الموضوع: أ.عصام سلطان يفضح العلمانيين على الملأ

المشاركة الأصلية كتبت بواسطة عمرو عمارة

أشكر كل من شاهد المقطع وعلق عليه

ولكن للأسف الشديد ما توقعته حصل......6 ردود و100 مشاهدة فقط لموضوع كشف صراحةً حقيقة نوايا العلمانيين !!!

قارن بين هذا الموضوع وبين أي موضوع به إدانة لأي جهة إسلامية وستعرفون ما أقصد

على فكرة الكلام ده مش سر و كان بيتقال صراحة في برامج كتير, انه الانتخابات لو أتعملت دلوقتي اللي حينجح الأخوان و رجال الأعمال اللي حينسلخوا من الحزب الوطني و أن التيارات الجديدة و شباب الثورة مش حياخدوا فرصة. الحقيقة انه كلام فارغ ما أقنعنيش لأنه مش ذنب الأخوان انهم ليهم شعبية في الشارع, و اللي عايز ينافس يبتدي يشتغل على أرض الواقع أحسن ما يقعد يعيط عالفضائيات.

بس برضه ده ملوش علاقة بالأسلام كدين - بغض النظر عن نوايا الطرفين - لأن الأخوان المسلمين مش هما الأسلام. و على فكرة النقطة دي هي اللي عمالين نتناقش فيها من ساعة الاستفتاء. أحنا كل اعتراضنا ان يتهم كل من ينقد الأخوان - او السلفيين - انه بيعادي الدين او علماني او ضد الاسلام زي ما يكون الأسلام حكر عل الجماعات دي. و بنفس المنطق برضه اعتراضنا على ربط الموافقة على التعديلات بالحفاظ على الأسلام و بالتالي اللي قال لأ يبقى ضد الاسلام!!!!

الواقع بيقول ان الصراع سياسي في المقام الأول, الاخوان و السلفيين شايفين انها فرصتهم انهم ياخدوا أكبر نسبة تمثيل في البرلمان فبيقنعوا الناس تقول نعم, و بقية التيارات (العلمانية و غير العلمانية) شايفين ان فرصتهم حتبقى أحسن لو الانتخابات اتأجلت لبعد الدستور و عشان كدة بيقنعوا الناس تقول لأ. لحد هنا الاتنين مش غلط و كل و احد حر في رأيه.

المشكلة بقى اللي احنا بنعترض عليها ان الشيوخ و الائمة المنتمين للأخوان و السلفيين ابتدوا يدعوا الناس لنعم بادعاء ان نعم هي الرأي الاسلامي أو رأي الدين, و ان لأ هي رأي أعداء الدين لالغاء المادة التانية, مع ان اساسا الدستور كدة كدة حيتغير و المادة التانية متوقع يحصل عليها خلاف في كل الأحوال, و برضه متوقع ان نهاية الخلاف في كل الحالات انها محدش يقدر يشيلها لأن الأغلبية مش حتوافق. ببساطة ده خداع للناس خصوصا البسطاء منهم, و احنا ديننا مفهوش حاجة اسمها الغاية تبرر الوسيلة. مينفعش اضحك على الناس و أفهمهم ان اللي يقول لأ يبقى ضد الدين و أثم قلبه ( و يا ريت مندخلش تاني في حتة انكار حاجات كلنا شوفناها بنفسنا مش اتحكت لنا) ايا كان هدفي. أنا كنت ححترم جدا موقف الشيوخ لو كانوا قالوا للناس أحنا عايزينكوا تقولوا نعم عشان تبقى فرصة الأخوان (و السلفيين) أقوى في الانتخابات و ده حيخلى صوتنا مسموع بشكل أكبر و يخلينا نقدر ننفذ فكرنا.

على فكرة برضه أنا شايفة ان كمان رجال الدين المسيحي كانوا غلط لما أستخدموا أسلوب مشابه لحشد المسيحيين للتصويت ب لا. بس أنا لما بتكلم على موقف رجال الدين الاسلامي بتكلم من منطلق غيرتي على ديني و رفضي انه يكون وسيلة للوصول بطريقة ملتوية, مش رفض انه الدين يدخل في أمور الدنيا زي ما بتدعوا, بجانب طبعا الاهانة البالغة اللي بأشعر بيها بسبب اتهامي و كل من قال لا بأننا تخلينا عن نصرة الدين و أخذنا جانب الملحدين و أعداء الأسلام!!!

اتمنى وجهة نظري تكون وصلت و مندخلش في مشاحنات تاني, لأننا في الأخر أخوات في الدين و الوطن.