باركولي يا وحوش... اشتريت لوجان 2011 ومندمتش
اعزائي واحبائي اعضاء المنتدى ...
دي أول مشاركة ليه في المنتدى ... بس طبعاً انا متابع المنتدى من عدة شهور ...
عموماً ألف شكر ليكم جميعاً لأن مناقشاتكم في المنتدى كانت هي السبب الرئيسي في شرائي لوجان والحمد لله انا مندمتش لأن العربية ممتازة وتستاهل اللي دفعته فيها
وطبعاً شكر خاص لتقرير نادر نبيل المفصل والكافي والوافي ... اللي خلاني احس اني راكب العربية من سنين ... واسمحولي اوضح بعض النقاط في تجربتي الأولى مع السيارة.
أولاً: انا كنت محتار جداً بين لوجان ولانوس خصوصا مسألة قطع الغيار والتوكيل ولكن في النهاية حسمت أمري لصالح اللوجان لأن العربية فعلاً مغرية جداً وأفضل من اللانوس من ناحية القوة والارتفاع والتقفيل والخامات والمساحة الداخلية وأتمنى ان التوكيل يحل مشكلة قطع الغيار لأن ده بالطبع هو اللي هايعملها سوق وبالتالي هاتكتسح كل العربيات اللي في الفئة السعرية دي (مع تحفظي على رفع سعر السيارة لـ 71000 جنيه بعد الثورة الأمر اللي مش قادر افهمه لحد الوقتي خصوصاً إن الدولار ما ارتفعش بالنسبة الكبيرة دي)
ثانياً: بالنسبة للميزات السيارة مرتفعة عن الأرض (ده شيء مهم جداً بالنسبالي) ـ خامات التقفيل ممتازة بالنسبة لمثيلاتها ـ المساحة الداخلية رائعة جداً ـ ارتفاع السقف ـ قوية ـ العفشه كويسه.
ثالثاً: بالنسبة للعيوب الفنية فهي نفسها اللي ناقشتوها في المنتدى .. رعشة دواسة البنزين ـ صوت المحرك مرتفع ـ الكلاكس صوته عالي ـ أماكن الزجاج الكهربائي فعلاً مش عمليه ـ سخونة زائدة في بعض الأماكن الداخلية وسخونة في المحرك ـ كمبيوتر السيارة بياناته غريبة جدا (مثلاً معدل الاستهلاك 35 لتر لكل 100 كيلو وانا مش فاهم حسبها ازاي )
رابعاً: أنا كنت بشتري العربية في البداية من بنك ناصر ـ فرع دمياط فايدته قليلة 6% ومفيش تأمين وبالتالي بتفرق كتير قوي في سعر العربية ـ بالإضافة إن عقده اسلامي ... بس للأسف البنك بيطلب ضمانات كتيره ـ والموظفين متعاونين بس عندهم شغل كتير وصعب قوي يقدمولك الخدمة السهلة اللي موجوده في البنوك التجارية ولقيت نفسي هادخل في مووايل واجراءات معقده فسحبت المقدم واستعوضت ربنا في فلوس الاستعلام وفتح الحساب على العموم أنا اشتريت من البنك الوطني للتنمية ـ فرع دمياط والمعاملة كانت ممتازة والاجراءات بسيطة ودفعت مقدم كويس وبالتالي الفايدة قلت جداً .
خامساً: عندي بعض الاستفسارات أرجو من اخوتي وأعزائي وحوش اللوجان افادتي بشأنها
ـ كاوتش العربية صناعة روماني ماركة اسمها باروم يا ترى اخباره ايه كويس ولا اغيره.
ـ ملحقات العربية ايه بالضبط (انا استلمت كوريك بدون صليبة واريال واربع طاسات للعجل) فكده تمام ولا ناقص حاجه تانية.
ـ استهلاك البنزين عالي فعلاً (انا مونت 20 لتر عملوا 3 خطوط في العداد راح منهم خط بعد 40 كيلو داخل المدينة وقراءة الكمبيوتر بتقول ان استهلاك البنزين 35 لتر لكل 100 كيلو !!!! ) ارجو الإفادة للضرورة ارجوكم لأن الموضوع ده لو صحيح هاتبقى مشكلة طبعاً .
في النهاية بكرر شكري للجميع ... ولو حد بيقرا المشاركة دي وعاوز يشتري بقوله اتوكل على الله واشتري فوراً العربية ما شاء الله ممتازة .. وربنا يهدي الوكيل
أخوكم / فارس العطار ـ دمياط
