سؤال للى غير طرمبة البنزين قبل كده
السلام عليكم
معايا عربية جيتز
العربية وانا ماشي بتنتش نتشة كده على السريع وتكمل عادي . وبعدين من حوالى اسبوعين كده وانا ماشي بيها بطلت خالص وركنت على جنب وحاولت ادور العربية مش عايزة تدور كأنها قاطعه بنزين . 10 دقايق كده من المحاولات وبعدين بتدور وبتمشي عادي جدا .
وبعدين عملت نفس الحركة من اربع ايام كده والمرة دي طولت اكتر على ما درات . وبعد مامشيت بيها فضلت تنتش كده برضه وانا على الرابع لكن مشيت بعد كده عادي .
روحت مركز الخدمة والعربية اتحطت على الجهاز وماطلعش اي مشكلة . وقالولي انها احتمال كبير تكون طرمبة البنزين ووصلوا الطرمبة بجهاز الضغط بس طبعا العربية كانت مظبوطة فالقياس طلع مظبوط برضه .
العربية بتدور الصبح عادي جدا ومافيش اي مشكلة والبوجيهات جديدة والسلوك كويسة ومغير الزيت والفلتر بتاع البنزين متغير من حوالى شهر وكله تمام .
المشكلة اني مش عايز اغير الطرمبة ويطلع العيب مش من الطرمبة خصوصا انها بـ 900 جنيه .
ياريت لو حد حصل معاه نفس الاعراض دي يقولي كان حلها ايه او لو حد غير طرمبة البنزين يقولي كان بيحصل ايه او لو حد يفسر لي اللى بيحصل ده من ايه اكون شاكر ليه جدا لان الموضوع ده قالقني خصوصا اني معظم مشاويري على الطريق الدائري وبيكون معايا مراتي والوضع الايام دي مش مستحمل العربية تقف بينا على الدائري خالص .