الموضوع: محتاج رد ضرورى

المشكله الى عندك مش نفس المشكله الى عنده, هو عنده تكتكه (هتكون نتيجة حاجه بتخبط فى حاجه تانيه) و انت عندك صفاره (نتيجة حاجه بتحك فى حاجه تانيه)
و فى نفس الوقت لو مشكلة فتيس او دبرياج الصوت هيكون واضح

الفرش عباره من شوكه بدراعين اتنين بيزقوا بليه الدرياج و له اشكال و تصميمات كتيره و لازم يكون متثبت على اكس من احد جوانبه علشان الفرش يتحرك عليه, و يكون فيه ميكانزم لتحريك الفرش سواء بسلك او هيدرولك

طيب عايزين نتفق عل شوية حاجات
حركة الفرش للامام و الخلف مش حركه دائريه
الاسطوانه بتكون معشقه فى الاكس بتاع الفتيس عن طريق سنون يعنى الاتنين بيتحركوا حركه دائريه مع بعض
الدسك بيكون مربوط فى الحدافه يعنى الاتنين بيتحركوا حرك دائريه مع بعض
و الاسطوانه بتكون بين الدسك و الحدافه مزنوقه بين الاتنين و بتنقل الحركه للفتيس عن طريق الاحتكاك بينها و بين الدسك و الحدافه
لما بندوس على بدال الدبرياج, الفرش بيطلع للامام و يزق البليه (البليه وظيفتها انها متوصلش الحركه الدائريه بتاعة الدسك للفرش علشان ميحصلش فيه نحر و تآكل) و هى تضغط على الريش السست بتاعة الدسك يقوم يحصل حركه داخل ميكانزم الدسك تبعد الدسك عن الاسطوانه و ميحصلش احتكاك فتنفصل حركة الموتور عن الفتيس
لو عندك مشكله فى الفرش مش هيعرف يقوم بعمله بطريقه صحيحه و يزق البليه و تضغط على الدسك و تفصل الحركه عشان تعرف تنقل طبيعى. و ممكن تحس ان البدال بقى اوطى من الاول و ممكن توصل لدرجة انك بتدوس دبرياج للاخر و برضه ما يفصلش

مشاكل الدبرياج و الفتيس كتيره و علشان تعرف المشكله لازم يتحل و يتبص عليه

لازم الاول نحدد مصدر الصوت اذا كان من الدبرياج او الفتيس او من حاجه تانيه و سبب الصوت ايه, لان واضح من الكلام انها مش مشكلة زلطه مزنوقه فى الكاوتش, و بعد ما نحدد مصدر الصوت و سببه نكشف عليه ونعالج المشكله
لان وجود صوت يدل على ان فيه حاجه غلط و لازم نعرف السبب لان ممكن لو سكتنا عليها الموضوع يكبر
انا لما كنت فى اسكندريه بعد 4 ايام بالضبط العربيه ابتدت تعمل اصوات غريبه بس ده كان بسبب الرطوبه و الملح الى فى الجو فكان الحل الغسيل بانتظام

(اعرف بالضبط المشكله فين و سببها ايه و حلها لان لو حاجه مهمه يبقى كفايه ال 7 شهور تمشى بالعربيه بالشكل ده)