الموضوع: مواقف وطرائف ...فى بلاد الغربة

عمري ما سافرت في حتة و لا رجلي عتبت بره مصر.. بس متابعة الموضوع بشغف :)

من حوالي ثماني سنوات عندما وصلت الى امريكا
اول مره استخدم Atm الصراف الالي في الايداع ما كنتش عارف ان الواحد لازم يحط الفلوس في الظرف رحت حاطط اول دولار ورق راحت المكنه واخداه وقفلت على كده وطبعا راحت مزوده الحساب 250 دولار اللي كنت ناوي اودعهم
ثاني يوم رحت للفرع اللى فتحت فيه حسابى (لسه مافوقتش من بنك القاهره سيزوستريس) بقول مدير الفرع على اللي حصل مات على نفسه من الضحك واتصل بالفرع اللى انا حطيت الفلوس في المكنه
لقاهم كلهم بيضحكوا على اللى حاطلهم دولار ورق
ذكريات
معلومه دلوقت في مكن كتير لا يستخدم الظرف للايداع المكنه فيها قارئ الى يتعرف على الشيكات و العملات

انا عايش في فرنسا فا من حولي 10 سنوات كان فيه اتنين مصريين اشتروا خروف علشان العيد الكبير
وماكنش عندهم عربيه واللغه والثقافة علي قدهم خالص ففكروا يركبوا الخروف الاوتوبيس
فاول ما السائق شافهم قام واقف وقلهم نو نو نو (non Non ) ونزلهم فا قالولو راسيست بور كوا
ماء ماء (non) و هوهو (oui)
بمعني ان انت عنصري ليه الخروف (ماء ماء)لا والكلب (هو هو ) بتسمحوا له
دا الي انا فاكره دلوقتى وفي حاجات تانية لو افتكرتها ها احكيها بعدين

لما كنت فى السودان و كنت بأشترى عيش فينو كنت انا وواحد زميلى لاقيت واحد سودانى جاى علينا و بيزعق انتو يا مصريين انا قلت اهلا بالمشاكل و لسه مش اتكلمت طبعا لاقيته بيقول قولو للملك فاروق يرجع لى ارضى طبعا فهمت على لطول انه مجنون و بيقول قولو للمك فاروق يرجع لى ارضى ارض السوق العربى دى بتاعتى ( ده سوق كبير فى الخرطوم) اللى استغربت منه منين هو مجنون و منين عرف اننا مصريين . طبع سبته و مشيت بدون اى تعليق

موقف مش مضحك اوي
كنت فجدة فشغل لفترة هناك حوالي شهر وهناك ممكن تركب سيارات اجرة (ليموزين) او تركب مع ناس من جدة بيشغلوا عربياتهم فالتوصيل, ففيوم كنت في وقت صلاة ومش لاقي ليموزنات خالص قلت اجرب العربيات ديه فوقفلي واحد واتفقت معاه على المكان والسعر بس واحنا فالسكة الراجل كانت بيسئل اسئلة غربية من نوع انته متجوز ولا لأ وعايش لوحدك وحبت حجات. انا مش مدي خوانه خالص لأنه بدوي ودقنه مش عاوز اقولك ربع متر!!!! بس واتضحلي انته تبع عمارة يعقوبيان رحت شاخط فيه واركن يا ابن كذا كذا وشديت الدركسيون لحد ما وقف..

ومن سعتها وانا مبركبش غير ليموزنات :)

ياااه كتير أوي :)

أوساكا اليابان ٢٠٠١

أول ما رحت اليابان ابتديت أخد كورسات لغة ياباني قبل ما أتلقي برنامج التدريب ....قعدت أول إسبوعين تلاتة اسحب في هدومي من الشنطة لحد ما خلصوا كلهم و كان لازم أغسلهم .....كان عمري ما غسلت هدوم بنفسي أصلا قبل كدة ....اكتشفت إن المكان اللي كنت قاعد فيه كان فيه غسالات بتشتغل بقطع فلوس معدنية بس لازم تجيب مسحوق غسيل.... ما علينا رحت لسوبر ماركت قريب و حاولت أدور على مسحوق غسيل.... كل حاجة مكتوبة بالياباني إلي هو شبة الصيني.... طلاسم ...
بالفهلوة المصري ابتديت أدور على رسمة اريال و لا برسيل بس طبعا في الضياع
ما كنش في حل غير أني أسأل الناس إلي حواليا بلغة يابانية ركيكة (اليابانيين ضايعين في الانجليزي) بس طبعا محدش فهمني ....في الاخر فتاه يابانية صعبت عليها و وقفت لحد ما قعدت اشرح لها بالانجليزي و الياباني و أهم منهم لغة الاشارة أنا عايز إيه لحد ما فهمت

برلين ألمانيا أول ٢٠٠٢

في عز هوجة هجمات سبتمبر ماشيين ٥ مصريين في الشارع ٣ رجاله ملامحهم شرق أوسطية و سيدتين منهم واحدة محجبة و هوب لقيت عربية مايباخ ركنة في الشارع على الرصيف المقابل ...طبعا العبد لله أصر إن احنا نعدي عشان نتفرج ....قعدنا بتاع ٥ دقايق نلف حولين العربية و نبص على كل حتة فيها و فجأه اكتشفنا إن فيه يا عيني سيدة عجوز شقراء قربت تموت من الخوف جوا العربية من منظرنا و احنا بنحوم حولين العربية :o


باريس فرنسا ٢٠٠٣

بتعشي مع المدام في مطعم جنب الأوبرا ...الفرنساوي بتاعي ضعيف شوية.... جاه الجرسون و قعد يرطن مش فاهم منه حاجة باقوله parlez anglais قالي بتحكي عربي.......

تورنتو كندا ٢٠٠٥

أول ما جيت كندا عايز اركب تليفون في البيت ....قعدت أسأل عن شركة التليفونات فين و الناس بتبصلي باستغراب شديد ...المهم لاقتها و رحت و طلعت الاسانسير و دخلت أسأل عن مكان التعاقد .....واحده موظفة بصتلي كأني من أهل الكهف قلتلي مش محتاج غير تكلم مركز العملاء من أي تلفون عمومي و تشتري عدة و يبقى عندك خط تليفون في بيتك خلال يومين ...و قد كان ......العلم نورن

بس واتضحلي انته تبع عمارة يعقوبيان

..ههههههه..هو كان فاكرك عبد ربه...كنت تقطعه يا معلم ..على فكره الموضوع ده انتشر ..ربنا يستر

..mokhtar..