3 تكييفات وعداد

**mesaharaty** · 22-03-2011 10:14 AM

سؤال فنى جدا للإخوة فى المنتدى وعاوز إجابات تفصيلية شوية من فضلكم :

عندى شقة وكنت شاريها متوضبة شوية بس مافيش تكييفات وكنت عاوز أركب 3 تكييفات فى الغرف بس المشكلة بقى إن عداد الكهرباء من النوع الصغير العادى وعلى ما أعتقد كده إنه مش حينفع أركب ولا حتى جهاز واحد لأنى حاسس إن التجهيزات ضعيفة .
فيه ناس قالولى بتروح الكهربا تقدم على عداد جديد أكبر وبيعملوا لك مقايسة جديدة وبعدين تبقى تشد سلك مخصوص للتكييفات داخل الحوائط مع مفاتيح بتشينو .
طيب لغاية كده كلام سليم
المشكلة إن إيصال الكهرباء مش بإسمى ولكن بإسم الشخص اللى اشتريت منه الشقة فهل سيتم عمل عداد جديد بنفس الإسم ولا بإسمى ولا العملية مرفوضة من أساسها ، وكم تتكلف عملية نقل العداد؟
هل هيحصل تكسير كتير فى الحوائط بمعنى هل سأحتاج إلى بياض الشقة مرة تانية .
ما هى أسعار المواد المستخدمة فى هذه العملية (أسلاك - مفاتيح - مصنعيات )
أثقلت عليكم فى الأسئلة لكن كعهدى بكل أصدقائى فى نايل موتورز مش حيسيبونى لوحدى وحيساعدونى بالأفكار الجميلة والنصائح

مع ألف شكر

**احمد المصرى** · 22-03-2011 11:10 AM

موضوع نقل العداد مش هتتكلف غير 50 جنيه كنقل الاسم وبيقعد حوالى سنه او اكتر عقبال لما يتغير فى الوصل نفسه بس ممكن تقدم على اى حاجه بصوره تحويل الكهرباء انا عملت كدا فى الغاز قدمت وصل النور ال هو مش باسمى وقدمت وصل انه اتحول باسمى يعنى العداد يعتبر باسمى

وتغيير العداد على ما اعتقد مش هيتكلف كتير بس اوع تجيب عداد تيجيتال خليك فى العادى احسن كتير

بالنسبه للوصلات اعتقد انك هتاخد من اقرب بواط بجوار مكان تركيب التكييف وقدامك حلين يا ام تعمله فى الحائط وتبيض تانى يا اما تمشى السلك على الحائط من بره والاختيار ليك

بس انصحك بتكييف اسبليت مش شباك علشان هدوء الصوت