أوتوتريد فرع قنا لأنى عايش فى سوهاج وده اقرب موزع ليا واسمع انه محترم .. هل فيه حد عنده اقتراح احسن ؟
أعتذر للإطالة ياجماعه بس العربية عاجبانى و نفسى حد يطمنى عشان اتشجع واجيبها ومتشكر لسعه صدوركم